ពួកមន្ត្រីសហរដ្ឋអាមេរិកកំពុងថ្កោលទោសការវាយប្រហារដែលគេសង្ស័យថាជាអាវុធគីមីនៅក្នុងប្រទេសស៊ីរីដែលបានធ្វើឲ្យមនុស្សស្លាប់មួយចំនួនធំ ខណៈដែលមានការទទួលស្គាល់ថា រដ្ឋាភិបាលរបស់ប្រធានាធិបតី Bashar al-Assad បានធ្វើការវាយប្រហារនៅតែជាការពិតខាងនយោបាយនៅក្នុងប្រទេស។
លោក Sean Spicer អ្នកនាំពាក្យសេតវិមាន បាននិយាយនៅឯសន្និសីទប្រចាំថ្ងៃកាលពីថ្ងៃអង្គារថា «ការវាយប្រហារអាវុធគីមីនៅថ្ងៃនេះក្នុងប្រទេសស៊ីរីប្រឆាំងនឹងជនស្លូតត្រង់ រួមមានស្ត្រី និងកូនក្មេង ជាការគួរឲ្យស្តីបន្ទោស ហើយមិនអាចមិនអើពើដោយពិភពលោកស៊ីវិល័យទៀតទេ»។
ការវាយប្រហារតាមអាកាសកាលពីព្រឹកថ្ងៃអង្គារទៅលើសង្កាត់ដែលកាន់កាប់ដោយពួកឧទ្ទាមនៅក្នុងខេត្ត Idlipភាគខាងជើងកើតមានឡើងប៉ុន្មានថ្ងៃបន្ទាប់ពីមន្ត្រីកំពូលរបស់រដ្ឋបាលលោកត្រាំ រួមមានលោករដ្ឋមន្ត្រីការបរទេស Rex Tillerson បានផ្តល់សញ្ញាថា ការដកលោក al-Assad ចេញពីតំណែងលែងជាអាទិភាពរបស់សហរដ្ឋអាមេរិកទៀតហើយ។
រូបភាពនៃការស្លាប់ និងកំពុងស្លាប់របស់ជនស៊ីវិលនៅពេលថ្មៗនេះកំពុងជំរុញឲ្យរដ្ឋបាលរបស់លោកត្រាំពិចារណាឡើងវិញនូវគោលនយោបាយរបស់ខ្លួនស្តីពីប្រទេសស៊ីរី ដែលនៅទីនោះសង្គ្រាមស៊ីវិលរយៈពេល៦ឆ្នាំបានធ្វើឲ្យមនុស្សរាប់ម៉ឺននាក់ស្លាប់។
កាលពីថ្ងៃអង្គារ លោកSpicer អ្នកនាំពាក្យសេតវិមានបានទទួលស្គាល់ថា ការណ៍វាយប្រហារនេះមិនមែនជាផលប្រយោជន៍ដ៏ល្អរបស់ពលរដ្ឋស៊ីរីដើម្បីទុកប្រធានាធិបតី al-Assad នៅកាន់អំណាចទេ ក៏ប៉ុន្តែ លោកបាននិយាយទៀតថា ជម្រើសរបស់សហរដ្ឋអាមេរិកមានកម្រិត៕
