អង្គការសុខភាពពិភពលោកនិយាយថា មានមនុស្សយ៉ាងតិចណាស់៧សែននាក់បានស្លាប់រៀងរាល់ឆ្នាំដោយសារជំងឺដែលស៊ាំនឹងថ្នាំដោយមានរួមបញ្ចូលមនុស្ស ២សែន៣ម៉ឺននាក់ ដែលបាត់បង់ជីវិតដោយសាររោគរបេងដែលស៊ាំនឹងឱសថច្រើនមុខ។
កាលពីឆ្នាំទៅមិញ របាយការណ៍មួយរបស់អ.ស.ប.បានទស្សន៍ទាយថា ការស៊ាំនឹងឱសថប្រឆាំងនឹងមេរោគអាចបណ្តាលឱ្យមានមនុស្ស១០លាននាក់ស្លាប់រៀងរាល់ឆ្នាំមិនហួសពីឆ្នាំ២០៥០ទេ ហើយការណ៍នេះនាំឱ្យមានវិបត្តិហិរញ្ញវត្ថុផងដែរ។
អង្គការ WHO និយាយថា ការគំរាមកំហែងដល់សុខភាពមានផលប៉ះពាល់ដល់មនុស្សគ្រប់គ្នា។ ក៏ប៉ុន្តែមនុស្សដែលអាចមានគ្រោះថ្នាក់ជាងគេមានរួមបញ្ចូលពួកមនុស្សដែលមានប្រព័ន្ធការពារនឹងជំងឺខ្សោយ មនុស្សចាស់ មនុស្សទទួលការព្យាបាលបែប chemotherapy ជនត្រូវវះកាត់និងពួកអ្នកជំងឺទទួលការផ្សាំសរីរាង្គ។
លោក Peter Beyer ជាទីប្រឹក្សាជាន់ខ្ពស់របស់អង្គការ WHO អំពីបញ្ហាមេរោគស៊ាំនឹងថ្នាំ។លោកនិយាយថាថ្នាំអង់ទីប៊ីយ្យូទិច ៥០កំពុងអភិវឌ្ឍ ក៏ប៉ុន្តែភាគច្រើននៃឱសថទាំងនេះមានអត្ថប្រយោជន៍មានកម្រិតនៅពេលប្រៀបធៀបជាមួយថ្នាំអង់ទីប៊ីយ្យូទិច ដែលមានរួចហើយ។ លោក Peter Beyer និយាយថា៖
«ជាការពិតយើងគ្មានថ្នាំអង់ទីប៊ីយ្យូទិច ដែលមានប្រសិទ្ធភាពប្រឆាំងនឹងបាក់តេរីដែលស៊ាំនឹងថ្នាំទាំងនេះទេហើយ...គេប្រហែលត្រូវការពេល១០ឆ្នាំដើម្បីអភិវឌ្ឍថ្នាំ antibiotic ថ្មីមួយ។ ដូច្នេះប្រសិនបើលោកអ្នកវិលត្រឡប់ទៅកាន់ដំណាក់ការទីមួយវិញ យើងដឹងច្បាស់លាស់អំពីអ្វីដែលល្អបំផុត អ្វីដែលយើងអាចផលិតបានក្នុងពេល១០ឆ្នាំទៀត។ហើយ យើងឃើញពិតប្រាកដអំពីអ្វីដែលជាការខ្វះខាតដើម្បីទប់ទល់នឹងការគំរាមកំហែងបច្ចុប្បន្ននេះ»។
លោក Beyer ថ្លែងថាតាមវិទ្យាសាស្ត្រ ជាការពិបាកណាស់ក្នុងការផលិតថ្នាំអង់ទីប៊ីយ្យូទិចថ្មីៗ។ លោកនិយាយថា មានបញ្ហាមួយទៀតគឺថា មានការលើកទឹកចិត្តខាងហិរញ្ញវត្ថុតិចតួចដើម្បីឱ្យក្រុមហ៊ុនឱសថអភិវឌ្ឍឱសថថ្មីមួយ។លោកនិយាយថាមានការប្រថុយប្រថាន។ គេត្រូវការពេលវេលានិងប្រាក់កាសច្រើនហើយកម្រៃដែលនឹងបានមកវិញទំនងជាតិចតួច។
លោក Beyer និយាយប្រាប់វីអូអេថា ទោះជាយ៉ាងណាក៏ដោយក៏លោកមានជំនឿថាឧស្សាហកម្មឱសថនឹងផ្លាស់ប្តូរគោលជំហរហើយអភិវឌ្ឍថ្នាំអង់ទីប៊ីយ្យូទិចថ្មីៗពីព្រោះពួកគេក៏ត្រូវការថ្នាំថ្មីៗដែរ។ លោក Peter Beyer និយាយថា៖
«ជាឧទាហរណ៍ ប្រសិនបើពួកគេចង់លក់ថ្នាំសម្រាប់ធ្វើ chemotherapy ពួកគេប្រាកដជាត្រូវការថ្នាំអង់ទីប៊ីយ្យូទិចមានប្រសិទ្ធភាពពីព្រោះបើមិនដូច្នេះទេលោកអ្នកមិនអាចធ្វើ chemotherapy ប្រកបដោយប្រសិទ្ធភាពទេ ជាពិសេសនៅក្នុងប្រទេសនានាដូចជាប្រទេសឥណ្ឌា ឬប្រទេសបង់ក្លាដេស ដែលនៅទីនោះការត្រួតត្រាការបញ្ចៀសកុំឱ្យមានការឆ្លងរោគទំនងជាមិនសូវមានប្រសិទ្ធិភាពទេ។ ដូច្នេះ ខ្ញុំយល់ថានៅពេលណាមួយឧស្សាហកម្មឱសថនឹងផ្លាស់ប្តូរគោលជំហរ។នេះជាសេចក្តីសង្ឃឹមរបស់យើង។ហើយ ជាការពិត យើងក៏ខិតខំព្យាយាមបញ្ចុះបញ្ចូលរដ្ឋាភិបាលឱ្យបណ្តាក់ទុនក្នុងការផលិតថ្នាំថ្មីៗទាំងនេះដែរ។»
លោក Beyer និយាយថា នៅពេលជាមួយគ្នានេះវិធានការមួយក្នុងបណ្តាវិធានការនានាអស់សោហ៊ុយតិចគឺការបញ្ចៀសកុំឱ្យមានការឆ្លងរោគនៅក្នុងមន្ទីរពេទ្យ។លោកថ្លែងថាជាជាងផលិតឱសថថ្មីៗដើម្បីព្យាបាលមនុស្សដែលឆ្លងជំងឺក្នុងមន្ទីរពេទ្យ ជាការល្អប្រសើរដោយការពារពួកគេមិនឱ្យឆ្លងរោគជាដំបូង៕
ប្រែសម្រួលដោយលោកឈឹម សុមេធ
