ភ្ជាប់​ទៅ​គេហទំព័រ​ទាក់ទង

វៀតណាមផ្លាស់​ប្ដូរ​មធ្យោបាយ ​ក្នុង​ជម្លោះ​ដែន​ទឹក​ជា​មួយ​ប្រទេស​ចិន


អ្នក​តវ់ា​កាន់​ប្រកាសបិទ​ប្រឆាំងប្រទេស​ចិន​ ចំពោះ​សកម្មភាព​ដែល​ពួក​គេ​ថា​ជា​ការ​​​គឃ្លើន​របស់​ចិន ក្នុង​ជម្លោះ​នៅ​សមុទ្រ​ចិន​ខាង​ត្បូង​ នៅ​ជិត​ស្ថានទូត​ចិន​នៅ​ទីក្រុង​ហាណូយ​ នៅ​ថ្ងៃ​ទី​១០​ខែ​កក្កដា។​

ការ​វាយ​បង្រ្កាប​ដោយ​រដ្ឋាភិបាល​វៀតណាម​មក​លើ​ក្រុម​បាតុករ​ប្រឆាំង​ប្រទេស​ចិន​គឺ​ជា​ការ​កត់​សម្គាល់​ការ​ប្រែប្រួល​វិធានការ​ក្នុង​រឿង​ពាក់​ព័ន្ធ​នឹង​ជម្លោះ​ជា​មួយ​រដ្ឋាភិបាល​ទី​ក្រុង​ប៉េកាំង។

ក្រោយ​ពី​បាន​អត់ឱន​ដល់​ការ​តវ៉ា​ប្រចាំ​សប្ដាហ៍​នៅ​មុខ​ស្ថានទូត​ចិន​នៅ​ក្នុង​ទី​ក្រុង​ហាណូយ ​ជាង​មួយ​ខែ​មក​ រដ្ឋាភិបាល​វៀតណាម​បាន​ចាត់​វិធានការ​បញ្ឈប់​មិន​ឲ្យ​មាន​ការ​ដើរ​តវ៉ា។​ នៅ​ថ្ងៃ​អាទិត្យ ប៉ូលិស​បាន​ចាប់​បាតុករ​១២​នាក់​ ហើយ​ឃុំ​ខ្លួន​ជន​ទាំង​នោះ​អស់​រយៈ​ពេល​ច្រើន​ម៉ោង។​ ការ​ចាប់​ខ្លួន​នោះ​ជា​ការ​ចាប់​ផ្ដើម​ដំណាក់​កាល​ថ្មី​ទាក់ទង​នឹង​ជម្លោះ​ជា​មួយ​ចិន​អំពី​ដែន​ទឹក​នៅ​លើ​សមុទ្រ​ចិន​ភាគ​ខាង​ត្បូង។​ ចិន​ទាម​ទារ​កម្ម​សិទ្ធិ​សឹង​តែ​ទាំង​អស់​នៅ​លើ​សមុទ្រ​ តែ​វៀតណាម​និង​ប្រទេស​បួន​ទៀត​ ក៏​បាន​ទាមទារ​កម្ម​សិទ្ធិ​របស់​ខ្លួន​ដែរ​ នៅ​ក្នុង​តំបន់​នោះ​ រាប់​ទាំង​កោះ​ ​Spratly ​ដែល​សម្បូរ​ទៅ​ដោយ​ធាតុរ៉ែ។

ភាព​តានតឹង​បាន​កើន​កម្រិត​ខ្ពស់ ​កាល​ពី​ប៉ុន្មាន​ខែ​ថ្មីៗ​នេះ​ ក្រោយ​ពី​រដ្ឋាភិបាល​ក្រុង​ហាណូយ​ចោទ​ប្រទេស​ជិត​ខាង​ដ៏​ធំនេះ​ថា​ បាន​បំពានមក​លើ​ដែន​ទឹក​របស់​ខ្លួន។​ រដ្ឋាភិបាល​ក្រុង​ប៉េកាំង​និយាយ​ថា​ កប៉ាល់​យួន​បាន​ចូល​មក​ក្នុង​ដែន​ទឹក​របស់​ខ្លួន​ដោយ​ខុស​ច្បាប់ ​ ហើយ​ធ្វើឲ្យ​មាន​គ្រោះ​ថ្នាក់​ដល់​អ្នក​នេសាទ​ចិន។

ភាពតាន​តឹង​បាន​ចុះ​កម្រិត​ ចាប់​តាំង​ពី​ថ្ងៃ​ទី​២៥ ​ខែ​មិថុនា​ នៅ​ពេល​ដែល​អនុ​រដ្ឋ​មន្ដ្រី​ការ​បរទេស​វៀតណាម​ ធ្វើ​ទស្សន​កិច្ច​ក្នុង​ទី​ក្រុង​ប៉េកាំង។ ​ក្រោយ​ពី​ទស្សន​កិច្ច​នោះ​មក​ ភាគី​ទំាង​ពីរ​បាន​និយាយ​សង្កត់​មក​លើ​ភាព​ចាំ​បាច់​ ដើម្បី​“ធ្វើ​ឲ្យ​មតិ​សាធារណជន​យល់​ដឹង​អំពី​ទិស​ដៅ​ត្រឹមត្រូវ ​ដើម្បី ​ចៀស​វាង​ មិន​ធ្វើ​ឲ្យ​ខូច​ដល់​ទំនាក់​ទំនង​រវាង​ប្រទេស​ទាំងពីរ។

Carl ​Thayer​ អ្នក​ជំនាញ​ខាង​កិច្ចការ​អាស៊ី​នៃ​សាកល​វិទ្យាល័យ​New​ South​ Wales ​ប្រទេស​អូស្ត្រាលី​ ថ្លែង​ថា​ ការ​ចាប់​បាតុករ​ កាល​ពី​ថ្ងៃ​អាទិត្យ​សម​ស្រប​តាម​គោល​ការណ៍​នៅ​ក្នុង​សេចក្ដី​ថ្លែង​ការណ៍​របស់​ខ្លួន​នោះ។

«ខ្ញុំ​យល់​ថា​ នៅ​ពេល​ដែល​ប្រេសិត​ពិសេស​ទៅ​ដល់​ប្រទេស​ចិន​ ​ហើយ​ចេញ​ឈ្មោះ​លោក​នៅ​ក្នុង​សេចក្ដី​ប្រកាស​ព័ត៌មាន​រួម​នោះ​ ​វា​ជា​ការ​សមរម្យ​ដែល​វៀតណាម​បញ្ចុះ​ ភាព​តានតឹង​ ហើយ​បញ្ឈប់​មិន​ឲ្យ​មាន​បាតុកម្ម។​ ការ​ចាប់​ខ្លួន​ធ្វើ​ឡើង​ នៅ​ពេល​ក្រោយ​សប្ដាហ៍​ដែល​ប៉ូលិស​ខិតខំ​បំបែក​ហ្វូង​បាតុករ​ ហើយ​ឲ្យ​ជន​ទាំង​នោះ​ទៅ​ផ្ទះ​វិញ»។

លោក ​Thayer​ និយាយ​ថា​ ដោយ​បញ្ឈប់​មិន​ឲ្យ​មាន​បាតុកម្មនេះ​ រដ្ឋាភិបាល​ក្រុង​ហាណូយ​អាច​ប្រាប់​ចិន​ថា ​ខ្លួនបំពេញ​តាម​កិច្ចការ​របស់​ខ្លួន​តាម​កិច្ច​ព្រមព្រៀង​គ្នា​នោះ​ហើយ។ ​តែ​លោក​កត់​សម្គាល់​ថា​ រដ្ឋាភិបាល​ហាណូយ​អាច​បញ្ឈប់​ការ​តវ៉ា​ នៅ​ពេល​មុន​វា​កើត​ឡើង។

«ដើម្បី​បង្ហាញ​ចំណុច​នេះ​ នៅ​ពេល​ដែល​អាជ្ញាធរ​មិន​ចូល​ចិត្ដ​ក្រុម​គ្រិស្ទាន ​កាតុលិក គេ​យក​យុវជន​និង​អតីត​យុទ្ធជន​មក​វាយដំ​ជន​គ្រិស្ទាន​នោះ។ នៅ​ក្នុង​ករណី​នេះ​ អាជ្ញាធរ​អាច​ដឹង​មុន​ថា​ មាន​ការ​តវ៉ា ហើយ​ប៉ូលិស​សន្ដិសុខ​អាច​បញ្ចៀស​ភ្លាមៗ​មិន​ឲ្យ​មាន​ការ​ដើរ​តវ៉ា»។

អ្នក​ជំនាញ​ខាង​កិច្ចការ​អាស៊ី​ដទៃ​ទៀត​និយាយ​ថា​ ហាណូយ​ប្រហែល​ជា​បាន​អត់ឱន​ ឬ​លើក​ទឹកចិត្ដ​ឲ្យ​មាន​បាតុកម្ម​ ដែល​អាច​ត្រួត​ត្រា​បាន​ ដើម្បី​ចៀសវាង​មិន​ឲ្យ​ភាព​តានតឹង​កើន​កាន់​តែ​ខ្លាំង​ជាមួយ​ចិន។​ អ្នក​នាំពាក្យក្រសួង​ការ​បរទេស​វៀតណាម​បាន​បដិសេធ​ការ​ចោទ​ប្រកាន់​ដូច្នោះ។

«ដូច​ខ្ញុំ​បាន​និយាយ​នៅ​ក្នុង​សន្និសីទ​កាសែត​ពី​មុន​ហើយ​ថា ​នេះ​ជា​ការ​ឆ្លើយតបរបស់ប្រជា​ពលរដ្ឋវៀតណាម ​ទៅ​នឹង​រឿង​ជម្លោះ​នៅ​លើ​ដែន​ទឹក​នៃ​សមុទ្រ​ខាង​កើត»។

លោក​ Thayer ​និយាយ​ថា ​ដូចគ្នា​ដែរ​ ចិន​ក៏​បាន​ប្ដូរ​កល​ល្បិច​របស់​ខ្លួន​ដោយ​ព្យាយាម​សម្រប​សម្រួល​គ្នា។

«នៅ​ពេល​នេះ​ ចិន​ញញឹម​ ហើយ​ខិតខំ​ប្រើ​ភាសា​ការទូត​ ដើម្បី​ធ្វើ​ឲ្យ​ស្ថាន​ការណ៍​រលូន​ឡើង។​ នេះ​ជា​ការ​ផ្លាស់​ប្ដូរ​កល​ល្បិច»។

លោក​ Thayer​ កត់​សម្គាល់​ថា​ ភាគី​ទាំង​ពីរ​កំពុង​ចាំ​មើល​ទំនាក់ទំនង​របស់​ស.រ.អា.​ជា​មួយ​សមាគម​ប្រទេស​អាស៊ី​អគ្នេយ៍ ។​ ប្រទេស​បួន​នៃ​សមាគម​អាស៊ាន​បាន​ទាមទារ​កម្ម​សិទ្ធិ​លើ​ដែន​សមុទ្រ​ចិន​ភាគ​ខាងត្បូង៕

ប្រែ​សម្រួល ​ដោយ​អ៊ូ​ ធួក

XS
SM
MD
LG