សេតវិមានបានចេញផ្សាយសេចក្តីថ្លែងការណ៍មួយនិយាយថា លោកប្រធានាធិបតី Donald Trump មានប្រាក់ចំណូលជាង១៥០លានដុលា្លរក្នុងឆ្នាំ២០១៥ ដែលនៅលើនេះលោកបានបង់ពន្ធដារចំនួន៣៨លានដុលា្លរ ហើយសេតវិមានបានរិះគន់របាយការណ៍មួយតាមទូរទស្សន៍ដែលបានលាតត្រដាងឱ្យដឹងអំពីឯកសារពន្ធដាររបស់លោក Trump ថាជាសកម្មភាពមួយខុសច្បាប់។
សេចក្តីថ្លែងការណ៍នេះបានចេញផ្សាយកាលពីយប់ថ្ងៃអង្គារនៅមុនមានរបាយការណ៍មួយផ្សព្វផ្សាយដោយបណ្តាញទូរទស្សន៍ MSNBC។ អ្នកស្រី Rachel Maddow អ្នកផ្សាយទូរទស្សន៍នេះបានលាតត្រដាងអ្វីដែលអ្នកស្រីនិយាយថាជាឯកសារពន្ធដារមានពីរទំព័រហើយអ្នកស្រីបានថ្លែងថាលោក David Cay Johnston អ្នកសរសេរសារព័ត៌មានដែលទទួលពានរង្វាន់ Pulitzer និងជាអ្នកវិភាគពន្ធដារជាអ្នកផ្តល់ព័ត៌មាននេះ។
លោក Johnston បាននិយាយប្រាប់អ្នកស្រី Maddow ថា លោកបានឃើញឯកសារពន្ធដារមានពីរទំព័រនេះនៅក្នុងប្រអប់សំបុត្ររបស់លោក។ លោកបានថ្លែងថាលោកមិនដឹងទេថាតើនរណាជាអ្នកបញ្ជូនឯកសារនេះមក ឬព្រោះហេតុអ្វីនោះទេ។
អ្នកស្រី Maddow បាននិយាយថា អ្នកស្រីបានបញ្ជូនសំណៅចម្លងនៃឯកសារពន្ធដារនេះទៅឱ្យសេតវិមានដើម្បីឱ្យធ្វើអត្ថាធិប្បាយ។ រដ្ឋបាលអាមេរិកាំងបានចេញផ្សាយសេចក្តីថ្លែងការណ៍សាធារណៈរបស់ខ្លួននៅមុនការផ្សាយកម្មវិធីរបស់អ្នកស្រីនៅយប់ថ្ងៃអង្គារ។
នៅក្នុងសេចក្តីថ្លែងការណ៍របស់ខ្លួនធ្វើមុនការផ្សាយកម្មវិធីទូរទស្សន៍នេះ សេតវិមានបាននិយាយថា «អ្នកដឹងថាអ្នកចង់បានប្រជាប្រិយភាពណាស់នៅពេលអ្នកចង់រំលោភច្បាប់ដើម្បីជំរុញការផ្សាយរឿងមួយអំពីឯកសារពន្ឋដារមានពីរទំព័រដែលជាឯកសារមួយទសវត្សរ៍មុននេះ»។
សេចក្តីថ្លែងការណ៍នេះបន្ថែមថា «នៅមុនពេលលោកបានជាប់ឆ្នោតជាប្រធានាធិបតី លោក Trump ជាអ្នកជំនួញម្នាក់មានជោគជ័យបំផុតក្នុងបណ្តាពួកអ្នកជំនួញក្នុងពិភពលោក។ វាជាការខុសច្បាប់ទាំងស្រុងក្នុងការលួច និងបោះពុម្ពផ្សាយឯកសារពន្ឋដារ។បណ្តាញផ្សាយព័ត៌មានមិនស្មោះត្រង់អាចបន្តធ្វើការលើរបៀបវារៈរបស់ពួកគេ ហើយលោកប្រធានាធិបតីក៏នឹងផ្តោតការយកចិត្តទុកដាក់លើរបៀបវារៈរបស់លោកដែរ»៕
