សហរដ្ឋអាមេរិកព្រមានប្រទេសរុស្ស៊ីថាសហរដ្ឋអាមេរិក និងសម្ព័ន្ធមិត្តរបស់ខ្លួននឹងឆ្លើយតបយ៉ាងខ្លាំងក្លានិងមិនងាករេប្រសិនបើរុស្ស៊ីចាត់វិធានការយោធាគឃ្លើនលើប្រទេសអ៊ុយក្រែនថែមទៀតក៏ប៉ុន្តែសង្ឃឹមថារដ្ឋាភិបាលក្រុងម៉ូស្គូនឹងស្វែងរកដំណោះស្រាយការទូតដើម្បីដោះស្រាយវិបត្តិ។ នេះជាសម្តីរបស់លោករដ្ឋមន្ត្រីការបរទេសសហរដ្ឋអាមេរិកAntony Blinken នៅក្នុងបទសម្ភាសន៍ផ្តាច់មុខមួយជាមួយអ្នកស្រី Myroslava Gongadze នាយិកាការិយាល័យអឺរ៉ុបខាងកើតរបស់VOAកាលពីថ្ងៃពុធនៅក្នុងរដ្ឋធានីកៀវប្រទេសអ៊ុយក្រែន។
លោកBlinkenបានបន្ថែមថា៖ «យើងបានផ្ដល់ឲ្យរុស្ស៊ីនូវជម្រើសច្បាស់លាស់មួយ គឺរវាងដំណោះស្រាយតាមរយៈកិច្ចសន្ទនានិងការទូតនិងការប្រឈមមុខដាក់គ្នាហើយនឹងផលវិបាកនានា»។
នៅក្នុងសន្និសីទសារព័ត៌មានរួមគ្នាជាមួយលោករដ្ឋមន្ត្រីការបរទេសអ៊ុយក្រែន Dmytro Kuleba លោក Blinken បានថ្លែងថា៖ «រុស្ស៊ីបានបង្កើនការគំរាមកំហែងរបស់ខ្លួននិងបានដាក់ទ័ពជិត១សែននាក់នៅតាមបណ្តោយទល់ដែនអ៊ុយក្រែនដែលរុស្ស៊ីបានបង្កើនទ្វេដងយ៉ាងឆាប់រហ័ស»។ លោក Blinkenបានបន្ថែមទៀតថា«ការបញ្ជូនជំនួយឧបករណ៍របស់សហរដ្ឋអាមេរិកទៅកាន់ប្រទេសអ៊ុយក្រែនកំពុងតែធ្វើឡើងជាបន្តហើយនឹងមានការគ្រោងបញ្ជូនថែមទៀតនៅក្នុងអំឡុងពេលប៉ុន្មានសប្តាហ៍ខាងមុខ»។
លោក Blinken បានថ្លែងថា៖ «បើសិនជារុស្ស៊ីធ្វើតាមគោលបំណងយ៉ាងគឃ្លើនណាមួយនោះហើយបន្តអំពើគឃ្លើនរបស់ខ្លួនហើយឈ្លានពានប្រទេសអ៊ុយក្រែននោះយើងនឹងផ្តល់ឧបករណ៍បន្ថែមពីលើអ្វីដែលបានគ្រោងទុករួចហើយនោះ»។
លោករដ្ឋមន្ត្រីការបរទេសអ៊ុយក្រែនDmytro Kuleba បានថ្លែងថាប្រទេសអ៊ុយក្រែនដែលរឹងមាំជាឧបករណ៍ល្អប្រសើរជាទីបំផុតដើម្បីរារាំងរុស្ស៊ី។ លោកបានបន្ថែមថាវាជារឿងសំខាន់ចាំបាច់ដើម្បីប្រាប់រុស្ស៊ី«ជារៀងរាល់ថ្ងៃ»ថារុស្ស៊ីនឹងប្រឈមជាមួយ«ការដាក់ទណ្ឌកម្មយ៉ាងធ្ងន់ធ្ងរ»បើសិនជារដ្ឋាភិបាលក្រុងម៉ូស្គូសម្រេចប្រព្រឹត្តអំពើគឃ្លើនដាក់ប្រទេសជិតខាងរបស់ខ្លួនថែមទៀតនោះ។
មន្ត្រីជាន់ខ្ពស់ម្នាក់នៃក្រសួងការបរទេសសហរដ្ឋអាមេរិកបានប្រាប់អ្នកសារព័ត៌មានកាលពីថ្ងៃពុធថាកាលពីខែមុនសេតវិមានបានអនុម័តលើជំនួយសម្រាប់ការពារសន្តិសុខចំនួន២០០លានដុល្លារថែមទៀតសម្រាប់ប្រទេសអ៊ុយក្រែន។
លោកប្រធានាធិបតីអ៊ុយក្រែនVolodymyr Zelenskiyបានសរសេរនៅលើបណ្តាញទាក់ទងសង្គម Twitterថាអ៊ុយក្រែន«ដឹងគុណចំពោះការគាំទ្ររបស់សហរដ្ឋអាមេរិកក្នុងវិស័យនយោបាយនិងសន្តិសុខ។ ពឹងផ្អែកលើការពង្រឹងកិច្ចសហប្រតិបត្តិការក្នុងវិស័យសេដ្ឋកិច្ចនិងហិរញ្ញវត្ថុ។ ខ្ញុំជឿជាក់ថាគ្មានការសម្រេចណាមួយអំពីប្រទេសអ៊ុយក្រែនដោយគ្មានអ៊ុយក្រែនទេ»។
កាលពីថ្ងៃពុធលោក Blinken បានបញ្ជាក់ឡើងវិញនូវការគាំទ្ររបស់សហរដ្ឋអាមេរិកចំពោះអធិបតេយ្យភាពនិងបូរណភាពដែនដីរបស់អ៊ុយក្រែននៅក្នុងកិច្ចប្រជុំមួយជាមួយលោក Zelenskiy។ លោក Blinkenបានបន្ថែមថា៖ «ស្រេចតែពលរដ្ឋអ៊ុយក្រែន ហើយគ្មាននរណាក្រៅពីពលរដ្ឋអ៊ុយក្រែនទេដែលអាចសម្រេចអំពីអនាគតរបស់ខ្លួននិងអនាគតរបស់ប្រទេសនេះ»។
លោក Blinken បានបញ្ជាក់ឡើងវិញថាការស្វែងរកដំណោះស្រាយការទូតជា«ការចង់បានយ៉ាងច្បាស់លាស់មួយ»ទាក់ទិននឹងការគំរាមកំហែងរបស់រុស្ស៊ីហើយថាដំណោះស្រាយការទូតជាវិធីមួយដើម្បីបន្ធូរភាពតានតឹងនៅតាមបណ្តោយព្រំដែនរុស្ស៊ីនិងអ៊ុយក្រែន។
ការបង្កើនទ័ពរុស្ស៊ីនៅតាមបណ្តាយព្រំដែនភាគខាងកើតនៃប្រទេសអ៊ុយក្រែននាំឲ្យមានការបារម្ភថារដ្ឋាភិបាលក្រុងម៉ូស្គូកំពុងរៀបចំផែនការយោធាលើប្រទេសជិតខាងរបស់ខ្លួនដែលពីមុនជាផ្នែកមួយនៃអតីតសហភាពសូវៀតដែលដឹកនាំដោយរុស្ស៊ីនោះ។ ប្រទេសរុស្ស៊ីបានដណ្តើមកាន់កាប់ឧបទ្វីបCrimea ពីប្រទេសអ៊ុយក្រែនកាលពីឆ្នាំ ២០១៤។
រុស្ស៊ីបានបន្តបង្កើនទ័ពរបស់ខ្លួននិងបង្កើនពាក្យសម្តីធ្ងន់ធ្ងរដាក់ប្រទេសអ៊ុយក្រែនហើយបានបញ្ជូនកងកម្លាំងរុស្ស៊ីចូលក្នុងប្រទេសBelarus កាលពីចុងសប្តាហ៍មុន។ រុស្ស៊ីបានទាមទារឲ្យមានការធានាថា អ៊ុយក្រែននឹងមិនចូលជាសមាជិកនៃអង្គការអូតង់ជាដាច់ខាត។
មន្ត្រីជាន់ខ្ពស់ម្នាក់នៃក្រសួងការបរទេសសហរដ្ឋអាមេរិកបានថ្លែងប្រាប់អ្នកសារព័ត៌មានក្នុងអំឡុងសន្និសីទសារព័ត៌មានតាមទូរស័ព្ទមួយកាលពីថ្ងៃអង្គារថា៖ «យើងកំពុងស្ថិតក្នុងដំណាក់កាលមួយ ដែលរុស្ស៊ីអាចវាយប្រហារអ៊ុយក្រែននៅពេលណាមួយក៏បាន»។
ទស្សនកិច្ចរបស់លោក Blinken កាលពីថ្ងៃពុធទៅកាន់ប្រទេសអ៊ុយក្រែនជាការសំចតទីមួយក្នុងទស្សនកិច្ចដែលរៀបចំឡើងយ៉ាងប្រញ៉ាប់ប្រញ៉ាល់ដែលនឹងនាំលោកទៅកាន់ទីក្រុងប៊ែរឡាំង ប្រទេសអាល្លឺម៉ង់ផងដែរ។ នៅថ្ងៃព្រហស្បតិ៍លោកនឹងជួបជាមួយលោកស្រីរដ្ឋមន្ត្រីការបរទេសអាល្លឺម៉ង់Annalena Baerbock«ដើម្បីពិភាក្សាអំពីការពិភាក្សាខាងផ្លូវការទូតកាលពីពេលថ្មីៗជាមួយប្រទេសរុស្ស៊ីនិងអំពីកិច្ចប្រឹងប្រែងរួមដើម្បីរារាំងកុំឲ្យមានអំពើគឃ្លើនរបស់រុស្ស៊ីលើប្រទេសអ៊ុយក្រែនថែមទៀត។នេះបើតាមការឲ្យដឹងរបស់ក្រសួងការបរទេសសហរដ្ឋអាមេរិក។
លោក Blinken បន្ទាប់មកគ្រោងនឹងអំពាវនាវឲ្យរុស្ស៊ី «ចាត់វិធានការផ្សេងៗជាបន្ទាន់ដើម្បីកាត់បន្ថយភាពតានតឹង»នៅតាមបណ្តោយព្រំដែនអ៊ុយក្រែននៅពេលលោកជួបជាមួយលោករដ្ឋមន្ត្រីការបរទេសរុស្ស៊ីSergey Lavrovនៅក្នុងទីក្រុងហ្សឺណែវប្រទេសស្វីស នៅថ្ងៃសុក្រ៕
ប្រែសម្រួលដោយ លោក ប៉ូច រាស៊ី
