តុលាការខេត្តកំពង់ស្ពឺ កាលពីថ្ងៃព្រហស្បតិ៍ បានផ្តន្ទាទោសប្រធានសហជីពមូលដ្ឋានមួយរូបនៅរោងចក្រផលិតស្បែកជើងវីងស្តារស៊ូ (Wing Star Shoes) គឺលោក ជា ចាន់ ឱ្យជាប់ពន្ធនាគារមួយឆ្នាំពីបទ«សមគំនិតក្នុងអំពើលួច»។ ប៉ុន្តែលោកត្រូវអនុវត្តទោស៦ខែ ឯទោសសេសសល់ត្រូវព្យួរតាមបញ្ញត្តិនៃការព្យួរទោសធម្មតានៃក្រមព្រហ្មទណ្ឌ។ នេះបើតាមសេចក្តីប្រកាសព័ត៌មានរបស់សាលាដំបូងខេត្តកំពង់ស្ពឺ ចេញផ្សាយកាលពីថ្ងៃព្រហស្បតិ៍។
អ្នកការពារសិទ្ធិកម្មករចាត់ទុកការសម្រេចរបស់តុលាការខេត្តកំពង់ស្ពឺជារឿងអយុត្តិធម៌។
ប្រធានសម្ព័ន្ធសហជីពកម្ពុជា អ្នកស្រី យ៉ាង សោភ័ណ្ឌ ប្រាប់វីអូអេនៅថ្ងៃសុក្រនេះថាតុលាការមិនមានភស្តុតាងគ្រប់គ្រាន់ដើម្បីកាត់ទោសលោក ជា ចាន់ ពីបទចោទខាងលើនោះទេ ដោយលើកហេតុផលថា ការផ្តន្ទាទោសនាពេលថ្មីៗនេះជាចេតនានៃការច្រានចោលសហជីពឯករាជ្យនៅរោងចក្រវីងសា្តរស៊ូ ដែលស្ថិតនៅក្នុងស្រុកគងពិសី ខេត្តកំពង់ស្ពឺ។
អ្នកស្រីថ្លែងថា៖ «ការសម្រេចនេះ យើងឃើញច្បាស់មែនទែនថា ការសម្រេចនេះគឺអត់យោងទៅលើច្បាប់ ភស្តុតាងអីទាំងអស់ គ្មានភស្តុតាង គ្មានអង្គហេតុកើតឡើង គ្មានច្បាប់ណាដែលអាចដាក់ទោសទណ្ឌចាន់បានទេ។ ប៉ុន្តែវាទៅជាតុលាការមានការសម្រេចអ៊ីចឹង។ អ៊ីចឹងវាចំណុចមួយដែលយើងយល់ឃើញថា វាជារូបភាពនៅក្នុងការគំរាមកំហែងទៅដល់សិទ្ធិកម្មករនិយោជិតដែលគាត់មានសិទ្ធិស្របច្បាប់នៅក្នុងការបង្កើតអង្គការវិជ្ជាជីវៈ»។
ក្រោយការសម្រេចរបស់តុលាការខេត្តកំពង់ស្ពឺ សហព័ន្ធសហជីពកម្ពុជា និងសហជីពកម្ពុជានៃក្រុមហ៊ុនវីងស្តារស៊ូ បានចេញសេចក្តីថ្លែងការណ៍រួមមួយដោយចាត់ទុកសេចក្តីសម្រេចរបស់សាលាដំបូងខេត្តកំពង់ស្ពឺមានភាព«អយុត្តិធម៌ជាខ្លាំង» ដល់លោកជា ចាន់ ព្រោះលោកពុំបានប្រព្រឹត្តដូចការចោទប្រកាន់ឡើយ ពោលគឺលោកគ្រាន់តែអនុវត្តសិទ្ធិសេរីភាពសហជីពតែប៉ុណ្ណោះ។ សហជីពបញ្ជាក់ថា មិនមានភស្តុតាងបញ្ជាក់ថា មានទង្វើលួច ឬផ្សំគំនិតឡើយ។
សហជីពទាំងពីរបានស្នើឱ្យក្រសួងយុត្តិធម៌និងឧត្តមក្រុមប្រឹក្សានៃអង្គចៅក្រមពិនិត្យ និងស៊ើបអង្កេតឡើងវិញលើការផ្តន្ទាទោសលោក ជា ចាន់ និងការចាប់ខ្លួនមេដឹកនាំសហជីពរូបនេះ ដោយគ្មានដីកា កាលពីខែកុម្ភៈ។
សហជីពទាំងពីរក៏«ស្នើតុលាការទម្លាក់ចោលបទចោទ និងដោះលែងលោក ជា ចាន់ ប្រធានសហជីពកម្ពុជានៃក្រុមហ៊ុនវីងស្តារស៊ូ ដោយឥតលក្ខខណ្ឌ ព្រោះសំណុំរឿងនេះគ្មានអង្គហេតុ ភស្តុតាងនៃបទល្មើសបានកើតឡើងនោះទេ»។
កាលពីពាក់កណ្តាលខែកុម្ភៈ លោក ជា ចាន់ ត្រូវបានសមត្ថកិច្ចឃាត់ខ្លួនពីបទ «សមគំនិតក្នុងអំពើលួច»គឺនៅក្រោយពេលលោកត្រូវបានកម្មករបោះឆ្នោតឱ្យធ្វើជាប្រធានសហជីពកម្ពុជានៃក្រុមហ៊ុនវីងស្តារស៊ូ ដែលផ្គត់ផ្គង់ផលិតផលស្បែកជើងឱ្យទៅក្រុមហ៊ុនASICS របស់ប្រទេសជប៉ុន។
អ្នកគ្រប់គ្រងកម្មវិធីការងារនៃអង្គការសង់ត្រាល់ លោក ឃុន ថារ៉ូ យល់ឃើញថា សេចក្តីសម្រេចរបស់សាលាដំបូងខេត្តកំពង់ស្ពឺ គឺជារឿងអយុត្តិធម៌ ហើយការបង្កើតសហជីពនៅរោងចក្រវីងស្តារស៊ូគួរតែត្រូវបានការពារដោយច្បាប់។
លោកលើកឡើងជាអក្សរតាមតេឡេក្រាមថា៖ «ការចូលរួមបង្កើតអង្គការវិជ្ជាជីវៈគួរត្រូវទទួលបានការពារដោយច្បាប់។ កាត់ទោសលោកដោយអំណាចសាលក្រមរបស់តុលាការខេត្តកំពង់ស្ពឺនេះនឹងបង្កជាឧបសគ្គរារាំងក្នុងដំណើរដឹកនាំសកម្មភាពសហជីព ដើម្បីការពារសិទ្ធិ និងផលប្រយោជន៍កម្មករ ជាពិសេសវាអាចជះឥទ្ធិពលដល់ដំណើរការក្នុងការចុះបញ្ជីអង្គការវិជ្ជាជីវៈ(សហជីព) ប្រចាំរោងចក្រវីងស្តារស៊ូ»។
លោកបន្ថែមថា ក្រុមគ្រួសារលោក ជា ចាន់ អាចធ្វើការប្តឹងទាស់សាលក្រមរបស់តុលាការខេត្តកំពង់ស្ពឺ ក្នុងករណីដែលមិនសុខចិត្ត។
ជាការឆ្លើយតបទៅនឹងការអំពាវនាវឱ្យមានការស៊ើបអង្កេតលើសំណុំរឿងមេដឹកនាំសហជីពមូលដ្ឋានរូបនេះ រដ្ឋលេខាធិការ និងអ្នកនាំពាក្យក្រសួងយុត្តិធម៌លោក ជិន ម៉ាលីន ថ្លែងថា រាល់ការសម្រេចរបស់តុលាការធ្វើឡើងដោយផ្អែកលើអង្គហេតុ និងអង្គច្បាប់ ហើយស្ថាប័នតុលាការមិនអាចស្តាប់តាមការបង្គាប់បញ្ជាពីភាគីណាមួយទេ។
លោកថ្លែងថា៖ «ការសម្រេចរបស់តុលាការ គេផ្អែកលើអង្គហេតុ អង្គច្បាប់ ហើយបើយើងយល់ថា មិនមានភស្តុតាងទេការចោទប្រកាន់ហ្នឹង ការផ្តន្ទាទោសហ្នឹងមិនត្រឹមត្រូវ សូមធ្វើការការពារខ្លួនតាមនីតិវិធីច្បាប់ មិនអាចទៅស្នើ ស្ថាប័ននេះ ស្ថាប័ននោះដោះលែងឬក៏បង្គាប់បញ្ជាតុលាការបានទេ។ អ៊ីចឹងគាត់អាចប្រើប្រាស់សិទ្ធិរបស់គាត់តាមផ្លូវច្បាប់ក្នុងការការពារខ្លួន អាចប្តឹងឧទ្ធរណ៍ដើម្បីជំទាស់នឹងការសម្រេចរបស់សាលាដំបូង ហើយបង្ហាញភស្តុតាង សក្ខីកម្មឱ្យបានរឹងមាំដើម្បីការពារខ្លួនតាមផ្លូវច្បាប់ដែលគាត់អាចមានក្នុងការការពារខ្លួន»។
ប្រធានលេខាធិការដ្ឋាន និងជាអ្នកនាំពាក្យរបស់តុលាការខេត្តកំពង់ស្ពឺ លោក ផេង ស៊ីភ័ណ បដិសេធមិនផ្តល់ការអត្ថាធិប្បាយ ដោយប្រាប់ឱ្យអ្នកយកព័ត៌មានសំឡេងសហរដ្ឋអាមេរិកវីអូអេយោងទៅតាមសេចក្តីប្រកាសរបស់សាលាដំបូងខេត្តកំពង់ស្ពឺ។
វីអូអេមិនទាន់អាចទាក់ទងសុំការអត្ថាធិប្បាយពីភាគីរោងចក្រវីងស្តារស៊ូបានទេ។
អ្នកស្រី ឆែ ចាន់រ៉ា អាយុ៣២ឆ្នាំ ភរិយារបស់លោក ជា ចាន់ ប្រាប់វីអូអេថា ក្តីក្តាំប្រឆាំងនឹងស្វាមីអ្នកស្រីផ្តើមចេញពីរឿងសំខាន់មួយគត់គឺការបង្កើតសហជីពនៅរោងចក្រ។
អ្នកស្រីថ្លែងថា៖ «ខ្ញុំអាចគិតថា រឿងហ្នឹង១០០ភាគរយហ្មង គិតថា គាត់ធ្វើសហជីពហ្នឹង គាត់ចងក្រងគឺគិតថា ខាងរោងចក្រហ្នឹង គឺនិយាយទៅគឺគាត់ចូលសហជីពប៉ាច់ គឺគាត់មានបញ្ហាហ្មង»។
អ្នកស្រីបន្ថែមថា សាក្សីម្នាក់នៅរោងចក្រ ក៏ធ្លាប់បានបញ្ជាក់រួចហើយកាលពីខែឧសភាថា ស្វាមីអ្នកស្រីមិនជាប់ពាក់ព័ន្ធនឹងអំពើសមគំនិតលួចនៅក្នុងរោចក្រទេ។
ទាក់ទិននឹងការប្តឹងជំទាស់នឹងសាលក្រមរបស់សាលាដំបូងខេត្តកំពង់ស្ពឺ អ្នកស្រីថា វាអាស្រ័យលើការសម្រេចរបស់ថា្នក់ដឹកនាំសហជីពដែលជួយបង្កើតសហជីពឯករាជ្យនៅរោងចក្រវីងស្តារស៊ូ៕
វេទិកាបញ្ចេញមតិ