កិច្ចព្រមព្រៀងសន្តិភាពចុងក្រោយរវាងរដ្ឋាភិបាលកូឡុំប៊ី និងចលនាពួកក្រុមឧទ្ទាមកូឡុំប៊ី ត្រូវបានចុះហត្ថលេខាកាលពីថ្ងៃចន្ទម្សិលមិញ។ កិច្ចព្រមព្រៀងនេះពាំនាំមកនូវការបញ្ចប់ការបះបោរដែលបានអូសបន្លាយអស់រយៈពេលយ៉ាងយូរនៅក្នុងទ្វីបអាមេរិក។
លោកអគ្គលេខាធិការអង្គការសហប្រជាជាតិ Ban Ki Moon និងប្រមុខរដ្ឋជាច្រើនរូបទៀត បានចូលរួមនៅក្នុងពិធីចុះហត្ថលេខាលើកិច្ចព្រមព្រៀងសន្តិភាពនេះនៅក្នុងទីក្រុង Cartagena ប្រទេសកូឡុំប៊ី។ កិច្ចព្រមព្រៀងសន្តិភាពនេះត្រូវបានចុះហត្ថលេខាដោយលោកប្រធានាធិបតីកូឡុំប៊ី Juan Manuel Santos និងមេដឹកនាំពួកឧទ្ទាមលោក Rodrigo Londono ដើម្បីបញ្ចប់ជម្លោះដែលបានអូសបន្លាយអស់រយៈពេល ៥ ទសវត្ស កន្លងមកនេះ។
លោក Ban Ki Moon បានមានប្រសាសន៍ថា៖ «សព្វថ្ងៃនេះ ជនជាតិកូឡុំប៊ីកំពុងនិយាយថាលាហើយចំពោះភ្លើងសង្រ្គាម និងផ្ញើនូវពន្លឺនៃក្ដីសង្ឃឹមដែលបំភ្លឺពិភពលោកទាំងមូល»។
លោកប្រធានាធិបតីកូឡុំប៊ី Juan Manuel Santos និយាយថា៖ «ជនរួមជាតិកូឡុំប៊ីទាំងអស់! រាត្រីភ័យតុកស្លុតគឺបានបញ្ចប់ហើយ។ ថ្ងៃនេះ យើងអញ្ជើញអ្នករាល់គ្នាទាំងក្មេងទាំងចាស់ ទាំងអ្នករស់នៅក្នុងទីក្រុង និងតាមជនបទឲ្យបើកភ្នែក បើកចិត្តស្វាគមន៍ថ្ងៃថ្មី»។
ចំណែកឯមេដឹកនាំក្រុមឧទ្ទាមលោក Londono ដែលគេស្គាល់ថាឈ្មោះ Timochenko នោះ បានស្នើសុំការលើកលែងទោសសម្រាប់អំពើអន្តរាយនានា ដែលចលនាក្រុមឧទ្ទាមរបស់លោក បានធ្វើរាប់ទសវត្សកន្លងមក។
ជម្លោះនេះបានធ្វើឲ្យមនុស្សច្រើនជាង ២ សែន ៥ ម៉ឺននាក់ បានបាត់បង់ជីវិត និងបានធ្វើឲ្យមនុស្សច្រើនជាង ៥ លាននាក់ផ្សេងទៀតគេចចេញពីផ្ទះសម្បែងរបស់ពួកគេ៕