បុរសខ្មាន់កាំភ្លើងស្បែកសដែលបានបាញ់សម្លាប់ពលរដ្ឋស្បែកខ្មៅ ៣ នាក់នៅហាង Dollar General ក្នុងទីក្រុង Jacksonville រដ្ឋ Florida កាលពីថ្ងៃសៅរ៍សប្ដាហ៍មុន គឺមានអាយុ ២១ ឆ្នាំដែលបានទិញកាំភ្លើងរបស់ខ្លួនដោយស្របច្បាប់និងមិនមានប្រវត្តិឧក្រិដ្ឋនោះទេ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើការបញ្ជាក់របស់មន្ត្រីអនុវត្តច្បាប់កាលពីថ្ងៃអាទិត្យ។
ខ្មាន់កាំភ្លើងដែលមានឈ្មោះថា Ryan Christopher Palmeter នេះបានរស់នៅជាមួយនឹងឪពុកម្ដាយរបស់ខ្លួននៅជាយក្រុង Jacksonville។ នេះបើតាមការបញ្ជាក់របស់ស្នងការប៉ូលិសលោក T.K. Waters នៅក្នុងសន្និសីទកាសែតមួយ។ ខ្មាន់កាំភ្លើងរូបនោះបានស្លាប់ដោយសារបាញ់ខ្លួនឯង។
លោក Waters បាននិយាយថា ការបាញ់ប្រហារនេះកើតឡើងដោយសារការរើសអើងជាតិសាសន៍។ អាជ្ញាធរបានបញ្ជាក់ថា ខ្មាន់កាំភ្លើងបានបន្សល់ទុកនូវការបញ្ជាក់ជាច្រើនអំពីគោលបំណងរបស់ខ្លួនសម្រាប់ប្រព័ន្ធផ្សព្វផ្សាយ ហើយឪពុកម្ដាយរបស់ខ្មាន់កាំភ្លើងនិងមន្ត្រីអនុវត្តច្បាប់បានរៀបរាប់លម្អិតអំពីការស្អប់គុំកួនរបស់ខ្មាន់កាំភ្លើងចំពោះពលរដ្ឋស្បែកខ្មៅ។
ខ្មាន់កាំភ្លើងក៏បានបន្សល់ទុកនូវមតកសាសន៍និងលិខិតអំពីការធ្វើអត្តឃាតមួយច្បាប់ផងដែរដែលឪពុករបស់ខ្មាន់កាំភ្លើងរូបនោះបានរកឃើញ។ នេះបើតាមការបញ្ជាក់របស់ស្នងការប៉ូលិសទីក្រុង Jacksonville។
ប្រធានាធិបតីសហរដ្ឋអាមេរិកលោក Joe Biden បានបញ្ជាក់នៅក្នុងសេចក្ដីថ្លែងការណ៍មួយកាលពីថ្ងៃអាទិត្យថា ការបាញ់ប្រហារនេះបានកើតឡើងនៅចំថ្ងៃដែលសហរដ្ឋអាមេរិកប្រារព្ធខួបទី ៦០ ឆ្នាំនៃការដើរក្បួននៅរដ្ឋធានីវ៉ាស៊ីនតោន ដែលជាព្រឹត្តិការណ៍ដែលលោក Martin Luther King Jr. បានថ្លែងសុន្ទរកថាដ៏ល្បីល្បាញដែលមានចំណងជើងថា «ខ្ញុំមានក្ដីសុបិនមួយ» ឬ I Have a Dream។
ទីភ្នាក់ងារសារព័ត៌មាន AP បានរាយការណ៍ថា មនុស្សរាប់រយនាក់បានប្រមូលផ្ដុំគ្នាកាលពីថ្ងៃអាទិត្យនៅឯពិធីដុតទៀនបួងសួងនិងនៅព្រះវិហារគ្រិស្ដសាសនាដោយក្ដីមួហ្មងនិងហត់នឿយដើម្បីកាន់ទុក្ខដល់ជនរងគ្រោះនៃការវាយប្រហាររើសអើងជាតិសាសន៍លើកនេះ ដែលជាការវាយប្រហារបែបនេះមួយទៀតដែលបានកើតឡើងនៅក្នុងសហរដ្ឋអាមេរិក។
នៅក្រោយពិធីបុណ្យសពនៅថ្ងៃអាទិត្យ មនុស្សប្រហែល ២០០ នាក់បានបង្ហាញខ្លួននៅឯពិធីដុតទៀនបួងសួងនៅយប់ថ្ងៃអាទិត្យនៅកន្លែងដែលស្ថិតនៅមួយប្លុកពីហាង Dollar General នៅក្នុងទីក្រុង Jacksonville ដែលនៅហាងនោះមន្ត្រីប៉ូលិសបានបញ្ជាក់ថាខ្មាន់កាំភ្លើងឈ្មោះ Ryan Palmeter នេះបានបើកការបាញ់ប្រហារកាលពីថ្ងៃសៅរ៍ដោយប្រើកាំភ្លើងដែលទិញដោយស្របច្បាប់ បើទោះបីជាខ្មាន់កាំភ្លើងរូបនោះធ្លាប់ធ្វើតេស្តសុខភាពផ្លូវចិត្តដោយមិនស្ម័គ្រចិត្តក៏ដោយ៕
