ក្រុមអង្គការមនុស្សធម៌កំពុងជំរុញឲ្យរដ្ឋាភិបាលមីយ៉ានម៉ានិងបង់ក្លាដែសធ្វើឲ្យប្រាកដថា ជនភៀសខ្លួនរ៉ូហ៊ីងយ៉ាវិលត្រឡប់ទៅកាន់ផ្ទះសម្បែងរបស់ខ្លួនវិញដោយសុវត្ថិភាព ហើយនិងឈរលើគោលការណ៍ស្ម័គ្រចិត្ត។
ក្រុមអង្គការមនុស្សធម៌ក៏បាននិយាយដែរថា ពួកគេនឹងធ្វើពហិការដល់ជំរំថ្មីសម្រាប់ពួកអ្នកវិលត្រឡប់ជនជាតិរ៉ូហ៊ីងយ៉ាទៅកាន់រដ្ឋ Rakhine ក្នុងប្រទេសមីយ៉ានម៉ា ប្រសិនបើ ជនភៀសខ្លួនរ៉ូហ៊ីងយ៉ាទាំងនោះមិនត្រូវបានគេអនុញ្ញាតឲ្យរស់នៅផ្ទះរបស់ខ្លួនដែលមានស្រាប់ដោយសុវត្ថិភាពទេនោះ។
ក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃសុក្រ ក្រុមអង្គការផ្តល់ជំនួយៗនានាដូចជា អង្គការ Care International ជួយសង្គ្រោះកុមា អង្គការ Consortium Dutch និងអង្គការសាមគ្គីអន្តរជាតិ បាននិយាយថា ពួកគេមានការព្រួយកង្វល់អំពីការប្រកាសដែលបានធ្វើឡើងមួយសប្តាហ៍កន្លងមកដោយប្រទេសបង់ក្លាដែស និងមីយ៉ានម៉ាដើម្បីចាប់ផ្តើមបញ្ជូនជនភៀសខ្លួនត្រឡប់ទៅវិញនៅក្នុងរយៈពេល២ខែ។
ទោះជាយ៉ាងណាក៏ដោយ អង្គការមិនយកកម្រៃទាំងនោះបានសរសើរការតាំងចិត្តរបស់ប្រទេសទាំង២ដើម្បីសម្របសម្រួលដំណើរការវិលត្រឡប់របស់ជនភៀសខ្លួនទាំងនោះ។ ពួកគេបានស្នើថា ការបញ្ជូនជនភៀសខ្លួនត្រឡប់ទៅវិញត្រូវធ្វើឡើងស្របទៅតាមបទដ្ឋានអន្តរជាតិហើយនងធ្វើទៅតាមសិទ្ធិជាមូលដ្ឋានរបស់ជនភៀសខ្លួនដើម្បីវិលត្រឡប់ដោយការស្ម័គ្រចិត្តទៅកាន់ទីកន្លែងដើមរបស់ខ្លួនវិញ។
សេចក្តីថ្លែងការណ៍សរសេរថា៖ «ទោះជាយ៉ាងណាក៏ដោយ យើងស្នើថា សិទ្ធិ សុវត្ថិភាពនិងការការពារអ្នកវិលត្រឡប់ទៅវិញត្រូវតែទទួលបានការធានាមុនពេលចាប់ផ្តើមដំណើរការវិលត្រឡប់ទៅវិញ»៕