ភ្ជាប់​ទៅ​គេហទំព័រ​ទាក់ទង

អ្នក​ឃុំ​វិហារសួគ៌​ប្រារព្ធ​ពិធី​ប្រណាំង​សេះ​បំបោល​ក្របី​ដោយ​ជំនឿ​​ថា​ប្រពៃណី​នឹង​បន្ត


ការ​បំបោល​ក្របី​នៅ​ថ្ងៃ​បុណ្យ​ភ្ជុំ​ធំ​ រៀប​ចំឡើង​កាលពី​ថ្ងៃ​ទី​០១​ ខែ​តុលា​ នៅ​ក្នុង​ឃុំ​វិហារ​សួគ៌​ ខេត្ត​​កណ្តាល។

ពលរដ្ឋ​រស់​នៅ​ក្នុង​ឃុំ​វិហារ​សួគ៌​ នៅ​តែ​មាន​ជំនឿ​ខ្លាំង​លើ​បារមី​វត្ត​ព្រះវិហារ​សួគ៌​ ដែល​ពួក​គេ​ជឿ​ថា​ វត្ត​នេះ​អាច​ផ្តល់​ភាព​សុខសាន្ត​ដល់​ជីវិត​រស់​នៅ​ប្រចាំ​ថ្ងៃ​របស់​ពួក​គេ។​ ដើម្បី​ឧទ្ទិស​ដល់​បារមី​ខ្លាំង​ពូកែ​នេះ​ ការ​រៀបចំ​ពីធី​ប្រណាំងសេះ​បំបោល​ក្របី​ និង​បោក​ចំបាប់​ ត្រូវ​បាន​អាជ្ញាធរ​ឃុំ​វិហារ​សួគ៌​រៀប​ចំ​ឡើង​ជា​រៀង​រាល់​ឆ្នាំ​ ហើយ​ពិធី​នេះ​បាន​ទាក់​ទាញ​ភ្ញៀវ​ជាតិ​ និង​អន្តរជាតិ​រាប់​រយ​នាក់​មក​​តាម​ដាន​ទស្សនា​ផង​ដែរ។

នៅ​ខាង​មុខ​ក្លោង​ទ្វារនៃ​វត្ត​ព្រះវិហារ​សួគ៌​ ដែល​មាន​សភាព​ស្ងប់ស្ងាត់​នា​ថ្ងៃ​ធម្មតា​ បាន​ប្រែ​ទៅ​ជា​មាន​សភាព​អ៊ូអរ​ នា​ថ្ងៃ​បុណ្យ​ភ្ជុំ​ធំ​ដោយ​មាន​មនុស្ស​មា្ន​ជាច្រើន​ឈរ​អម​ពី​មុខ​ច្រក​ទ្វារ​ចូល​ទៅ​ក្នុង​វត្ត​ ដែល​ចាស់ៗ​រស់នៅ នៅ​ឃុំ​វិហារ​សួគ៌​ជឿ​ថា​ នៅ​មាន​ព្រះ​បារមី​ខ្លាំង​ពូកែ​ អាច​ការពារ​សេចក្តី​សុខ​ប្រជា​ពល​រដ្ឋ​បាន។

​សភាព​អ៊ូអរ​នេះ តែងតែ​បាន​កើត​ឡើង​ នា​ពេល​ដែល​អាជ្ញាធរ​ឃុំ​វិហារ​សួគ៌​ ស្រុក​ខ្សាច់​កណ្តាល​រៀបចំ​ការ​ប្រណាំង​សេះ និង​បំបោល​ក្របី និង​ការ​ប្រកួត​បោក​ចំបាប់​ ដើម្បី​ឧទ្ទិស​ដល់​បារមី​នៃ​វត្ត​ព្រះ​វិហារ​សួគ៌។

ការ​ប្រកួត​បោក​ចំបាប់​ ​នៅ​ក្នុង​ឃុំវិហារ​សួគ៌​ នា​ឱកាស​បុណ្យ​ភ្ជុំបិណ្ឌ​ រៀបចំ​ឡើង​កាល​ពី​ថ្ងៃ​ទី០១​ ខែ​តុលា ឆ្នាំ២០១៦។
ការ​ប្រកួត​បោក​ចំបាប់​ ​នៅ​ក្នុង​ឃុំវិហារ​សួគ៌​ នា​ឱកាស​បុណ្យ​ភ្ជុំបិណ្ឌ​ រៀបចំ​ឡើង​កាល​ពី​ថ្ងៃ​ទី០១​ ខែ​តុលា ឆ្នាំ២០១៦។

មេឃុំ​វិហារសួគ៌​ ​លោក ម៉េង ជាងហេង បាន​ថ្លែង​នៅ​លើ​វេទិកា​រៀប​ចំ​កាល​ពី​ថ្ងៃ​សៅរិ៍​សប្តាហ៍​មុន​ ក្នុង​ឃុំ​វិហារ​សួគ៌​ ​នៅ​មុន​ការ​ចាប់​ផ្តើម​នៃ​ការ​ប្រកួត​បោក​ចំបាប់​ បន្ទាប់​ពី​ការ​ប្រណាំង​សេះ​ និង​បំបោល​ក្របី​យ៉ាង​ដូច្នេះ​ថា៖

«ការណ៍​ដែល​បំបោល​ក្របី​នេះ​ គឺ​ដើម្បី​យក​មក​បង្ហាញ​ ​បង្ហាញ​ជូន​ដល់​បារមី​វត្ត​ព្រះ​វិហារ​សួគ៌​ថា​ យើង​មាន​កម្លាំង​ពលំ​ទាំង​អស់​គ្នា​មាំមួន​បាទ​ ទាំង​អស់​គ្នា​ឲ្យ​បាន​សុខ​ ឲ្យ​សត្វ​ទាំង​អស់​ហ្នឹង​មាន​សុខភាព​ល្អ​ ឲ្យ​មនុស្ស​អ្នក​បោល​ហ្នឹង​ឲ្យ​មាន​សុខភាព​ល្អ​ ដូច្នេះ​បារមី​វិហារសួគ៌​នេះ​នឹង​ជួយ​យើង»។

​លោក​មេឃុំ​ថ្លែង​ប្រាប់​ VOA​ បន្ថែម​តាម​ទូរស័ព្ទ​ថា​ លោក​នៅ​មាន​ជំនឿ​ថា​ វត្ត​ព្រះ​វិហារសួគ៌​ ជា​ទី​ដែល​បារមី​គង់​នៅ​សម្រាប់​ថែរក្សា​ការពារ​ប្រជាពលរដ្ឋ​រស់​នៅ​ក្នុង​ឃុំ​ឲ្យ​រួច​ផុត​ពី​ឧបទ្រព​ចង្រៃ ​គ្រោះ​ថ្នាក់​ និង​ជំងឺ​ជាដើម។

លោក​មេឃុំថ្លែង​បន្ត​ថា​ នៅ​គ្រា​ដែល​វិទ្យាសាស្ត្រ​រីក​ចម្រើន​ ពលរដ្ឋ​ខ្លះ​ក៏​នៅ​បន្ត​ជឿ​លើ​បារមី​របស់​វត្ត​ព្រះ​វិហារសួគ៌​ រីឯ​អ្នក​ខ្លះ​ទៀត​ក៏​ពុំ​មាន​ជំនឿ។​ ក៏​ប៉ុន្តែ​សម្រាប់​រូបលោក​ ដែល​មាន​វ័យ​៦៧ឆ្នាំ​ និង​បាន​កាន់​ការងារ​ជា​មេ​ឃុំ​ជិត​២០​ឆ្នាំ​ ក្នុង​ឃុំ​វិហារ​សួគ៌​ ​បាន​មាន​ប្រសាសន៍​ប្រាប់ VOA ថា​ លោក​នៅ​តែ​ជឿជាក់​លើ​បារមី​ព្រះ​អង្គ​នៃ​វត្ត​ព្រះវិហារ​សួគ៌​ជានិច្ច។​

«ខ្ញុំ​ទៅ​សុំ​អី​ ប៉ុន្តែ​ថា​ បាន​ហើយ​ កុំ​ឲ្យ​ថា​យើង​សុំ​ជា​លុយ​កាក់​ បើ​សុំ​ជា​សេចក្តី​សុខ​ សុខ​ទុក្ខ​សុខ​សប្បាយ​ ក្នុង​ភូមិ​ឃុំ​ ដើរ​បែរ​បន់​ សព្វ​គ្រប់​អញ្ចឹង​ កុំ​ឲ្យ​មាន​មនុស្ស​ស្លាប់​នៅ​លើ​ថ្នល់ នៅ​លើ​ផ្លូវ​ជាតិ​ ក្នុង​ឃុំ​វិហារសួគ៌​អី​ហ្នឹង​ បាទ​ បែបន់​ចុះ​មួយ​ឆ្នាំ​ ខ្ញុំ​ទៅ​កោរ​សក់​ម្តង»។

អាជ្ញាធរ​ឃុំ​វិហារសួគ៌​បាន​រៀប​ចំ​ពិធី​បុណ្យ​ប្រណាំង​សេះ​បំបោល​ក្របី​ និង​កីឡា​ចំបាប់​នេះ​ ​ទៅ​តាម​ទំនៀម​ទម្លាប់​ជា​រៀង​រាល់​ឆ្នាំ ​តែ​ពិធី​នេះ​ក៏​ធ្លាប់​អាក់​ខាន​ផង​ដែរ​ នៅ​ក្នុង​សម័យ​ខ្មែរ​ក្រហម​ ​ដែល​បាន​លុប​បំបាត់​ចោល​ទាំង​ស្រុង​នូវ​ជំនឿ​សាសនា​ ដោយ​សារ​របប​នោះ​ជារបប​ពឹងផ្អែក​យ៉ាង​ងប់ងុល​លើ​មនោគមវិជ្ជា​នយោបាយ​កុម្មុយនិស្ត។​

ត្បិត​ថា​ ពិធី​បុណ្យ​នៅ​បន្ត​ធ្វើ​រហូត​ចាប់​ពី​ការ​ដួល​រលំ​របប​ខ្មែរ​ក្រហម​ ឬ​ ប៉ុល​ ពត​ មក​ទល់​ពេល​បច្ចុប្បន្ន​នេះ ​ពិធី​បុណ្យ​ក៏​មាន​ការ​ប្រែប្រួល​ផង​ដែរ ​គឺ​នៅ​គ្រា​ដែល​ប្រជា​ពលរដ្ឋ​មួយ​ចំនួន​ក្នុង​ឃុំ​វិហារសួគ៌ ​ផ្តើម​មាន​ជីវភាព​ធូរធារ ​ដោយ​ការ​លក់​ដោះដូរ​ដីធ្លី​ទៅ​ឲ្យ​ក្រុមហ៊ុន​ឯកជន​ និង​ការ​បន្ថយ​ការ​ពឹង​ផ្អែក​លើ​សត្វ​ពាហនៈ​ក្នុង​កិច្ច​ការ​កសិកម្ម។

ការ​ប្រែប្រួល​នោះ​ គឺ​ចំនួន​សត្វ​ក្របី​ដែល​ចូលរួម​ក្នុង​ការ​ប្រណាំង​បំបោល​ ដោយ​ឆ្នាំ​នេះ​ គឺ​មាន​សត្វ​ក្របី​តែ​៥​គូ​ប៉ុណ្ណោះ​ ចូលរួម​ក្នុង​ការ​ប្រណាំង​ បើ​ធៀប​នឹង​ឆ្នំា​មុនៗ​ ដែល​មាន​មិន​តិច​ជាង​១៥​គូ។

លោក​មេឃុំ​វិហារ​សួគ៌​ ម៉េង​ ជាង​ហេង​ ថ្លែង​ទៅ​កាន់​អ្នក​ចូលរួម​ការ​ប្រកួត​បោក​ចំបាប់​ក្នុង​ឃុំ​វិហារ​សួគ៌​ ​នា​ថ្ងៃ​ទី​០១​ ខែ​តុលា។
លោក​មេឃុំ​វិហារ​សួគ៌​ ម៉េង​ ជាង​ហេង​ ថ្លែង​ទៅ​កាន់​អ្នក​ចូលរួម​ការ​ប្រកួត​បោក​ចំបាប់​ក្នុង​ឃុំ​វិហារ​សួគ៌​ ​នា​ថ្ងៃ​ទី​០១​ ខែ​តុលា។

លោក​មេឃុំ​ ម៉េង​ ជាងហេង មាន​ប្រសាសន៍​ថា៖​

«សព្វ​ថ្ងៃ​ហ្នឹង​ ប្រជាពលរដ្ឋ​គាត់​ ដូច​ថា ​ការ​ចិញ្ចឹម​សត្វ​ហ្នឹង​បាទ ​ឲ្យ​ប្រទេស​ជាតិ​យើង​អភិវឌ្ឍ ​ដី​គាត់​លក់​ឲ្យ​ទៅ​ក្រុម​ហ៊ុន​ 7NG ដែល​បាន​មក​អភិវឌ្ឍ​ហ្នឹង​ ក៏​គាត់​ចេះ​ធ្លាក់​ថយ​ចុះ​ក្នុង​ការ​ចិញ្ចឹម​សត្វ​ហ្នឹង»។

ពិធី​បុណ្យ​ប្រណាំង​សេះ​បំបោល​ក្របី និង​បោក​ចំបាប់ ដែល​បាន​ធ្វើ​ឡើង​កាលពី​ថ្ងៃ​សៅរិ៍​កន្លងទៅ​ នៅ​ក្នុង​ឃុំ​វិហារ​សួគ៌​ ​បាន​ចាប់​ផ្តើម​ឡើង​តាំង​ព្រឹក​ព្រហាម​រហូត​ដល់​ពេល​ថ្ងៃ​ត្រង់។

​ដោយ​មាន​សេះ​ប្រណាំង​ប្រមាណ​ជា​១៥​គូ​ និង​ក្របី​៥គូ​ និង​អ្នក​ប្រកួត​ចំបាប់​ច្រើន​ជាង​២០គូ​ ពិធី​បុណ្យ​បាន​ប្រព្រឹត្ត​ទៅ​ ក្នុង​បរិយាកាស​រីករាយ​ និង​មានការ​ចូលរួម​ពី​មន្ត្រី​រដ្ឋាភិបាល​មួយ​ចំនួន​ផង​ដែរ។

​ទោះ​ណា​ជា​មាន​ការ​ប្រែប្រួល​មួយ​ចំនួន​នៅ​ក្នុង​ការ​ប្រារព្ធ​ពិធីបុណ្យ​ប្រណាំង​សេះ​បំបោល​ក្របី​នេះ​ក្តី​ ប្រជារាស្ត្រ​ខ្មែរ​រស់​នៅ​ក្នុង​ឃុំ​វិហារសួគ៌​ រួម​ទាំង​លោក​មេឃុំ​ ម៉េង​ ជាង​ហេង​ លើក​ឡើង​ថា ​ការ​រៀប​ចំ​បុណ្យ​នេះ​ នឹង​ត្រូវ​តែ​បន្ត​ធ្វើ​ទៅ​ឆ្នាំ​ក្រោយៗ​ទៀត​ ដើម្បី​រក្សា​កេរដំណែល​វប្បធម៌​ ដែល​មាន​ជា​យូរ​លង់​ណាស់​មក​ហើយ​ក្នុង​ទឹកដី​ឃុំ​វិហារសួគ៌​ និង​ដើម្បី​ឲ្យ​ភូមិ​ឃុំ​មាន​ក្តី​សុខ។​

អ្នក​ប្រណាំង​សេះ​ត្រៀម​ចូលរួម​ប្រណាំង​នៅ​មុខ​វត្តព្រះ​វិហារសួគ៌​ នាថ្ងៃ​ទី​០១ ខែ​តុលា ឆ្នាំ២០១៦។
អ្នក​ប្រណាំង​សេះ​ត្រៀម​ចូលរួម​ប្រណាំង​នៅ​មុខ​វត្តព្រះ​វិហារសួគ៌​ នាថ្ងៃ​ទី​០១ ខែ​តុលា ឆ្នាំ២០១៦។

លោក ​ផាត​ សុខលី វ័យ​២៥​ ឆ្នាំ​ ប្រាប់​ VOA​ នា​ថ្ងៃ​ធ្វើ​ពិធីបុណ្យ​នោះ​ថា​ លោក​រំពឹង​ថា​ ពិធី​បុណ្យ​បរម​បុរាណ​នេះ​ នឹង​នៅ​តែ​ត្រូវ​បាន​រៀបចំ​ទៅ​ឆ្នាំ​ខាង​មុខ​ទៀត​ ព្រោះ​ពិធី​នេះ​មិន​ត្រឹម​តែ​ផ្តល់​ក្តី​សប្បាយនោះ​ទេ​ តែ​ទាំង​ផ្តល់​នូវ​ក្តី​រុង​រឿង​ដល់​ជីវភាព​រស់​របស់​ប្រជា​រាស្ត្រ​ខ្មែរ​ផង​ដែរ។

«សុខ​សប្បាយ​បង​ រុង​រឿង​វា​ ធ្លាប់​តែ​ប្រណាំង​អញ្ចឹង​បាន​សុខ​សប្បាយ​ណាស់​មួយ​ឆ្នាំ​ ឲ្យ​តែ​ថ្ងៃ​ភ្ជុំ​ដឹង​យើង​ប្រណាំង»។

​លោក​យាយ យឹម​ ណាំ​ ​វ័យ​៧៤​ឆ្នាំ​ អ្នក​រស់​នៅ​ក្នុង​ឃុំ​វិហារ​សួគ៌​ម្នាក់​ទៀត​បា្រប់​ VOA​ ថា​ អ្នក​ឃុំ​វិហារ​សួគ៌​ នឹង​មិន​បោះ​បង់​ការ​រៀបចំ​បុណ្យ​ប្រពៃ​ណី​ប្រចាំ​ឃុំ​នោះ​ទេ​ ដោយ​អ្នក​ឃុំ​យល់​ថា ​ការ​ឈឺថ្កាត់​ នឹង​កើត​មាន​ឡើង​នៅ​ក្នុង​ឃុំ​ បើ​មាន​ការ​អាក់​ខាន​រៀប​ចំ​បុណ្យ​ដ៏​មាន​ប្រជាប្រិយភាព​នេះ។​

«អត់​ឲ្យ​ឈប់​ទេ​ ដឹង​តែ​នៅ​មាន​អញ្ចឹង​ហ្មង»។

ឃុំ​វិហារ​សួគ៌​ ស្ថិត​នៅ​ត្រើយ​ខាង​កើត​ទន្លេ​មេគង្គ​ ក្នុង​ស្រុក​ខ្សាច់​កណ្តាល​ ខេត្ត​កណ្តាល។​ ប្រជាពលរដ្ឋ​ប្រមាណ​ជាង​១៥.០០០​នាក់​ កំពុង​រស់​នៅ​ក្នុង​ឃុំ​នេះ​ ហើយ​ ៧៥​ភាគរយ​ដែល​ជា​មនុស្ស​វ័យ​ជំទង់​អាយុ​១៨​ឆ្នាំ​ បាន​ពឹង​ផ្អែក​លើ​ការងារ​រោងចក្រ។​ រីឯ​ពលរដ្ឋ​ផ្សេង​ទៀត​បាន​ពឹងផ្អែក​លើ​ការងារ​សំណង់​ និង​កសិកម្ម។​

ប្រជាជន​ក្នុង​ឃុំ​នេះ​ ពុំ​សូវ​ធ្វើ​ការចំណាក​ស្រុក​ដើម្បី​ស្វែង​រក​ការងារ​ធ្វើ​នោះ​ឡើយ។​ នេះ​បើ​យោង​ទៅ​តាម​ការ​បញ្ជាក់​ពី​លោក​មេឃុំ​វិហារ​សួគ៌​ ម៉េង​ ជាងហេង៕

XS
SM
MD
LG