ភ្ជាប់​ទៅ​គេហទំព័រ​ទាក់ទង

សេតវិមាន​និង​សមាជិក​សភា​ជាន់ខ្ពស់​ជា​ច្រើន​ថា​ អាមេរិក​នឹង​មិន​ខកខាន​សង​សំណង​ទេ


សេតវិមាន​និង​សមាជិក​សភា​ជាន់ខ្ពស់​ជា​ច្រើន​ថា​ អាមេរិក​នឹង​មិន​ខកខាន​សង​សំណង​ទេ

នៅ​មិន​ដល់៣​អាទិត្យ​មុន​ពេល​កំណត់​ត្រូវ​ដំឡើង​កម្រិត​ប្រាក់​កម្ចី​សម្រាប់​រដ្ឋាភិបាល​សហព័ន្ធ ​ក៏​សេតវិមាន​ និង​មេដឹកនាំ​សភា​នៅ​តែ​រឹង​ទទឹង​ ថា​សហរដ្ឋ​អាមេរិក​នឹង​មិន​ខកខាន​សង​បំណុល​ជាតិ​របស់​ខ្លួន​ចំនួន​១៤,៣ ​លាន​លាន​ដុល្លារ​ទេ។ ក៏​ប៉ុន្តែ​ដំណោះស្រាយ​មួយ​ធ្វើឡើង​ដោយ​គណបក្ស​ទាំង​ពីរ​ដើម្បី​ដាក់​ប្រទេស​ក្នុង​ផ្លូវ​មួយ​ដែល​អាច​ទ្រាំទ្រ​រួច​ក្នុង​ការសង​បំណុល​នោះ​បង្ហាញ​ថា​គ្មាន​សញ្ញា​ថា​អាច​ទៅ​រួច​ទេ។

មាន​ចំណុច​មួយ​ដែល​មន្រ្តី​ជាន់​ខ្ពស់របស់​គណបក្ស​ប្រជាធិបតេយ្យ​ និង​សាធារណរដ្ឋ​យល់​ស្រប​គ្នា​នោះ​គឺ​ ការខកខាន​មិន​បាន​ដំឡើង​ប្រាក់​បំណុល​អតិបរមា​របស់​អាមេរិក​ទាន់​ពេល​ដើម្បី​ជៀស​ផុត​ពី​ការខកខាន​មិន​បាន​សង​បំណុល​មួយ​ដែលជាកាតព្វកិច្ច​របស់​រដ្ឋាភិបាល​សហ​ព័ន្ធ​នោះ​គឺ​មិន​អាច​គិត​ដល់​ទេ។ លោក​ ចាកុប លូវ (Jacob​ Lew)​ គឺ​ជា​មន្រ្តី​ជាន់​ខ្ពស់​របស់​លោក​ប្រធានាធិបតី​ទទួល​បន្ទុក​ថវិកា។ លោក​បាន​មាន​ប្រសាសន៍​ថា៖

«រាល់​មេដឹកនាំ​សភា​ និង​ប្រធានាធិបតី​បាន​ទទួល​ស្គាល់​ថា​ យើង​ត្រូវ​ដំឡើង​កម្រិត​ប្រាក់​កម្ចី ហើយ​សំណួរ​នោះ​គឺ​តើ​ត្រូវ​ធ្វើ​យ៉ាងដូចម្តេច?»

លោក​ លូវ ​បាន​និយាយ​ដូច្នេះ​នៅ​កម្មវិធី​ This Week​ របស់​បណ្តាញ​ទូរទស្សន៍​ABC។

សមាជិក​ព្រឹទ្ធសភា​ខាង​គណបក្ស​សាធារណរដ្ឋ​លំដាប់​ទី​ពីរ​លោក ចន ឃីល (Jon Kyl) ​បាន​មាន​ប្រសាសន៍ស្រដៀង​គ្នា​នេះ​ដែរ។

«ប្រទេស​យើង​នឹង​មិន​អាច​ខក​ខាន​សង​បំណុល​ទេ។ ទោះ​ជា​អាច​ទៅ​រួច​ឬ​មិន​រួច​ការសន្សំ​សំចៃ​ដែល​ទទួល​បាន​ក្នុង​ដំណើរការ​នេះ​នៅ​តែ​មាន​ការ​ចោទ​សួរ​ជានិច្ច»។

ការចរចា​នៅ​ប៉ុន្មាន​សប្តាហ៍​នេះ​គឺ​បរាជ័យ​ក្នុង​ការសម្រេច​បាន​នូវ​អ្វី​ដែល​ហៅ​ថា«ការតថ្លៃ​ដ៏​ធំ»​ដើម្បី​តម្រឹម​ឱនភាព​ថវិកា​របស់​សហរដ្ឋ​អាមេរិក​ឲ្យ​នៅ​ត្រឹម​៤លានលាន​នៅ​ក្នុង​អំឡុង​ពេល​១០​ឆ្នាំ។ ការទាល់​ច្រក​នេះ​បាន​ជំរុញ​ឲ្យ​គម្រោង​ជា​ច្រើន​ដើរ​ថយ​ក្រោយ​ក្នុង​ការដំឡើង​កម្រិត​បំណុល​អតិបរមា​ ប្រសិន​បើ​គោលដៅ​៤​លាន​លានមិន​អាច​សម្រេច​បាន​នោះ៕

ប្រែសម្រួល​ដោយ នាង​ហ៊ុយ​ សម្ផស្ស

XS
SM
MD
LG