ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​​ស្លាប់​​​របស់​យុវ​ជន​​អេហ្សីប​ លើក​ឡើង​​ពី​​​ការ​ចោទ​ប្រកាន់​ថ្មីៗ ​ចំពោះ​​​ការ​​ធ្វើ​​​ទារុណ​កម្ម​​របស់​ក្រុម​ប៉ូលីស​


ផ្ទះ​ល្វែង​នៅ​ជាន់ក្រោម​របស់​សព​​យុវជន​ អាក់ម៉ែត​​ សា​​បាន​​ (Ahmed Shaban)។ សព​របស់​យុវជននេះ​​ ​ត្រូវ​បានគេ​​​ប្រទះ​ឃើញ​ កាល​ពី​ដើម​ខែ​​វិច្ឆិកានេះ​។
ផ្ទះ​ល្វែង​នៅ​ជាន់ក្រោម​របស់​សព​​យុវជន​ អាក់ម៉ែត​​ សា​​បាន​​ (Ahmed Shaban)។ សព​របស់​យុវជននេះ​​ ​ត្រូវ​បានគេ​​​ប្រទះ​ឃើញ​ កាល​ពី​ដើម​ខែ​​វិច្ឆិកានេះ​។

ទី​ក្រុង​ អា​ឡិច​សាន់​ឌ្រៀ៖​ ខណៈ​ដែល​វិវាទ​ស្តី​ពី​ការ​គាប​សង្កត់​របស់​រដ្ឋាភិបាលទៅ​លើដំណើការ​បោះ​ឆ្នោត បាន​យា​យីតំបន់អាឡិច​សាន់​ឌ្រៀ​ (Alexandria)​ មនុស្ស​ជា​ច្រើន​នៅ​ក្នុង​ទី​ក្រុង​ធំ​បំផុត​លំដាប់ទី​ពីរ​របស់ប្រទេស​អេហ្សីប​ ក៏មាន​ការ​ខឹង​សម្បារទៅ​នឹង​ការ​ស្លាប់របស់​ លោក​អាក់ម៉ែត​ សាបាន​ (Ahmed Shaban)​ ផងដែរ។​ សាក​សពយុវជន​រូប​នេះ​ ត្រូវ​បាន​ប្រទះ​ឃើញ កាល​ពី​ដើម​ខែនេះ​ ដែល​មាន​រយៈ​ពេលបី​បួន​ថ្ងៃ​ បន្ទាប់​ពីការ​ប៉ះ​ទង្គិចជា​មួយ​កង​សន្តិសុខ។ ​នេះ​ជា​ការ​ស្លាប់លើក​ទី​ពីរ​ហើយ​ ដែលជាប់​ពាក់​ព័ន្ធជាមួយ​នឹង​ប៉ុស្តិ៍​ប៉ូលីស​មូល​ដ្ឋានដដែល​នេះ​ កាល​ពី​ប៉ុន្មាន​ខែ​ថ្មីៗនេះ។​ អ្នកដែលមាន​បំណងនិយាយ​អំពីរឿង​ក្តី​នេះ​ បង្ហាញ​ពី​ការ​ភ័យ​ខ្លាចខាងសន្តិសុខ​ ដែល​លើស​ពី​ការភ័យ​ខ្លាច ​ដែល​ធ្វើ​ឡើង​ដោយ​ក្រុម​ប្រឆាំង​ខាង​នយោបាយ​របស់​រដ្ឋាភិបាលទៅ​ទៀត។

បង​ស្រីរបស់​លោក ​អាក់ម៉េត​ សាបាន​ ឈ្មោះ​ ​ណាហ្ក្លា​ (Naglaa) គ្មាន​បំណងនិយាយ​នៅ​ខាង​មុខ​ម៉ាស៊ីន​ថត​វី​ដេ​អូ​ ឬ​សូម្បី​តែឲ្យ​គេ​ថត​សម្លេង​ឡើយ។​ កញ្ញាណាហ្ក្លា បាននិយាយមួយ​ថ្ងៃ​មុន​ ទៅ​កាន់​ក្រុម​អ្នក​យក​ព័ត៌​មាននិងក្រុម​សិទ្ធិ​មនុស្ស។​ កញ្ញា​បាន​ថ្លែង​ថា ​ក្នុង​រយៈពេលប៉ុន្មាន​ម៉ោង​ប៉ុណ្ណោះ​ កង​សន្តិ​សុខ​របស់​រដ្ឋ​ បាន​គំរាម​សង​សឹកមកលើ​រូបកញ្ញា​ ប្រសិន​បើ​កញ្ញា​បន្តនិយាយ​អំពី​រឿង​ក្តី​នេះ​ទៀត។

បុរស​ម្នាក់នៅ​ក្នុង​សង្កាត់​នោះ​ដែរ​ ដែលហៅ​ខ្លួន​គាត់​ថា​ ​អាមៀរ​ (Amir)​ បាន​ព្រមាន​អំពីគ្រោះ​ថ្នាក់​ ដោយ​និយាយ​ថា​ នៅ​ទី​នេះ​ គ្មាន​នរណា​ម្នាក់ចង់​និយាយ​ជា​មួយ​អ្នក​ឯង​ទេ។​ លោក​ បញ្ជាក់​ទៀត​ថា​ នរណា​ក៏​ដោយ​ឲ្យ​តែ​និយាយ​ រដ្ឋាភិបាល​នឹង​មក​ដល់​ ហើយចាប់ចង​ពួកគេ​យក​ចេញ​ទៅ។

សូម្បី​តែមាន​ការ​គំរាម​កំហែង​ដូច​បានរាយ​ការណ៍​ក៏​ដោយ​ កញ្ញា ​ណាហ្ក្លា សាបាន ​យល់​ព្រម​ជួប​នៅ​តាម​ចញ្ចើម​ផ្លូវងងឹត​មួយ​ ដែលស្ថិត​នៅ​មិនឆ្ងាយពី​ផ្ទះ​របស់​នាង​ ក្នុង​សង្កាត់វណ្ណៈ​កម្មករ​នេះ ​ដែលមេធាវី​របស់​កញ្ញា​ និង​មិត្ត​ភ័ក្រ​ម្នាក់ ​ស្ថិត​នៅ​ក្បែរ​នោះ​ដែរ។​ កញ្ញា​ បាន​ពណ៌នា​ហេតុ​ការណ៍​នោះ តាម​ដែល​ក្រុមគ្រួសារ​របស់​កញ្ញា​ ហើយសាក្សីជា​ច្រើនអាច​មាន​លទ្ធភាពប្រមូល​ផ្តុំបញ្ចូល​គ្នា​បាន។

ប្អូន​ប្រុស​អាយុ​ ១៩​ឆ្នាំ​របស់​កញ្ញា​ ឈ្មោះ​អាក់ម៉ែត​ ព្រម​ទាំង​មិត្ត​ភ័ក្រ​របស់​លោក​ ឈ្មោះ​អាក់ម៉ែត​ ហ្វារ៉ាក​ ឡា​ប៊ីប​ (Ahmed​ Farrag​ Labib)​ បាន​ត្រឡប់​មក​ផ្ទះ​វិញ ក្រោយ​ពី​ការ​ចូល​រួម​ក្នុង​ពិធី​មង្គល​ការ នៅ​ថ្ងៃ​ទី​៧​ ខែ​វិច្ឆិកា​ ស្រាប់​តែ​ពេល​នោះ​ ពួក​គេ​ត្រូវ​បាន​បញ្ឈប់​ដោយ​កង​កម្លាំងសន្តិសុខ។​ យុវជន​ទាំង​ពីរ​នាក់​នេះ​ ត្រូវ​បាន​ជឿ​ថា​ បានតវ៉ា​ប្រឆាំង​ និង​ការ​ទាម​ទារ​មួយ​ ដើម្បី​ឆែក​ពួក​គេ។​ សាក្សីជាច្រើននិយាយ​ថា​ បន្ទាប់​មកក្រុម​ប៉ូលីស​ បាន​នាំ​ពួក​គេ​ទៅ​កាន់ប៉ុស្តិ៍​ប៉ូលីស​ស៊ី​ឌី​ហ្គា​ប៊ឺ (Sidi​ Gaber)។

ប៉ុន្មាន​ថ្ងៃ​ក្រោយ​មក​ សាច់​ញាតិរបស់​លោក​សាបាន​ ធ្វើ​ដំណើរ​ទៅ​កាន់ប៉ុស្តិ៍​ប៉ូលីស​នោះ ​និងការិយាល័យ​រដ្ឋាភិបាល​ដទៃ​ទៀត​ ដើម្បី​សួរព័ត៌មាន។​ អជ្ញាធរបាន​ថ្លែង​ថា​ ពួក​គេមិនដឹង​ថាលោក សា​បាន ​ស្ថិត​នៅ​ទី​ណា​ទេ។​ ក្រោយ​មក​ មាន​ការ​ហៅ​ទូរស័ព្ទ​អនាមិកមួយ​ប្រាប់ថា​ ទូរស័ព្ទ​និង​អាវ​ធំ​របស់​លោក​អាក់ម៉ែត​ ត្រូវ​បាន​ប្រទះ​ឃើញនៅ​ឯ​ព្រែក​មួយ​ក្បែរ​នោះ។​ នៅ​ថ្ងៃ​ទី​១២​ ខែ​វិច្ឆិកា​ ក្រុម​ប៉ូលីស​ បាន​ប្រាប់សមាជិក​គ្រួ​សារ​ថា​ សព​របស់​លោកអាក់​ម៉ែត​ ​ត្រូវបានរក​ឃើញ​ ហើយ​ស្ថិត​នៅកន្លែង​តម្កល់​សព។​ សាច់​ញាតិបាន​បញ្ជាក់ថា​ សព​នោះគឺ​ លោកអាក់ម៉ែតមែន​ ហើយនិយាយ​ថា​ ដៃនិង​ដង​ខ្លួនរបស់​លោក​ ត្រូវ​បានរហែក​ចេញ​ពី​គ្នា​ ហើយក្រចកដៃនិង​ក្រចក​ជើង​ ត្រូវ​បាន​ដក​ចេញ។

ក្រុម​ប៉ូលីសឲ្យ​យោបល់​ថា​ លោក​អាក់​ម៉ែត​ បាន​ធ្វើ​អត្ត​ឃាត​ ដោយ​លោត​ចូល​ទៅ​ក្នុង​ព្រែក​នោះ ​ដោយនិយាយ​បន្ថែម​ទៀត​ថា​ ស្នាម​របួស​នោះ​ ប្រហែលជា​បង្ក​ដោយ​ខ្លួន​ឯង។​ ក្រុម​គ្រួសារបាន​និយាយ​ថា​ ពួក​គេ​មិន​ត្រូវ​បាន​អនុញ្ញាត​ឲ្យប្រារព្ធពិធី​បុណ្យ​សព​ត្រឹម​ត្រូវ​ទេ​ ហើយកងកម្លាំង​សន្តិ​សុខទៅ​តាម​ពួក​គេនៅ​ពេល​បញ្ចុះ​សព។

ខណៈ​ដែលកាសែតផ្លូវ​ការមិន​អើពើ​ចំពោះ​រឿង​នេះ​ ទំព័រ​អ៊ីន​ធឺ​ណិតរួម​គ្នាដ៏​សកម្ម​ផុល​ផុសរបស់​អេហ្សីប​ មាន​ប្រតិកម្ម​តប​ភ្លាមៗ​ចំពោះរឿង​នេះ​ ដោយ​ធ្វើ​ការ​ប្រៀប​ធៀប​ការ​ស្លាប់របស់លោក​ ខាឡេដ​ សាអ៊ីឌ​ (Khaled​ Said)​ ដែល​បុរស​វ័យ​ក្មេង​ម្នាក់​នេះ​ បានស្លាប់កាល​ពី​ខែ​មិថុនា​ បន្ទាប់​ពីប៉ះ​ទង្គិចជា​មួយ​ក្រុម​ប៉ូលីសសម្ងាត់​ ដែល​ចេញ​មក​ពី​ប៉ុស្តិ៍​ ស៊ីឌី​ហ្គាប៊ឺ​ដែរ។​ សាក្សីជា​ច្រើន រំឭក​អំ​ពីរបៀប​ដែលលោក​សាអ៊ីឌ​ ត្រូវ​បាន​អូស​ចេញ​ពីកន្លែងអ៊ីន​ធឺ​ណិត​កា​ហ្វេ​មួយ​ ហើយវាយ​សម្លាប់នៅ​ខាង​ក្រៅ នៅ​តាមដង​ផ្លូវ។​ ក្រុម​ប៉ូលីស​ បាន​និយាយ​ភ្លាមៗ​ថា​ លោក​ សាអ៊ីឌ​ ព្យាយាមលាក់​ថ្នាំ​ញៀនខុស​ច្បាប់​មួយ​កញ្ចប់​ ដោយលេប​ថ្នាំ​ញៀន​នោះ​ ហើយ​ក៏​បានថប់​ដង្ហើមស្លាប់ទៅ។​ រូប​ភាពវះ​កាត់​ពិនិត្យ​សព​ដ៏​គួរ​ឲ្យខ្ពើម​រអើម​ បាន​បង្ហាញ​ពី​ស្នាម​របួស​ជា​ច្រើន​កន្លែង​ មាន​ដូច​ជា​ បាក់​ឆ្អឹងធ្គាម​ បាក់​ធ្មេញ​ និង​ប្រេះ​លលាដ៏​ក្បាល​ ដែល​ពាក់​ព័ន្ធ​ទៅ​នឹងការ​វាយ​ដំ​យ៉ាង​សា​ហាវ​ ជា​ជាងការ​ថប់​ដង្ហើមដោយ​ចៃ​ដន្យ។

ចំពោះមនុស្ស​ដូច​ជា​អ្នក​ជិត​ខាង​របស់​ លោក​ អាក់ម៉ែត​ គឺ​លោក​ អាមៀរ​ រឿង​រ៉ាវ​បែប​នេះ​ គឺ​មាន​កើត​ឡើង​ញឹក​ញាប់​ណាស់។

ដោយនិយាយ​សំដៅទៅកង​កម្លាំង​សន្តិ​សុខ​ លោក​អាមៀរ​ មាន​ប្រសាសន៍​ថា​ «សត្វ​ឥន្ទ្រីយ៍»​ ខ្លាំង​ជាង​ពួក​យើង។​ ព្រះ​អាទិទេព​ស្ថិត​នៅ​លើ​មេឃ​ឯ​ណោះ​ ប៉ុន្តែ​សត្វ​ឥន្ទ្រីយ៍​វិញនៅ​លើ​ដី។​ លោក បានបន្ថែម​ទៀត​ថា​ សូម​ឲ្យ​ព្រះជួយ​បញ្ចៀស​ការ​ឈឺ​ចាប់ដោយឲ្យសត្វ​ទាំង​នេះ​ ​ផុតពី​ពួក​យើង។

ប៉ុន្តែកាល​ពី​ពេល​ថ្មីៗ​នេះ​ ការ​តវ៉ា​ជា​សាធារណៈ​ បាន​ធ្វើ​ឲ្យ​មាន​ការ​ផ្លាស់​ប្តូរ​ នៅ​ក្នុង​របៀបដែលកង​កម្លាំង​សន្តិ​សុខ​ បញ្ចេញប្រតិកម្ម​តបវិញ។​ ពី​ដំបូង​ រដ្ឋាភិបាល​បាន​បដិសេធដដែល​ៗ​ ​អំពី​ជាប់​ពាក់​ព័ន្ធ​របស់​ក្រុម​ប៉ូលីសទៅ​នឹង​ការ​ស្លាប់របស់​លោក​ ខាឡេដ​ សាអ៊ីឌ។​ ប៉ុន្តែ​ បន្ទាប់​ពីមានយុទ្ធ​នា​ការតាម​ប្រព័ន្ធ​អ៊ីន​ធឺ​ណិត​ ព្រម​ទាំង​ការ​តវ៉ាសាធារណៈ​ និងការ​អំ​ពាវ​នាវ​ពី​ក្រុមសិទ្ធិមនុស្សអន្តរ​ជាតិ​ ក្រុម​មន្ត្រីអេហ្សីប​ បាន​បើក​រឿង​ក្តី​នោះ​ឡើង​វិញ។​ បច្ចុប្បន្ន​ មន្រ្តី​ប៉ូលីស​ពីរ​នាក់​ កំពុង​ប្រឈម​មុខនឹង​ការ​កាត់​សេចក្តី។

ទំព័រ​អ៊ីន​ធឺ​ណិតរួម​គ្នា​ ក៏​ប្រញាប់​ប្រញាល់ចោទ​សួរ​ពី​ការ​ស្លាប់របស់​លោក​អាក់​ម៉ែត សា​បាន។​ អង្គការ​សិទ្ធិ​មនុស្ស​អន្តរ​ជាតិ​ Amnesty​ International​ ក៏បាន​ទាម​ទារ​ឲ្យមាន​ការស៊ើប​អង្កេតពេញលេញ​មួយ​ដែរ។​ បង​ស្រីរបស់លោក​អាក់​ម៉ែត​ ឈ្មោះ​ណាហ្ក្លា​ និយាយ​ថា​ ជំហានបន្ទាប់របស់​កញ្ញា​ គឺ​ត្រូវរង់​ចាំរបាយ​ការណ៍​វះ​កាត់​ពិនិត្យ​សព​ជា​ផ្លូវ​ការ។​ ប្រសិន​បើរបាយការណ៍​នោះបញ្ជាក់​ថា​ លោក​អាក់​ម៉ែត​ ស្លាប់ដោយ​សារ​មូល​ហេតុ​ធម្មតា​ កញ្ញា​នឹង​ទាម​ទារ​ឲ្យមាន​គណៈ​កម្មាធិការ​ពិសេស​មួយ​ មក​ពី​ទី​ក្រុង​ខាយរ៉ូ​ ដើម្បី​គាស់​សព​ប្អូន​ប្រុសរបស់​កញ្ញា​មក​វិញ។

ខណៈ​ដែលគេ​កំពុង​រង់​ចាំ​ចម្លើយ​ទៅ​នឹង​សំណួរ​ទាំង​នោះ មាន​ទិដ្ឋភាព​មិន​ទាន់​អាច​ដោះ​ស្រាយបាន​មួយទៀត​ ទាក់​ទង​ទៅ​នឹងរឿង​ក្តី​នេះ​ ដែល​ជា​ជោគ​វាសនា​របស់​ លោក​អាក់​ម៉ែត ហ្វា​រ៉ាក​ ឡេ​ប៊ីប​ (Ahmed​ Farrag​ Labib)។​ ក្រុម​ប៉ូលីសអះ​អាង​ថា​ លោក​ឡេ​ប៊ីប​ ដែល​ជា​មិត្ត​ភ័ក្តិ​របស់លោក​អាក់ម៉ែត​ នៅ​ល្ងាច​នៃ​ការ​បាត់​ខ្លួន​លោក​នោះ​ ហើយ​ទំនង​ជា​សាក្សី​សំខាន់ក្នុង​រឿងក្តីនេះ​ ស្ថិត​ក្នុង​កន្លែង​ឃុំ​ខ្លួន​ ពី​បទ​ចោទ​បទ​ប្រកាន់មិន​ជាប់​ពាក់​ព័ន្ធ​គ្នាមួយ។​ ប៉ុន្តែ​ កន្លង​មករាល់​សំណើ​រ​ទាំងអស់​ ពី​សំណាក់​គ្រួសារ​ មិត្ត​ភ័ក្តិ មេ​ធា​វី និង​ក្រុម​សិទ្ធិ​មនុស្ស ​ដើម្បី​ធ្វើ​ការ​ទាក់​ទង​ជាមួយយុវជនរូប​នេះ​ បានទទួល​ការ​បដិសេធ៕

ប្រែ​សម្រួល​ដោយ ​លី​ សុខ​ឃាង

XS
SM
MD
LG