ពួកតាលីបង់អាហ្វហ្គានីស្ថានបានងើបបះបោរឡើងវិញ ហើយមន្រ្តីសហរដ្ឋអាមេរិកនិយាយថា កងកម្លាំងប៉ូលិសនិងយោធារបស់ប្រទេសនោះ នៅតែពឹងផ្អែកការជួយឧបត្ថម្ភពីសំណាក់បរទេសដើម្បីប្រយុទ្ធពួកបះបោរនោះ។
ក៏ប៉ុន្តែ ការយកចិត្តទុកដាក់ខាងនយោបាយតិចទៅនៃសង្គ្រាមនោះនៅក្នុងសហរដ្ឋអាមេរិកធ្វើឲ្យក្តីសង្ឃឹមថា រដ្ឋបាលរបស់លោកត្រាំ អាចមានភាពបត់បែនកាន់តែខ្លាំងឡើងនៅក្នុងការបង្កើតយុទ្ធសាស្រ្ត។
លោកស្រី Lisa Curtis អ្នកស្រាវជ្រាវជាន់ខ្ពស់នៃមូលនិធិបីតិកភណ្ឌបានបញ្ជាក់ថា៖ «យើងអាចរំពឹងថា រដ្ឋបាលថ្មី នឹងវិនិច្ឆ័យហើយនិងបង្កើតយុទ្ធសាស្រ្តថ្មីមួយឆ្ពោះទៅកាន់អាហ្វហ្គានីស្ថានដោយផ្អែកលើស្ថានភាពជាក់ស្តែងនៅលើសមរភូមិជាជាងប្រើប្រាស់ពេលវេលាខាងនយោបាយក្នុងស្រុកដូចរដ្ឋបាលរបស់លោកអូបាម៉ាបានធ្វើ»។
កងទ័ពអាហ្វហ្គានីស្ថានត្រួតត្រាទឹកដីតែជាង៦០ភាគរយ ហើយបានបាត់បង់ទឹកដីត្រួតត្រាក្នុងប៉ុន្មានឆ្នាំថ្មីៗនេះ។ អ្នកខ្លះភ័យខ្លាចថា ការប្រយុទ្ធដ៏អាក្រក់ នឹងកើតឡើងនៅពេលណាមួយ។
លោក Anthony Cordesman អ្នកវិភាគសន្តិសុខជាតិនៃមជ្ឈមណ្ឌលសម្រាប់ការសិក្សាយុទ្ធសាស្រ្ត និងអន្តរជាតិនិយាយថា៖ «ខ្ញុំគិតថា យើងនឹងឃើញឆ្នាំមួយទៀតនៃការប្រយុទ្ធដ៏ខ្លាំងបំផុត។ មានក្តីសង្ឃឹមតិចតួចបំផុតភ្លាមៗថា លោក អ្នកនឹងមានការចរចាដែលនឹងប្រាកដមានផលប៉ះពាល់ដ៏ខ្លាំងបំផុត ឬមានផលប៉ះពាល់ដែលអាចព្យាករណ៍បាននោះ»។
លោក Ahmed Rashid ជាអ្នកកាសែត និងជាអ្នកនិពន្ធជាតិប៉ាគីស្ថានបាននិយាយតាមប្រព័ន្ធ Skype ថា ប្រយោជន៍ដែលត្រូវបានបង្ហាញដោយប្រទេសចិន អ៊ីរ៉ង់ហើយនិងប្រទេសផ្សេងៗទៀតដែលជាប់ពាក់ព័ន្ធបន្ថែមភាពមិនប្រាកដប្រជា។
«អ្វីដែលលោក អ្នក មាននៅពេលឥឡូវនេះជាស្ថានភាពក្នុងតំបន់កាន់តែស្មុគ្រស្មាញឡើងជាមួយពួកតាលីបង់ដែលមានការគាំទ្រពីប្រទេសអ៊ីរ៉ង់ដែរនោះ។ ពួកគេកំពុងចរចាជាមួយរុស្ស៊ី។ ពួកគេបានចរចាជាមួយចិន។ អស់លោក អ្នក មានប្រទេសដើរតួសំខាន់ៗកាន់តែច្រើនឡើងនៅក្នុងតំបន់ដែលបានពាក់ព័ន្ធ»។ បើ លោកប្រធានាធិបតីត្រាំផ្តោតលើការប្រឆាំងភេរវកម្មជាងជួយរដ្ឋាភិបាលអាហ្វហ្គានីស្ថាន ការណ៍នេះអាចមានន័យថាជាការបង្កើនការយកចិត្តទុកដាក់លើប៉ាគីស្ថាន។ លោកស្រី Rebecca មានប្រសាសន៍ទៀតថា៖
«យើងដឹងថា លោកប្រធានាធិបតីត្រាំ មិនបាននិយាយច្រើនអំពីប្រទេសអាហ្វហ្គានី ស្ថានក្នុងអំឡុងពេលនៃយុទ្ធនាការ ឬក្រោយការបោះឆ្នោតទេ ក៏ប៉ុន្តែ អ្វីដែលលោកប្រធានាធិបតីបាននិយាយប្រហែលជាតំបន់ដែលលោកចាប់អារម្មណ៍មុនគេ ដែលជាបញ្ហាយុទ្ធសាស្រ្តទាក់ទិននឹងប្រទេសប៉ាគីស្ថាន»។
នៅពេលដែលប្រធានាធិបតីត្រាំ បានចាប់ផ្តើមអាណត្តិនៃការកាន់អំណាចរបស់លោក រដ្ឋបាលរបស់លោក នឹងប្រឈមសង្គ្រាមដែលហាក់ដូចជាការប្រឈមដែលមិនធ្លាប់មានកាលពីពេលមុន ក៏ប៉ុន្តែ ក៏ជាបញ្ហាដែលសហរដ្ឋអាមេរិកនៅតែជាអ្នកដើរតួនាទីដ៏សំខាន់មួយក្នុងការព្យាយាមដោះស្រាយ៕
ប្រែសម្រួលដោយ ជឹង ប៉ូជីន