ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទីប្រឹក្សា​សន្តិសុខ​ជាតិ​សេតវិមាន​ពិភាក្សា​ជាមួយ​ព្រះអង្គ​ម្ចាស់​រជ្ជទាយាទ​អារ៉ាប៊ី​សាអូឌីត


រូបឯកសារ៖ លោក Jake Sullivan ថ្លែង​នៅ​ក្នុង​សន្និសីទសារព័ត៌មានន​នៅ​សេតវិមាន​រដ្ឋ​ធានីវ៉ាស៊ីនតោន
រូបឯកសារ៖ លោក Jake Sullivan ថ្លែង​នៅ​ក្នុង​សន្និសីទសារព័ត៌មានន​នៅ​សេតវិមាន​រដ្ឋ​ធានីវ៉ាស៊ីនតោន

សេតវិមាន​បាន​និយាយ​ថា​ទីប្រឹក្សា​សន្តិសុខ​ជាតិ​លោក Jake Sullivan ​បាន​ពិភាក្សា​ពី​កិច្ចខំប្រឹង​ប្រែង​ដើម្បី​បញ្ចប់​សង្គ្រាម​នៅ​ក្នុង​ប្រទេស​យេម៉ែន​នៅពេល​ដែល​លោក​បាន​ជួប​ជាមួយ​ព្រះអង្គម្ចាស់​រជ្ជទាយាទ​ Mohammed bin Salman នៃ​ប្រទេស​អារ៉ាប៊ី សាអូឌីត​កាលពី​ថ្ងៃ​អាទិត្យ​ម្សិលមិញ។

សេចក្តីថ្លែងការណ៍​របស់​សេតវិមាន​បាន​បញ្ជាក់​ថា​ភាគី​ទាំង២​ក៏​បាន​ពិភាក្សា​ពី​ការគាំទ្រ​របស់​អារ៉ាប៊ី សាអូឌីត​ដល់ពលរដ្ឋ​សហរដ្ឋ​អាមេរិក​ដែល​បាន​ជម្លៀសចេញ​ពី​ប្រទេស​ស៊ូដង់​បន្ទាប់ពី​ការផ្ទុះ​ឡើង​នូវ​ការប្រយុទ្ធ​នៅ​ទីនោះ​កាលពី​ខែ​មុន។

បណ្តាញ​សារព័ត៌មាន​អារ៉ាប៊ី សាអូឌីត​បាន​រាយការណ៍​ថា​ការចរចា​បាន​ធ្វើ​ឡើង​នៅ​ក្នុង​ទីក្រុង​កំពង់ផែ Jeddah ​ហើយ​ការចរចា​បាន​ទាក់ទិន​នឹង«ទំនាក់​ទំនង​យុទ្ធសាស្ត្រ»។

សេតវិមាន​បាន​បញ្ជាក់​ថា​ភាគី​ទាំង២បាន​ចូលរួម​ពិភាក្សា​កាន់តែ​ធំ​ទូលាយ​ជាមួយ​ទីប្រឹក្សា​សន្តិសុខ​មកពី​ប្រទេស​ឥណ្ឌា​និង​ប្រទេស​អេមីរ៉ាត់​អារ៉ាប់រួម​ដើម្បី«ធ្វើ​ឱ្យ​ជឿនលឿន​ដល់​ទស្សនៈ​រួម​របស់​ពួកគេ​ក្នុង​ការមាន​សន្តិសុខ​និង​វិបុលភាព​កាន់តែ​ខ្លាំង​ឡើង​នៅ​ក្នុង​តំបន់​មជ្ឈិម​បូព៌ា​ដែល​ភ្ជាប់​គ្នា​ទៅ​វិញ​ទៅមក​ជាមួយ​ប្រទេស​ឥណ្ឌា​និង​ពិភពលោក»។

ការពិភាក្សាកើតមាន​ឡើង​នៅពេល​ដែល​មាន​ទំនាក់​ទំនង​តានតឹង​រវាង​សហរដ្ឋ​អាមេរិក​និង​ប្រទេស​ អារ៉ាប៊ី សាអូឌីត។ ប្រភព​នៃ​ការតានតឹង​ទាំងនោះរួមមាន​ការសម្លាប់​លោកJamal Khashoggi អ្នក​សរសេរ​ខ្ទង់​កាសែត Washington Post កាលពី​ឆ្នាំ២០១៨នៅឯ​ស្ថាន​កុងស៊ុល​អារ៉ាប៊ី សាអូ ឌីត​ក្នុង​ទីក្រុង​អ៊ីស្តង់ប៊ុល​ហើយ​នឹង​ការកាត់បន្ថយ​ផលិតផល​ប្រេង​ដោយ​អង្គការ OPEC+ ដែល​ដឹក នាំ​ដោយអារ៉ាប៊ី សាអូឌីត។

ទីភ្នាក់ងារ​ស៊ើបការណ៍​សម្ងាត់​សហរដ្ឋ​អាមេរិក​បាន​វាយតម្លៃ​ថា​ព្រះអង្គ​ម្ចាស់​រជ្ជទាយាទ​អារ៉ាប៊ី សាអូឌីត​បាន​យល់ព្រម​ដល់​ប្រតិបត្តិការ​ដើម្បី​ចាប់​ឬ​សម្លាប់​លោក Khashoggi​ ប៉ុន្តែ​ប្រទេស​អារ៉ាប៊ី សាអូឌីត​បាន​បដិសេធ។

សង្គ្រាម​ក្នុង​ប្រទេស​យេម៉ែន​បាន​ចាប់ផ្តើម​ក្នុង​ឆ្នាំ២០១៤​នៅពេល​ដែល​ពួក​ឧទ្ទាម Houthiបាន​រឹប អូស​យក​រដ្ឋធានី​របស់​យេម៉ែន។ ប្រទេស​អារ៉ាប៊ី សាអូឌីត​បាន​ចាប់ផ្តើម​បង្កើត​ក្រុមយោធា​ចម្រុះ​នៅ​ដើម​ឆ្នាំ២០១៥​ដើម្បី​គាំទ្រ​រដ្ឋាភិបាល​យេម៉ែន៕

ព័ត៌មាន​ខ្លះ​នៃ​សេចក្តីរាយការណ៍​នេះ​ដកស្រង់​ពី​ទីភ្នាក់ងារ​សារព័ត៌មាន APនិង Reuters

XS
SM
MD
LG