ភ្ជាប់​ទៅ​គេហទំព័រ​ទាក់ទង

សេដ្ឋកិច្ច​​របស់​វៀត​ណាម​​ក្លាយ​ជា​​តា​រា​កំពុង​រះ​ឡើង ​បន្ទាប់​ពី​ការ​ធ្លាក់​ចុះ​នៃ​សេដ្ឋកិច្ច​​សកល​លោក


ស្លាក​សញ្ញា​ក្រុមហ៊ុន​​អាមេរិក​ ស្លាក​សញ្ញា​ក្រុមហ៊ុន​ទូរស័ព្ទ​ម៉ូតូរ៉ូឡា​ និង​ធនាគារ​ Citybank​ ត្រូវ​​បាន​​គេ​​មើល​​ឃើញ​​នៅ​​ទី​ប្រជុំជន​ក្នុង​ទីក្រុង​ហូជីមិញ​ ប្រទេស​វៀតណាម​។

សេដ្ឋកិច្ច​វៀតណាមកំពុង​ងើប​ចេញ​ពី​ការ​ធ្លាក់​ចុះ​ជា​សកល​ មួយ​ផ្នែក​ធំ​ដោយ​សារកញ្ចប់​ថវិកា​ជួយ​សង្គ្រោះរបស់​រដ្ឋាភិបាល។​ ប៉ុន្តែ ​ដូច​ដែល Ron Corben រាយ​ការណ៍​មក​ពី​ទី​ក្រុង​បាង​កក​ថា សេដ្ឋវិទូនិយាយ​ថា ​ប្រទេស​នេះនៅ​តែ​ប្រឈមទៅនឹងបញ្ហា​លំបាកជា​ច្រើនទៀត ដោយ​រាប់​បញ្ចូល​ទាំង​អតិ​ផរណា​ និង​ការ​ព្រួយ​បារម្ភ​អំពី​អំពើ​ពុក​រលួយ​ និង​ការគ្រប់គ្រងរបស់​រដ្ឋាភិបាល។

សេដ្ឋកិច្ច​វៀត​ណាមមាន​សភាព​រស់​រវើក ​ហើយ​បក្ស​កុម្មុយ​នីស្ត​បានកំណត់ទិស​ដៅនៃកំណើន​ជា​មធ្យម​ចំនួន​៨​ភាគ​រយ​ក្នុង​មួយ​ឆ្នាំៗ ​សម្រាប់រយៈ​ពេល​៥​ឆ្នាំខាង​មុខទៀត។ ​ក្រសួង​ផែន​ការ ​និង​វិនិយោគ (Ministry of Planning and Investment) រំ​ពឹង​ថា​សេដ្ឋ​កិច្ចនឹងមាន​កំណើន៧,៥​ភាគ​រយ​នៅ​ឆ្នាំ២០១១​ ដោយកើនឡើង​ពី​៦,៥​ភាគ​រយ​នៅ​ឆ្នាំ​នេះ។

លោក​ដានី ​អាមស្ត្រង (Danny Armstrong) ជា​នាយក​ធនាគារ​ខមិនវ៉េលរបស់​អូស្រ្តាលី​ (Australia's Commonwealth Bank) ប្រចាំ​នៅ​វៀត​ណាម។ ​លោកមាន​ប្រសាសន៍​ថា ​សេដ្ឋ​កិច្ចនេះបាន​ពុះ​ពារ​ឆ្លង​កាត់ស្ថាន​ភាព​ដ៏​ធ្ងន់​ធ្ងរ​នៃ​ការ​ធ្លាក់​ចុះ​ជា​សកល។

«ប្រសិន​បើអ្នក​ពិចារ​ណា​ទៅ​លើ​អ្វី​ដែល​យើងទើប​តែ​បាន​ឆ្លង​កាត់ ​ដែល​ជា​ស្ថាន​ភាពហិរញ្ញវត្ថុសកល​ដ៏​ធ្ងន់​ធ្ងរ​បំផុត​ក្នុង​រយៈ​ពេល​៨០​ឆ្នាំ​នេះ​ សេដ្ឋកិច្ច​វៀត​ណាមបាន​រីក​ចម្រើនក្នុងកម្រិត​ ៥,៣​ភាគ​រយ​ កាល​ពី​ឆ្នាំ​មុន ​ខណៈ​ដែលសេដ្ឋ​កិច្ច​នៃ​ប្រទេស​ជាច្រើន​គឺ​ ​ប្រទេស​មាន​សេដ្ឋ​កិច្ចរីក​លូត​លាស់​ភាគ​ច្រើន​កំពុង​ដើរ​ថយ​ក្រោយ​ ខ្ញុំ​សូមស្នើ​ឡើង​ថា ​ទស្សនៈ​វិស័យនៃ​ការ​រីក​លូត​លាស់មាន​លក្ខណៈ​ភ្លឺ​ថ្លា​គួរ​សម»។

រដ្ឋា​ភិបាល​បាន​ដាក់​ចេញ​នូវ​កញ្ចប់​ថវិការជួយ​សង្គ្រោះ​ចំនួន​៨,៥​ពាន់​លាន​ដុល្លារ ​ដើម្បី​កាត់បន្ថយ​ការ​ខូច​ខាត​ ដែល​បណ្តាល​មក​ពីវិបត្តិហិរញ្ញ​វត្ថុសកល​លោក​ ក្នុង​ឆ្នាំ​២០០៨។ ​ហើយអាជ្ញា​ធររូបិយវត្ថុ​ បាន​បញ្ចុះ​តម្លៃរូបិយប័ណ្ណ ​គឺ​ប្រាក់​ដុង (dong) ដែល​ធ្វើ​ឲ្យការ​នាំ​ចេញ​កាន់​តែ​មាន​ភាព​ប្រកួតប្រជែងនៅ​ឯ​បរទេស។

លោក​អាយុមី ​កូនីស្សី (Ayumi Konishi) ​បច្ចុប្បន្នជា​នាយកធនាគារអភិវឌ្ឍ​ន៍​អាស៊ី (Asian Development ​Bank) បាន​ថ្លែង​ថា ​កញ្ចប់​ថវិការ​ជួយ​សង្គ្រោះ​បាន​ដើរ​តួនាទីដ៏​សំខាន់ក្នុង​ការ​ទប់​ស្កាត់ការ​ធ្លាក់​ចុះសេដ្ឋ​កិច្ច។ ​លោក​កូនីស្សី ​បាន​បន្ថែម​ទៀត​ថា ​វា​ដល់​ពេល​ហើយ​សម្រាប់​ការ​ចាប់​ផ្តើមឈប់ជួយ​ទ្រ​ទ្រង់​ដោយ​ធ្វើបន្តិច​ម្តងៗ។

«រដ្ឋាភិបាលគួរ​តែ​មាន​លទ្ធភាព​បញ្ឈប់បនិ្តច​ម្តងៗ​នៅ​ក្នុង​ដំណាក់​កាលទី​មួយ​ នៃ​កញ្ចប់​ថវិកាជួយ​សង្គ្រោះ​នេះ។ ​កិច្ចការ​នោះពិត​ជា​ធ្វើបាន​នូវ​អ្វី​ដែល​គេ​មាន​បំណង​ចង់​ធ្វើហើយ​។ រឿង​សំខាន់​នោះគឺ​ថាកញ្ចប់​ថវិកា​ជួយ​សង្គ្រោះ ​ក៏​រាប់​បញ្ចូល​ឲ្យ​បាន​ច្រើន​នូវសមា​មាត្រ​យ៉ាង​ធំ​ធេងសម្រាប់គាំ​ទ្រ​ដល់​ហេដ្ឋា​រចនា​សម្ព័ន្ធ ​ឬការ​វិនិយោគ​លើ​ហេដ្ឋា​រចនា​សម្ព័ន្ធ»។

មនុស្ស​ជា​ច្រើន​នៅ​ក្នុង​ផ្នែក​ជំនួញ ​និយាយ​ថា ​រដ្ឋាភិបាល​ត្រូវតែ​ផ្តោត​ទៅ​លើការ​ធ្វើ​ឲ្យ​ហេដ្ឋារចនាសម្ព័ន្ធ​ប្រសើរ​ឡើង។ ផ្លូវ​ថ្នល់ ​កំព​ង់​ផែ ​និង​រោង​ចក្រ​អគ្គិសនី​ មិន​អាច​បំពេញ​បាន​តាមការទាម​ទារ​ដែល​ចេះ​តែ​កើន​ឡើង​នៅ​ឡើយ​ទេ​។

លោក​អាមស្ត្រង ​នៃ​ធនាគារ​ខមិនវ៉េល ​និយាយ​ថា​ បញ្ហា​នេះ​ជា​រឿង​ធំ​មួយ​សម្រាប់​ការ​ធ្វើជំនួញ។

«ខ្ញុំ​ហ៊ាន​ទាយ​ថា ​ការ​ត្អូញ​ត្អែរ​សំខាន់​ជាង​គេ ​គឺលើ​បញ្ហា​ឋាម​ពលអគ្គិសនី​មាន​មិន​ទៀង​ទាត់​ កាល​ពី​ឆ្នាំ​មុន ឬ​ពីរ​ឆ្នាំ​មុន។ ​មាន​ការ​អត្ថា​ធិប្បាយយ៉ាង​ច្រើនអំពី​រឿង​នេះ​នៅ​ក្នុង​ប្រព័ន្ធ​ផ្សព្វផ្សាយ ​ហើយ​ក៏​នៅ​មាន​សេចក្តី​ត្រូវ​ការ​ធ្វើ​ឲ្យ​កំពង់​ផែប្រសើរ​ឡើង។ ​ចំពោះ​ផ្លូវ​ថ្នល់​វិញ​? ជា​ការ​ពិត​ណាស់ ​នៅ​ទី​ក្រុង​ហូជីមិញ ​ប្រសិន​បើ​អ្នក​ក្រឡេក​មើល​ទៅលើ​ចរាចរណ៍​នៅ​តាមដងផ្លូវ​វិញ​ហេដ្ឋា​រចនា​សម្ព័ន្ធ​ផ្លូវ​ថ្នល់កំពុងរីក​ចម្រើនបន្តិច​ដែរ​ ប៉ុន្តែហេដ្ឋា​រចនា​សម្ព័ន្ធស្ថិត​នៅ​លើ​កំណាត់​ផ្លូវ​ដ៏​វែងឆ្ងាយ​ទៀតដែលត្រូវធ្វើ​ការ​កែលម្អ​”។

វៀតណាមកំពុង​ធ្វើ​កិច្ចការ​នេះ​ហើយ។ ​រោង​ចក្រ​អគ្គិសនី​ថ្មីដើរ​ដោយ​ថាម​ពលធ្យូងថ្ម​ចំនួន៣០​កន្លែង​ត្រូវ​បានរំពឹង​ថា នឹង​ចាប់​ផ្តើម​ដំណើរ​ការ​ នា​ពេល​ឆាប់ៗខាង​មុខ​នេះ​ ហើយមាន​ផែន​ការ​សាងសង់ច្រើនថែម​ទៀត។

ប៉ុន្តែ​វិធាន​ការមួយ​ចំនួន​របស់​រដ្ឋាភិបាលនាំ​ឲ្យ​មាន​ការ​ព្រួយ​បារម្ភ​ផ្សេងៗទៅ​វិញ។ ​សេចក្តីសម្រេច​ចិត្តក្នុង​ការ​បញ្ចុះ​តម្លៃប្រាក់​ដុង បាន​នាំ​ឲ្យ​មាន​ការ​ព្រួយ​បារម្ភទៅ​លើអតិផរណា។ ​ខណៈ​ដែល​សេចក្តី​សម្រេច​ចិត្ត​នេះ សំដៅ​បង្កើន​ការ​នាំ​ចេញ​ រូបិយប័ណ្ណ​ដ៏​ទន់​ខ្សោយ​បាន​ធ្វើឲ្យការនាំ​ចូល​មាន​តម្លៃ​ខ្ពស់​។

ហើយ​ដូច​បណ្តាប្រទេស​មាន​សេដ្ឋ​កិច្ចងើបឡើង​ដទៃ​ទៀត​ដែរ​ វៀត​ណាម​បាន​មើល​ឃើញប្រាក់ទុនបាន​ហូរ​ចូល​យ៉ាង​ឆាប់​រហ័ស​ទៅ​ក្នុងទី​ផ្សារ​របស់​ខ្លួន ​ដោយ​ចេញ​ពីប្រទេសដែល​មាន​ការរីកចម្រើន​យឺត​ជាង។

ឧទាហរណ៍ ​តម្លៃអចលនៈ​ទ្រព្យ​បាន​ស្ទុះ​ឡើង​ថ្លៃយ៉ាង​លឿន​ កាល​ពី​ឆ្នាំ​មុន ដោយ​បាន​បន្ថែម​ការ​ព្រួយ​បារម្ភពីការ​ឡើង​ហួស​ពី​តម្លៃ​ពិត​។

លោកណាហ្គេស​ កុមា (Nagesh Kumar) ជា​ប្រធាន​សេដ្ឋ​វិទូនៃ​គណៈ​កម្មការ​សេដ្ឋកិច្ច​ និង​សង្គម​កិច្ច​របស់​អង្គការសហ​ប្រជាជាតិ ​(United Nations Economic and Social Commission) ​ប្រចាំនៅ​តំបន់​អាស៊ី និងប៉ាស៊ីហិ្វក។ ​លោក​និយាយ​ថា ​ការ​ហូរ​ចូល​នេះបាន​ឆ្លុះ​បញ្ចាំង​ពី​តម្លៃអចលនៈ​ទ្រព្យ​ដែល​កើន​ឡើង​ នៅ​កន្លែង​ផ្សេងៗ​នៅ​អាស៊ី​ ដោយ​រាប់​បញ្ចូល​ទាំង​ប្រទេស​ចិន ​ឥណ្ឌា​ និង​ឥណ្ឌូនេស៊ី​ផង។

«នេះ​ជា​បញ្ហា​មួយ​ ដែល​កំពុង​ប៉ះ​ពាល់​ដល់​ប្រទេស​មាន​សេដ្ឋ​កិច្ចងើបឡើង​ថ្មីៗ​ នៅ​អាស៊ីភាគច្រើន​បំផុត។​ នេះគឺដោយ​សារ​តែ​វិបត្តិ ​ដែល​តម្រូវ​ឱ្យ​មានការបញ្ចូលបន្ថែម​នូ​វ​ទំនិញសម្រាប់​ដោះ​ដូរយករូបិយប័ណ្ណ​ នៅ​ទូ​ទាំង​ពិភព​លោក ​ហើយ​ឥឡូវ​នេះ​ បញ្ហា​ទាំង​នោះកំពុង​រក​ផ្លូវចូលមក​ក្នុង​ប្រទេស​មាន​សេដ្ឋកិច្ច​រីក​ម្រើនរបស់​អាស៊ី ​ដោយ​សារ​ប្រទេស​ទាំង​នេះកំពុង​ដំណើរការយ៉ាង​ល្អ។ ដោយ​សារតែ​លំហូរ​ប្រាក់ទុន​ទាំង​នេះ​ហើយ ​ទើបតម្លៃ​ទ្រព្យ​សម្បត្តិ​និង​ទីផ្សារ​ភាគហ៊ុនកំពុង​កើន​ឡើង​ដែរ»។

ក្រសួងសំណង់​របស់​វៀតណាម​ បាន​ឲ្យដឹងថា​ ឆ្នាំ​នេះ​ ផ្នែក​អចលនៈ​ទ្រព្យមាន​ចំនួន​ប្រហែល២២ភាគ​រយ​ នៃ​ការ​វិនិយោគ​ផ្ទាល់​ពី​បរទេស​ទាំង​អស់នៅ​ក្នុង​ប្រទេស​នេះ។

អ្នក​វិភាគ​ជំនួញ​ ដូច​ជា​លោកអាមស្ត្រងនៃ​ធនាគារ​ខមិនវ៉េល​ និយាយ​ថា​ វៀត​ណាមបាន​ទទួលផល​ប្រយោជន៍​ពី​តម្លៃដែល​ចេះ​តែ​កើន​ឡើងនៅប្រទេស​ចិន ​ដែល​បង្ខំឲ្យ​ក្រុម​ហ៊ុនមួយចំនួនផ្លាស់​ប្តូរ​ប្រតិ​បត្តិការ​របស់​ខ្លួន។

«ប្រសិន​បើមិន​ចង់​ឃើញ​ស៊ុត​ទាំង​អស់​របស់​អ្នកនៅ​ក្នុង​កញ្ជើរបស់ចិន​ទេ (ដែល​មាន​ន័យ​ថា​ប្រសិន​បើអ្នក​មិនចង់​ដាក់​ការ​វិនិយោគទាំង​អស់​របស់​អ្នក​នៅប្រទេស​ចិន​ទេ) ដូច្នេះត្រូវ​ចាត់​ទុក​វៀតណាមថា​ជាជម្រើស​មួយ​ ដែល​មាន​កម្លាំង​ពលកម្ម​ថោកប៉ុន្តែ​ក្មេងៗ​ ហើយអាច​បណ្តុះ​បណ្តាល​បានទៀត​ផង បើ​តាម​ការ​ប្រៀប​ធៀបទៅ ​ព្រម​ទាំង​មានស្ថិរ​ភាព​នយោបាយ​ និង​មាន​លក្ខខណ្ឌ​វិនិយោគដ៏​អនុគ្រោះ ​និងការ​ធ្វើបដិ​សណ្ឋារ​កិច្ច​ដ៏​កក់​ក្តៅចំពោះ​ការ​វិនិយោគ​ពី​បរទេស»។

ការ​វិនិយោគបរទេសជា​រួមកំពុង​ងើប​ឡើង​វិញ​យ៉ាង​យឺតៗ ​បន្ទាប់​ពី​ការ​ធ្លាក់​ចុះ​ក្នុង​អំឡុងពេលមាន​ការ​ធ្លាក់ចុះ​ជា​សកល។ ​ក្នុង​រយៈ​ពេល​៩​ខែ​ដំបូង​នៃ​ឆ្នាំ​នេះ ​ការ​វិនិយោគ​ផ្ទាល់​ពី​បរទេសមានចំនួន​១២​ភាគ​រយ ​ទាបជាងការ​វិនិ​យោគ​ពី​ឆ្នាំ​មុន​ ក្នុង​ទឹក​ប្រាក់​ចំនួន​១១​ពាន់​លាន​ដុល្លារ​ ដែលស្ថិត​នៅក្រោម​ទិស​ដៅ​របស់​រដ្ឋា​ភិបាល​សម្រាប់​ឆ្នាំ​២០១០​ ដែល​ត្រូវមានទឹក​ប្រាក់​ចំនួន២២​ពាន់​លាន​ដុល្លារ។ វិនិយោ​គិន​សំខាន់​ៗ​របស់​វៀត​ណាម​មក​ពី​តៃវ៉ាន់​ កូរ៉េ​ខាង​ត្បូង ​ជប៉ុន​ ម៉ាឡេស៊ី ​និង​សឹង្ហបូរី ​ព្រម​ទាំងសហ​រដ្ឋអាមេរិក ​និងអឺរ៉ុប។

វិនិយោគិន​បរទេស​មួយ​ចំនួនមាន​ការ​ព្រួយ​បារម្ភ​ ដោយ​សារ​តែទី​ភ្នាក់​ងារវាយតម្លៃ​អត្រា​ឥណ​ទានអន្តរ​ជាតិឈ្មោះ​ហ្វីជ (Fitch) ​បាន​ទំលាក់​ចំណាត់​ថ្នាក់​របស់​វៀត​ណាម​។ ហ្វីជបាន​សំអាង​លើ​ហេតុផលដូចជា គោល​នយោបាយមិន​ស្រប​គ្នា​របស់​រដ្ឋ​ ហិរញ្ញ​វត្ថុ​ខាង​ក្រៅ ​និងធនាគារក្នុង​ស្រុក​យ៉ាង​ទន់ខ្សោយ ក្នុង​ការ​ទម្លាក់​ចំណាត់​ថ្នាក់​នេះ។

បើ​តាម​ការ​ស្ទាប​ស្ទង់​មតិ​ក្នុង​តំបន់​ វិនិយោ​គិនបរទេស​ក៏​បាន​សម្តែងនូវ​ការ​ព្រួយ​បារម្ភទៅ​លើអំពើពុក​រលួយ​ និងកម្ម​សិទ្ធិ​បញ្ញា​នៅ​វៀតណាម។ ​លើស​ពី​នេះ​ទៀត ​ពួក​គេ​និយាយ​ថា ​ច្បាប់ធ្វើ​ជំនួញដ៏​ស្មុគ​ស្មាញរបស់​វៀត​ណាម បាន​ធ្វើ​ឲ្យថម​ថយ​ដល់​ការ​ទាក់​ទាញវិនិយោ​គិនផងដែរ៕

ប្រែ​សម្រួល​ដោយ​លោក លី​ សុខ​ឃាង

XS
SM
MD
LG