ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

លោក Blinken បំពេញ​ទស្សនកិច្ច​នៅ​អ៊ុយក្រែន​ស្របពេល​លោក​ជំរុញ​ឲ្យ​រុស្ស៊ី​បន្ថយ​ភាព​តានតឹង​នៅ​ព្រំដែន


លោក Antony Blinken រដ្ឋមន្ត្រី​ការបរទេស​សហរដ្ឋ​អាមេរិក ឡើង​ថ្លែង​សុន្ទរកថា ខណៈ​ដែល​លោក​ជួប​ជាមួយ​នឹង​មន្ត្រី​ស្ថានភាព​អាមេរិក​ក្នុង​ទីក្រុង​កៀវ ប្រទេស​អ៊ុយក្រែន ថ្ងៃទី១៩ ខែមករា ឆ្នាំ២០២២។ (Alex Brandon/Pool via REUTERS)

រដ្ឋមន្ត្រី​ការបរទេស​សហរដ្ឋ​អាមេរិក​លោក Antony Blinken កំពុង​ស្ថិត​នៅ​រដ្ឋធានី​កៀវដើម្បី​ពិភាក្សា​នៅ​ថ្ងៃ​ពុធ​នេះ​ជាមួយ​ពួក​មេដឹកនាំ​អ៊ុយក្រែន​ដែល​ជា​ផ្នែក​មួយ​នៃ​អ្វី​ដែល​លោក​ហៅ​ថា​ជា «កិច្ច​ប្រឹងប្រែង​ខាង​ការទូត​ដើម្បី​កាត់​បន្ថយ​ភាពតានតឹង​ជុំវិញ​ការដាក់​ពង្រាយ​កងទ័ព​របស់​រុស្ស៊ី​នៅ​តាម​បណ្តោយ​ព្រំដែន​ប្រទេស​អ៊ុយក្រែន»។

នៅ​ក្នុង​ទស្សនកិច្ច​ទៅកាន់​រដ្ឋធានី​កៀវ​នេះ លោក Blinken នឹង​ជួប​ប្រធានាធិបតី​អ៊ុយក្រែន​លោក Volodymyr Zelenskiy និង​លោក​រដ្ឋមន្ត្រី​ការបរទេស Dmytro Kuleba ហើយ​នឹង​ទៅ​ជួប​បុគ្គលិក​នៅឯ​ស្ថានទូត​សហរដ្ឋ​អាមេរិក​ផងដែរ។

«យើង​ឥឡូវនេះ​កំពុង​ស្ថិត​ក្នុង​ដំណាក់ការ​មួយ​ដែល​រុស្ស៊ី​អាច​ចាប់ផ្តើម​វាយ​ប្រហារ​ទៅលើ​ប្រទេស​អ៊ុយក្រែន»។ នេះ​បើ​តាម​មន្ត្រី​ជាន់​ខ្ពស់​ក្រសួង​ការបរទេស​ម្នាក់​បាន​ប្រាប់​ពួក​អ្នក​យកព័ត៌មាន​ក្នុង​អំឡុង​សន្និសីទ​តាម​ទូរស័ព្ទ​កាលពី​ថ្ងៃ​អង្គារ។ មន្ត្រី​ជាន់​ខ្ពស់​រូប​នោះ​បាន​បន្ថែម​ទៀត​ថា សហរដ្ឋ​អាមេរិក​បន្ត«ត្រៀមខ្លួន» ប្រសិន​បើ​រដ្ឋាភិបាល​ក្រុង​មូស្គូ​សម្រេច​ចាត់​វិធានការ​យោធា​ប្រឆាំង​នឹង​អ៊ុយក្រែន​ថែមទៀត»។

​រុស្ស៊ី​បាន​បង្កើន​កងទ័ព​របស់​ខ្លួន​ជា​បន្ត ហើយ​នឹង​បន្ត​ការ​ប្រើ​វោហារសាស្ត្រ​ដ៏​ខ្លាំងប្រឆាំង​នឹង​អ៊ុយក្រែន ព្រមទាំង​ចល័ត​កងទ័ព​ចូល​ក្នុង​ប្រទេស​បេឡារុស​កាលពី​ចុង​សប្តាហ៍​ផង​ដែរ។

មន្ត្រី​ជាន់​ខ្ពស់​ក្រសួង​ការបរទេស​រូប​នោះ​បាន​និយាយ​ទៀត​ថា៖ «វិស័យ​ការទូត​មិនទាន់​ទាល់ច្រក​ទេ។ ភាគី​សហរដ្ឋ​អាមេរិក​ជឿ​ថា មធ្យោបាយ​តែ​មួយ​គត់​ដើម្បី​ដោះស្រាយ​ជម្លោះ​នេះ​ដោយ​ជោគជ័យ​គឺ​តាមរយៈ​ការទូត»។

ទស្សនកិច្ច​ទៅ​កាន់​ប្រទេស​អ៊ុយក្រែននៅ​ថ្ងៃ​ពុធ​នេះ​ ជា​ការ​សំចត​ដំបូង​ក្នុង​ដំណើរ​ទស្សនកិច្ច​មួយ​ដែល​រៀបចំ​ឡើង​យ៉ាង​ឆាប់​រហ័ស។ ​នៅ​ថ្ងៃ​ព្រហស្បតិ៍ លោក Blinken ​នឹង​បន្ត​ដំណើរ​ទៅ​កាន់​រដ្ឋធានី​ប៊ែរឡាំង​ដើម្បី​ជួប​ជាមួយ​រដ្ឋមន្ត្រី​ការបរទេស​អាល្លឺម៉ង់​លោក​ស្រី Annalena Baerbock ដើម្បី«ពិភាក្សា​ការ​ទាក់ទង​ខាង​ការទូត​កាលពី​ពេល​ថ្មីៗ​ជាមួយ​រុស្ស៊ី​ ហើយ​នឹង​ការខំប្រឹង​ប្រែង​រួម​ដើម្បី​បង្អាក់​ការបន្ត​ភាពគឃ្លើន​របស់​រុស្ស៊ី​ប្រឆាំង​នឹង​អ៊ុយក្រែន»។

បន្ទាប់មក លោក Blinken នឹង​ជំរុញ​ឲ្យ​រុស្ស៊ី«ចាត់វិធានការ​ជាបន្ទាន់​ដើម្បី​បន្ថយ​ភាពតានតឹង» នៅ​តាម​បណ្តោយ​ព្រំដែន​នៅពេល​លោក​ជួប​ជាមួយ​រដ្ឋមន្ត្រី​ការបរទេស​រុស្ស៊ី លោក Sergey Lavrov នៅទីក្រុង​ហ្សឺណែវ​នៅ​ថ្ងៃ​សុក្រ៕


ព័ត៌មាន​មួយ​ចំនួន​នៅក្នុង​សេចក្ដីរាយការណ៍នេះ ត្រូវបាន​ដកស្រង់​ពីទីភ្នាក់ងារ​ព័ត៌មាន The Associated Press។

XS
SM
MD
LG