ប្រជាពលរដ្ឋជាង១០លាននាក់រស់នៅក្នុងទីក្រុងហូជីមិញ ត្រូវស្ថិតក្រោមបម្រាមគោចរពេលយប់ចាប់ពីថ្ងៃច័ន្ទតទៅ ដែលនេះគឺជាចំណាត់ការមិនធ្លាប់មានពីមុនដើម្បីទប់ស្កាត់ការឆ្លងរាតត្បាតជំងឺកូវីដ១៩ ដោយសារតែវៀតណាមកំពុងតែប្រយុទ្ធប្រឆាំងនឹងការកើនឡើងករណីឆ្លងជំងឺកូវីដ១៩។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
បន្ទាប់ពីបានទប់ស្កាត់ការឆ្លងជំងឺកូវីដ១៩ដោយជោគជ័យកាលពីឆ្នាំមុន ប្រទេសកុម្មុយនីស្តវៀតណាមឥឡូវនេះកំពុងតែមានករណីឆ្លងនិងស្លាប់ដោយសារជំងឺកូវីដ ១៩ខ្ពស់ដែលបង្កឡើងដោយវីរុសជំងឺកូវីដ១៩ដែលតា។
តំបន់ដែលរងផលប៉ះពាល់ខ្លាំងបំផុតគឺមជ្ឈមណ្ឌលឧស្សាហកម្មនៅភាគខាងជើង និងទីក្រុងហូជីមិញនៅភាគខាងត្បូង ដែលបានកត់ត្រាករណីឆ្លងជាង៦ម៉ឺន២ពាន់ករណីចាប់តាំងពីខែមេសាមក ដែលធ្វើឲ្យករណីឆ្លងសរុបនៅក្នុងប្រទេសកើនឡើងដល់ជាង១សែន១ពាន់ករណី។
អាជ្ញាធរបានដាក់កម្រិតលើការធ្វើដំណើរនៅក្នុងទីក្រុងហូជីមិញដែលជាតំបន់ពាណិជ្ជ កម្មនេះរហូតរយៈពេលជាងពីរខែ និងបានធ្វើការបិទខ្ទប់កាលពីដើមខែកក្កដា។ ប្រជាពលរដ្ឋត្រូវបានអនុញ្ញាតឲ្យចាកចេញពីផ្ទះតែក្នុងករណីដែលត្រូវការម្ហូបអាហារ និងថ្នាំពេទ្យតែប៉ុណ្ណោះ។
ប៉ុន្តែចាប់ពីថ្ងៃច័ន្ទតទៅ ការដាក់កម្រិតឲ្យស្នាក់នៅក្នុងផ្ទះនឹងត្រូវអនុវត្តពីម៉ោង៦ល្ងាចដល់ម៉ោង៦ព្រឹក បើទោះជាអាជ្ញាធរបានបដិសេធមិនប្រើពាក្យ«បម្រាមគោចរ»ក៏ដោយ។ នៅមិនទាន់មានកាលបរិច្ឆេទច្បាស់លាស់អំពីការបញ្ចប់វិធានការរឹតត្បិតនេះនោះទេ។
នាពេលបច្ចុប្បន្ននេះ ប្រជាពលរដ្ឋវៀតណាមជាង១ភាគ៣ក្នុងចំណោមប្រជាជនសរុបចំនួនជាង១០០លាននាក់កំពុងរស់នៅក្នុងតំបន់បិទខ្ទប់ ដោយរួមទាំងប្រជាពលរដ្ឋដែលរស់នៅក្នុងរដ្ឋធានីហាណូយនៅភាគខាងជើងផងដែរ៕
