លោក Derek Chauvin អតីតមន្ត្រីប៉ូលិសប្រចាំទីក្រុង Minneapolis រដ្ឋ Minnesota ត្រូវបានចោទប្រកាន់ទាក់ទិននឹងការស្លាប់របស់លោក George Floyd។ ការចោទប្រកាន់នេះបានធ្វើឡើង ៤ ថ្ងៃក្រោយមក បន្ទាប់ពីហេតុការណ៍នេះបានកើតឡើងកាលពីថ្ងៃទី ២៥ ខែឧសភា និងបន្ទាប់ពីមានការតវ៉ាហិង្សាកើតឡើងជាច្រើនថ្ងៃនៅក្នុងទីក្រុងនេះ។
កាលពីថ្ងៃសុក្រ លោក Mike Freeman មេធាវីប្រចាំសង្កាត់ Hennepin បានចោទប្រកាន់លោក Chauvin អាយុ ៤៤ ឆ្នាំ ពីបទឃាតកម្មកម្រិតទី ៣ និងបទមនុស្សឃាតកម្រិតទី ២។ លោក Chauvin ត្រូវបានចោទប្រកាន់ថាបានសង្កត់ជង្គង់លើករបស់លោក Floyd អស់រយៈពេលជិត ៩ នាទី។
ខាងក្រោមនេះជានិយមន័យនៃបទចោទប្រកាន់ខាងលើ៖
ឃាតកម្មកម្រិតទី៣៖ យោងតាមច្បាប់របស់រដ្ឋ Minnesota ជនណាដែលបង្កឲ្យមានការស្លាប់ជីវិតមនុស្ស «តាមរយៈការប្រព្រឹត្តិអំពើដែលមានគ្រោះថ្នាក់ខ្លាំងដល់អ្នកដទៃ និងបង្ហាញពីគំនិតមិនសមរម្យដោយមិនគិតពីជីវិតមនុស្ស គឺមានទោសពីបទឃាតកម្មកម្រិតទី៣»។
ជនដែលមានទោសត្រូវប្រឈមនឹងការជាប់ពន្ធនាគារមិនលើសពី ២៥ ឆ្នាំ ឬពិន័យជាប្រាក់មិនលើសពី ៤ ម៉ឺនដុល្លារ ឬក៏ទាំងពីរ។
មនុស្សឃាតកម្រិតទី ២៖ យោងតាមច្បាប់របស់រដ្ឋ Minnesota ជនណាដែល «បង្កើតហានិភ័យណាមួយដោយមិនសមហេតុផល និងយកឱកាសនោះបង្កឲ្យមានការស្លាប់ ឬក៏របួសលើរាងកាយធ្ងន់ធ្ងរដោយចេតនា» គឺត្រូវមានទោសពីបទមនុស្សឃាតកម្រិតទី ២។
ជនដែលមានទោសអាចប្រឈមនឹងការជាប់ពន្ធនាគារមិនលើសពី ១០ ឆ្នាំ ឬពិន័យជាប្រាក់មិនលើសពី ២ ម៉ឺនដុល្លារ ឬក៏ទាំងពីរ។
លោក Freeman រដ្ឋអាជ្ញាប្រចាំសង្កាត់ Hennepin បាននិយាយកាលពីថ្ងៃសុក្រថា ការចោទប្រកាន់ផ្សេងទៀតទំនងជាត្រូវធ្វើឡើងប្រឆាំងនឹងមន្ត្រីប៉ូលិស ៣ រូបផ្សេងទៀត ដែលត្រូវបានគេចោទថាបានពាក់ព័ន្ធក្នុងការស្លាប់របស់លោក Floyd ប៉ុន្តែលោកបដិសេធមិនបញ្ជាក់ពីបទចោទទាំងនោះ។
មន្ត្រីប៉ូលិស ៣ រូបផ្សេងទៀត ដែលមានវត្តមាននៅកន្លែងកើតហេតុនៃការស្លាប់របស់លោក Floyd គឺលោក Tou Thao អាយុ ៣៤ ឆ្នាំ លោក J. Alexander Kueng អាយុ ២៦ ឆ្នាំ និងលោក Thomas K. Lane អាយុ ៣៧ ឆ្នាំ។ អ្នកទាំង ៣ និងលោក Chauvin ត្រូវបាននាយកដ្ឋានប៉ូលិសប្រចាំទីក្រុង Minneapolis បញ្ឈប់ពីការងារកាលពីថ្ងៃអង្គារ៕
