អាជ្ញាធរវៀតណាមកំពុងត្រៀមគម្រោងដើម្បីធ្វើឱ្យសេដ្ឋកិច្ចងើបឡើងមួយចំនួន ខណៈពេលដែលចំនួនអ្នកឆ្លងជំងឺ Covid-19 នៅទាបនៅឡើយនៅក្នុងប្រទេសនេះ។ បើទោះបីជាវៀតណាមមានព្រំប្រទល់ និងទំនាក់ទំនងពាណិជ្ជកម្មខ្លាំងជាមួយប្រទេសចិនក៏ដោយ គេឃើញថា ចំនួនអ្នកឆ្លងជំងឺ Covid-19 នេះនៅទូទាំងប្រទេសវៀតណាមមានត្រឹមតែ ២៤១នាក់ប៉ុណ្ណោះគិតត្រឹមថ្ងៃអាទិត្យទី ៥ ខែមេសា។
ទោះបីជាវៀតណាមបានហាមឃាត់ការធ្វើដំណើរចូលក្នុងប្រទេសតាមច្រកព្រំដែនក៏ដោយ ក៏រដ្ឋាភិបាលវៀតណាម កាលពីពេលថ្មីៗនេះបានបង្ហាញនូវគម្រោងលើកទឹកចិត្តដល់ក្រុមហ៊ុននានា រួមទាំងរោងចក្រផលិតកម្មនាំចេញដែលជាឆ្អឹងខ្នងនៃសេដ្ឋកិច្ចជាតិផងដែរ។ សេដ្ឋកិច្ចវៀតណាមរីកចម្រើនប្រហែល ៦ភាគរយក្នុងមួយឆ្នាំតាំងពីឆ្នាំ២០១២ មក។
លោក Mike Lynch នាយកគ្រប់គ្រងក្រុមហ៊ុន SII Institutional Brokerageនៅក្នុងទីក្រុងហូជីមិញ បានបញ្ជាក់ដូច្នេះថា៖ «វត្ថុធាតុដើមបានចាប់ផ្ដើមនាំចូលមកបណ្ដើរៗហើយ ហើយ (រោងចក្រ) ងើបឡើងវិញសន្សឹមៗហើយ ប៉ុន្តែបញ្ហាដែលវៀតណាមព្រួយបារម្ភខ្លាំងនោះគឺវិស័យទេសចរណ៍ និងការហូរចូលមកនូវជនបរទេស ដូច្នេះហើយបានជាវៀតណាមរឹតបន្តឹងយ៉ាងខ្លាំងអំពីចំណុចនេះ»។
ដូចប្រទេសក្នុងតំបន់អាស៊ីអាគ្នេយ៍ដទៃទៀតដែរ វៀតណាមបានបន្ថយអត្រាពន្ធ ពន្យារពេលបង់ពន្ធ និងអនុគ្រោះឱ្យពន្យារការបង់ពន្ធដីធ្លីដល់ក្រុមហ៊ុនដែលរងផលប៉ះពាល់ដោយសារការផ្ទុះរាតត្បាតជំងឺនេះ។ នេះបើតាមការបញ្ជាក់របស់ក្រុមហ៊ុនផ្តល់សេវាប្រឹក្សាឈ្មោះ Dezan Shira & Associates នៅក្នុងការជូនដំណឹងតាមអ៊ីនធឺណិតកាលពីថ្ងៃទី១៧ ខែមីនា។
ធនាគារកណ្តាលវៀតណាមបានកាត់អត្រាគោលនៃការផ្ដល់កម្ចីជាថ្មីរបស់ខ្លួន ១ភាគរយ កាលពីថ្ងៃទី១៧ ខែមីនា ដើម្បីជំរុញឲ្យសកម្មភាពពាណិជ្ជកម្មដើរឡើងវិញ។
លោក Song Seng Wun សេដ្ឋវិទូប្រចាំតំបន់អាស៊ីអាគ្នេយ៍នៃធនាគារឯកជន CIMB ក្នុងប្រទេសសិង្ហបុរី បានបញ្ជាក់ដូច្នេះថា៖ «នេះគឺជាអ្វីដែលវៀតណាមអាចធ្វើបានក្នុងការឆ្លើយតបទៅនឹងការផ្ទុះរាតត្បាតនៃជំងឺនេះ តាមរយៈការបន្ថយផលប៉ះពាល់នៃជំងឺនេះដល់សេដ្ឋកិច្ចរបស់ខ្លួន។ វាជាការកាត់បន្ថយដំណើររាំងស្ទះ និងជួយរក្សាចំនួនការងារធ្វើ»។
ការទប់ស្កាត់ការរាលដាលជំងឺ COVID-19
អាជ្ញាធរវៀតណាម មានចំណាត់ការឆ្លើយតបទៅនឹងមេរោគនេះតាំងពីដំបូងភ្លាមៗដោយបានហាមប្រាមការធ្វើដំណើរចូលពីប្រទេសចិន។ អ្នកធ្វើដំណើរមកដល់ដែលត្រូវបានបញ្ជាឲ្យនៅដាច់ដោយឡែកពីគេ ជាទូទៅធ្វើតាមបទបញ្ជានេះ បើមិនដូច្នេះទេនឹងប្រឈមនឹងការជេរប្រមាថក្នុងបណ្តាញ សង្គមតាមអ៊ីនធឺណិត។ នេះបើយោងតាមអ្នកនិពន្ធ ២រូបនៃសាកលវិទ្យាល័យ University of Economics School of Government ក្នុងទីក្រុងហូជីមិញ ដែលបានសរសេរអត្ថបទបង្ហោះលើវិបសាយ The Diplomat កាលពីថ្ងៃទី១៧ ខែមីនាកន្លងទៅនេះ ។
អ្នកនិពន្ធទាំងពីរខាងលើបាននិយាយថា វៀតណាមបានបង្ហាញតួលេខនៃករណីឆ្លងជំងឺនេះជាសាធារណៈ និងមិនបានហាមឃាត់ការពិភាក្សាជាសាធារណៈអំពីរឿងនេះទេ ដែលការធ្វើបែបនេះ គឺដើម្បីជៀសវាងការជាន់ដាននៃចំណាត់ការរបស់ចិននៅក្នុងការឆ្លើយតបទៅនឹងជំងឺនេះ។
វៀតណាមបានលុបចោលការផ្តល់ទិដ្ឋាការរយៈពេល ៣០ថ្ងៃដល់ស្ទើរតែគ្រប់ជនបរទេសទាំងអស់ គិតចាប់ពីថ្ងៃទី១៨ ខែមីនាមក។
ការបិទការផ្តល់ទិដ្ឋាការនេះនឹងធ្វើឱ្យប៉ះពាល់ដល់សេវាសណ្ឋាគារ ក្រុមហ៊ុនអាកាសចរណ៍ និងភ្នាក់ងារក្រុមហ៊ុនទេសចរណ៍នានា។ នេះបើតាមការបញ្ជាក់របស់អ្នកវិភាគមួយចំនួននៅវៀតណាម។ ចំនួនអ្នកទេសចរចូលក្នុងប្រទេសវៀតណាមបានកើនឡើងពី ៥លាននាក់ ទៅ ១៥លាននាក់ រវាងឆ្នាំ២០១០ និង ឆ្នាំ២០១៨ ដែលភាគច្រើនមកពីប្រទេសចិន និងកូរ៉េខាងត្បូង។
ពេលនេះ ប្រជាជនវៀតណាមស្នាក់នៅក្នុងផ្ទះជាងពេលណាៗទាំងអស់ ដែលពេលខ្លះ ធ្វើការងារពីផ្ទះជាជាងចេញទៅធ្វើការនៅការិយាល័យ។
នៅពេលណាដែលរដ្ឋាភិបាលវៀតណាមប្រកាសអំពីការបញ្ចប់ការឆ្លងរាលដាលនៃមេរោគកូរ៉ូណាថ្មីនេះ នៅពេលនោះ សេដ្ឋកិច្ចរបស់ប្រទេសនេះទំនងជាងើបឡើងវិញ ទោះបីជាគ្មានវត្តមានភ្ញៀវទេសចរបរទេសក៏ដោយ។ នេះបើតាមការបញ្ជាក់របស់លោក Adam McCarty សេដ្ឋវិទូចម្បងនៃក្រុមហ៊ុន Mekong Economics ក្នុងរដ្ឋធានីហាណូយ។
លោក McCarty បានបន្ថែមថា៖ «នៅពេលដែលស្ថានការណ៍នេះចូលមកដល់ រដ្ឋាភិបាលវៀតណាមនឹងនិយាយថា ភោជនីយដ្ឋានអាចបើកដំណើរការបាន ហើយប្រជាជនអាចចេញទៅក្រៅបាន»។
រោងចក្រដំណើរការធម្មតា សម្រាប់ពេលបច្ចុប្បន្ន
សម្រាប់ពេលបច្ចុប្បន្ននេះ សេដ្ឋកិច្ចវៀតណាមមានដំណើរការធម្មតា។
រោងចក្រនៅតែដំណើរការធម្មតាពឹងផ្អែកលើកម្លាំងការងារក្នុងស្រុក ហើយការនាំចេញបានកើនឡើង ដោយចាប់ពីថ្ងៃទី១ ខែមករារហូតដល់ថ្ងៃទី១៥ ខែមីនា បានកើនចំនួន ៦,៨ភាគរយ ធៀបនឹងរយៈពេលដដែលក្នុងឆ្នាំ២០១៩។
សេដ្ឋកិច្ចវៀតណាមប្រហែល ៥៥ភាគរយ ដែលច្រើនជាងភាគរយជាមធ្យមរបស់ពិភពលោក ពឹងផ្អែកលើផលិតកម្មសម្រាប់ការនាំចេញចាប់តាំងពីឆ្នាំ១៩៨៦ រហូតដល់ឆ្នាំ២០១៨៕
ប្រែសម្រួលដោយ កោះ សុគន្ធី
