បេក្ខជន​អនុ​ប្រធានាធិបតី​អាមេរិក​ទាំងពីរ​បក្ស​នឹង​ជជែក​ដេញដោល​គ្នា​នៅ​ថ្ងៃ​អង្គារ​នេះ

បេក្ខជន​អនុ​ប្រធានាធិបតី​អាមេរិក​លោក Tim Walz ខាង​បក្ស​ប្រជាធិបតេយ្យ​និង​លោក JD Vance ខាង​បក្ស​សាធារណរដ្ឋ​នឹង​ជជែក​ដេញដោល​គ្នា​នៅ​ថ្ងៃ​អង្គារ​នេះ​វេលា​ម៉ោង ៩ យប់​នៅ​ក្នុង​ទីក្រុង New York។ នេះ​ជា​ការ​ជជែក​ដេញដោល​គ្នា​តែម្តង​គត់​រវាង​បេក្ខជន​ទាំង​ពីរ ដែល​នឹង​ផ្ដល់​ឱកាស​ឱ្យ​បេក្ខជន​នីមួយៗ​សង្កត់​បញ្ជាក់​សារ​របស់​បក្ស​រៀងៗ​ខ្លួន​ប្រាប់​ដល់​អ្នក​បោះឆ្នោត​មុន​ការ​បោះឆ្នោត​ចូល​មក​ដល់​នៅ​ថ្ងៃ​ទី ៥ ខែ​វិច្ឆិកា​ខាងមុខ។ នេះ​បើ​យោង​តាម​សេចក្តី​រាយការណ៍​របស់​ទីភ្នាក់ងារ​សារព័ត៌មាន Reuters។

ការ​ជជែក​ដេញដោល​រយៈពេលេ ៩០ នាទី​នេះ​នឹង​ធ្វើ​ឡើង​នៅ​មណ្ឌល​ផ្សាយ​ព័ត៌មាន CBS ហើយ​នឹង​ត្រូវ​សម្របសម្រួល​ដោយ​ពិធីករ​កម្មវិធី «ព័ត៌មាន​ពេល​ល្ងាច (Evening News)» របស់​ទូរទស្សន៍ CBS អ្នកស្រី Norah O'Donnell និង​អ្នក​សម្របសម្រួល​កម្មវិធី «Face the Nation» អ្នកស្រី Margaret Brennan។

លោក Walz ដែល​ជា​អភិបាល​រដ្ឋ Minnesota ទំនងជា​នឹង​ប្រើ​ភាព​ល្បីល្បាញ​របស់​លោក​ជា «មនុស្ស​ធម្មតា» ដើម្បី​ព្យាយាម​ទាក់ទាញ​អ្នក​បោះឆ្នោត រួមទាំង​អ្នក​បោះឆ្នោត​ឯករាជ្យ​ផងដែរ ដែល​មើលឃើញ​បេក្ខជន​ប្រធានាធិបតី​អាមេរិក​ខាង​បក្ស​ប្រជាធិបតេយ្យ​អ្នកស្រី Kamala Harris ថា​សេរី​និយម​ជ្រុល។

លោក Walz ទំនងជា​នឹង​ចាក់​លោក Vance ឱ្យ​លោត ដូច​ដែល​អ្នកស្រី Harris បាន​ធ្វើ​ដោយ​ជោគជ័យ​ក្នុង​ការ​ជជែក​ដេញដោល​របស់​អ្នកស្រី​ជាមួយ​បេក្ខជន​ប្រធានាធិបតី​ខាង​បក្ស​សាធារណរដ្ឋ​លោក Donald Trump ដែរ។

លោក Vance ដែល​ជា​សមាជិក​ព្រឹទ្ធសភា​អាមេរិក​ខាង​បក្ស​សាធារណរដ្ឋ​តំណាង​រដ្ឋ Ohio នឹង​ត្រូវ​ប្រយ័ត្នប្រយែង​កុំឱ្យ​ធ្លាក់ចូល​អន្ទាក់​ក្នុង​ការ​ជជែក​ដេញដោល​នេះ បើ​លោក Walz ប្រើ​យុទ្ធសាស្ត្រ​ជជែក​ដេញដោល​តាម​អ្នកស្រី Harris។

លោក Vance ទំនងជា​នឹង​ត្រូវ​ប្រឈម​សំណួរ​អំពី​វោហារសាស្ត្រ​អុជអាល​របស់​លោក និង​អាច​វាយបក​វិញ​ដោយ​ប្រើ​ស្ទីល​ប្រយុទ្ធ​តាម​ចរិត​ធម្មតា​របស់​លោក៕