វេជ្ជបណ្ឌិត Victoria Simms នៅសាលាវេជ្ជសាស្រ្តត្រូពិក និងអនាម័យនៃទីក្រុងឡុងដ៏ បាននិយាយថា ក្រុមវេជ្ជបណ្ឌិត បានប៉ាន់ស្មានថា ពលរដ្ឋស៊ីមបាវ៉េម្នាក់ក្នុងចំណោមបួននាក់មានជំងឺធ្លាក់ទឹកចិត្ត ឬជំងឺថប់អារម្មណ៍ ប៉ុន្តែមានគ្រូពេទ្យផ្លូវចិត្តតែ១២រូបប៉ុណ្ណោះ សម្រាប់ព្យាបាលពលរដ្ឋស៊ីមបាវ៉េទាំងអស់ដែលមានចំនួនដល់ទៅ ១៤លាននាក់។
«យើងមិនអាចទៅបង្រៀនពេទ្យផ្លូវចិត្ត និងពេទ្យចិត្តសាស្ត្របានទេ ព្រោះថាវាត្រូវការចំណាយពេល ដល់ទៅ១៥ឆ្នាំ ដើម្បីបង្រៀនគ្រូពេទ្យទាំងនោះ។ ដូច្នេះហើយតើយើងនឹងផ្តល់ការព្យាបាលយ៉ាងដូចម្តេចទៅ?»
ក្រុមគ្រូពេទ្យក្នុងតំបន់ បានរកឃើញវិធីដ៏សាមញ្ញមួយ ប៉ុន្តែវាមានប្រសិទ្ធិភាពខ្ពស់។
វេជ្ជបណ្ឌិត Victoria Simms បានឲ្យដឹងថា កៅអីឈើ ឬហៅថា «កៅអីមិត្តភាព»ជាច្រើន ត្រូវបានដំឡើងនៅតាមមណ្ឌលសុខភាពក្នុងទីក្រុងហារ៉ារ៉េ។ អ្នកជំងឺមកទីនេះទទួលបានការប្រឹក្សាយោបល់តទល់ជាមួយអ្នកប្រឹក្សាសុខភាដែលគេស្គាល់ថាជា «លោកយាយសេវាសុខភាព» ចំនួនប្រាំមួយវគ្គ។
«យើងត្រូវបណ្តុះបណ្តាលចាប់តាំងពីកំរិងទាបបំផុតនៅក្នុងប្រព័ន្ធសុខាភិបាល។ គឺបណ្តុះបណ្តាលស្ត្រីទាំងនោះឲ្យមានសមត្ថភាពអាចផ្តល់ការព្យាបាលតាមការដោះស្រាយបញ្ហាបាន។ ដូច្នេះហើយ អ្នកជំងឺនឹងពន្យល់ដោយបើកចំហរ នូវរាល់បញ្ហារបស់ពួកគេ ហើយអ្នកជំងឺ មើលឃើញថា ពួកគេអាចធ្វើអ្វីមួយបាន ដើម្បីដោះស្រាយបញ្ហាទាំងនោះ»។
មានអ្នកជំងឺជាង៥៥០នាក់បានចូលរួមការសិក្សានេះ។ បន្ទាប់ពីរយៈពេលប្រាំមួយខែ មានអ្នកជំងឺនៅក្នុងក្រុមកៅអីមិត្តភាពចំនួនតែ១៤ ភាគរយប៉ុណ្ណោះ មានរោគសញ្ញាជំងឺធ្លាក់ទឹកចិត្ត បើធៀបទៅនឹងក្រុមអ្នកជំងឺដែលមិនបានចូលរួមក្នុងក្រុមកៅអីមិត្តភាព ដែលមានចំនួនដល់ទៅ៥០ភាគរយ។ ការសិក្សានេះក៏បានបង្ហាញថា អាត្រានៃការធ្វើអត្តឃាតរបស់អ្នកជំងឺមានការថយចុះ ដល់ទៅ៥ដង។
វេជ្ជបណ្ឌិត Dixon Chibanda គឺសហស្ថាបនិកនៃកម្មវិធី កៅអីមិត្តភាព នៃសាកលវិទ្យាល័យស៊ីមបាវ៉េ បានប្រាប់ VOA តាមប្រព័ន្ធ Skype ថា គម្រោងនេះបានផ្តលអត្ថប្រយោជន៍យ៉ាងធំទូលាយ។
«វាមិនត្រឹមតែជាកញ្ចប់សេវាព្យាបាលបញ្ហាសុខភាពផ្លូវចិត្តប៉ុណ្ណោះទេ តែវាជាកញ្ចប់សេវាដែលធ្វើឲ្យមានភាពប្រសើរឡើងនៃជំងឺជាច្រើន ដូចជាជំងឺលើសឈាម ជំងឺទឹកនោមផ្អែម និងការប្រើប្រាស់ថ្នាំរបស់អ្នកជំងឺដែលមានផ្ទុកមេរោគអេដស៍»។
ភាពជោគជ័យមួយនេះ បានធ្វើឱ្យកម្មវិធីកៅអីមិត្តភាព ត្រូវបានដាក់ពង្រាយទៅតាមមណ្ឌលសុខភាពចំនួន៦០ ក្នុងទីក្រុងហារ៉ារ៉េ និងទីក្រុងចំនួនពីរផ្សេងទៀត។ រដ្ឋាភិបាលប្រទេសកាណាដា កំពុងផ្តល់ជំនួយដើម្បីពង្រីកគម្រោងនេះ តាមរយៈកម្មវិធីជំនួយកាណាដារបស់ខ្លួន ឬ (Grand Challenges Canada) ដើម្បីធ្វើឱ្យវាក្លាយទៅជាកម្មវិធីធំបំផុតនៅក្នុងតំបន់សាហារ៉ានៃទ្វីបអាហ្វ្រិក។
ក្រុមអ្នកស្រាវជ្រាវនិយាយថា វាអាចជាគម្រោងសម្រាប់ជួយសុខភាពផ្លូវចិត្ត បានយ៉ាងប្រសើរនៅក្នុងប្រទេសដែលមានប្រាក់ចំណូលទាប និងអាចផ្តល់ជាមេរៀនក្នុងការព្យាបាលទៅកាន់ប្រទេសអ្នកមានមួយចំនួន៕
ប្រែសម្រួលដោយ៖ ឆាយ គីមហ៊ង
