លោកប្រធានាធិបតីសហរដ្ឋអាមេរិក បារ៉ាក់ អូបាម៉ា មានផែនការចូលរួមពិធីជាច្រើននៅទិវាគោរពវិញ្ញាណក្ខន្ធយុទ្ធជនដែលពលីក្នុងសង្គ្រាម ជាថ្ងៃឈប់សម្រាកដែលផ្តល់កិត្តិយសដល់បុរសនិងស្រ្តីដែលបានស្លាប់ខណៈដែលកំពុងបម្រើក្នុងយោធាសហរដ្ឋអាមេរិក។
លោកប្រធានាធិបតី អូបាម៉ា នឹងរៀបចំអាហារពេលព្រឹកសម្រាប់ក្រុមយោធានិងអតីតយុទ្ធជន និងមេដឹកនាំយោធាជាន់ខ្ពស់នៅសេតវិមាននៅព្រឹកថ្ងៃច័ន្ទនេះ។
ក្រោយមក លោកប្រធានាធិបតី នឹងចូលរួមក្នុងទិវាគោរពវិញ្ញាណក្ខន្ធយុទ្ធជនដែលពលីក្នុងសង្គ្រាមនៅទីលានបញ្ចុះសពជាតិនៅក្រុង Arlington ដែលនៅទីនោះលោកប្រធានាធិបតី នឹងដាក់កម្រងផ្កានៅផ្នូរទាហានមិនស្គាល់ឈ្មោះ។
សហរដ្ឋអាមេរិក ឈប់សម្រាកនៅរាល់ថ្ងៃច័ន្ទចុងក្រោយនៃខែឧសភា។
លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានថ្លែងសុន្ទរកថាប្រចាំសប្តាហ៍ថា «បំណុលដែលយើងជំពាក់វីរៈជនដ៏ល្បីល្បាញរបស់យើងជាបំណុលមួយដែលយើងមិនអាចសងវិញបាន»។
ពិធីដ៏ធំលើកដំបូងដែលដើមឡើយត្រូវបានគេហៅថា ទិវាបំពាក់មេដៃបានធ្វើឡើងនៅឯកន្លែងបញ្ចុះសពជាតិ Arlington នៅឆ្នាំ ១៨៦៨ រយៈពេល៣ឆ្នាំបន្ទាប់ពីសង្គ្រាមស៊ីវិលបង្ហូរឈាមរបស់សហរដ្ឋអាមេរិកបានសម្លាប់មនុស្សជាង៦សែននាក់។
ឥឡូវនេះ រយៈពេល៣ថ្ងៃនៃចុងសប្តាហ៍ បានត្រូវគេមើលឃើញថា ជាការចាប់ផ្តើមក្រៅផ្លូវការនៃរដូវឈប់សម្រាករដូវក្តៅ។ ជនជាតិអាមេរិកាំងជាច្រើនបានឈប់សម្រាកមួយថ្ងៃពីការងារនិងសាលារៀន ហើយក្រុមគ្រួសារជាច្រើនមានកម្មវិធីទៅពិកនិកឬធ្វើដំណើរទៅកាន់ឆ្នេរសមុទ្រ និងឧទ្យានជាតិ៕