លោក Brett Kavanaugh ដែលបានត្រូវស្នើឈ្មោះឱ្យកាន់តំណែងជាចៅក្រមតុលាការកំពូលស.រ.អា.ប្រឈមនឹងការសាកសួរមួយថ្ងៃនៅថ្ងៃពុធនេះនៅចំពោះមុខគណៈកម្មាធិការតុលាការនៃព្រឹទ្ធសភាស.រ.អា.ដែលនៅទីនោះលោកបាននិយាយប្រាប់ពួកសមាជិកគណៈកម្មាធិការនេះហើយថាទស្សនវិជ្ជារបស់លោកគឺថាចៅក្រមគួរបកស្រាយច្បាប់ហើយមិនមែនធ្វើច្បាប់ទេ។
ពាក្យពេចន៍ទាំងនេះ ជាផ្នែកមួយនៃសេចក្តីថ្លែងការណ៍បើកសវនាការដែលលោកបានធ្វើកាលពីថ្ងៃអង្គារនៅពេលចាប់ផ្តើមដំណើរការដើម្បីទទួលការតែងតាំងសម្រាប់តំណែងនេះដែលលោកប្រធានាធិបតី Donald Trump សង្ឃឹមថានឹងធ្វើឱ្យលោក Kavanaugh ក្លាយទៅជាសមាជិកទី៩នៃតុលាការកំពូល។
គេរំពឹងថាពួកសមាជិកព្រឹទ្ធសភានឹងលើកបញ្ហានានាដូចជាការពន្លូតកូន គោលនយោបាយអនុគ្រោះខាងការសិក្សានិងការធ្វើការងារ អំណាចនីតិប្រតិបត្តិនិងជម្លោះរវាងជំនឿសាសនានិងសិទ្ធិមនុស្សស្រឡាញ់មនុស្សមានភេទដូចគ្នានៅពេលពួកគេពិចារណាថាតើពួកគេមានជំនឿថាលោកKavanaugh គួរចូលរួមក្នុងតុលាការនេះឬទេ។
ទម្រង់ការនេះបានចាប់ផ្តើមកាលពីថ្ងៃអង្គារដោយមានភាពនាំឱ្យសង្កៀរត្រចៀកដោយក្រុមប្រជាធិបតេយ្យបានខិតខំព្យាយាមពន្យាពេលលើកសវនាការនេះទៅធ្វើនៅថ្ងៃក្រោយហើយក៏មានការស្រែកបង្អាក់ដោយអ្នកតវ៉ានៅក្នុងហ្វូងមនុស្សដែលនាំឱ្យមានការរិះគន់ពីសមាជិកខ្លះនៃព្រឹទ្ធសភាផងដែរ។
លោក Kavanaugh បានអង្គុយជិត៧ម៉ោងស្តាប់ក្រុមបក្សសាធារណរដ្ឋនិងប្រជាធិបតេយ្យនិយាយ យល់ព្រមឬប្រឆាំងនឹងការចូលរួមរបស់លោកក្នុងតុលាការកំពូលនៅមុនពេលលោកមានឱកាសថ្លែងទៅកាន់គណៈកម្មាធិការនេះ។
លោក Kavanaugh បាននិយាយថា «គេមិនត្រូវយល់ឃើញជាដាច់ខាតថាតុលាការកំពូលជាស្ថាប័នមួយប្រកាន់គណបក្សណាមួយទេ។ ចៅក្រមល្អម្នាក់ត្រូវតែជាអាជ្ញារកណ្តាល—ជាអាជ្ញារកណ្តាលម្នាក់ដែលអព្យាក្រឹតមិនលម្អៀងដែលមិនអនុគ្រោះដល់គូវិវាទឬគោលនយោបាយទេ»។
លោកបានថ្លែងថាក្នុងរយៈពេល១២ឆ្នាំដែលលោកបានកាន់តំណែងជាចៅក្រមសាលាឧទ្ធរណ៍សហព័ន្ធលោកបានសម្រេចអំពីក្តីក្តាំជាង៣០០ករណី៕