ក្រុមហ៊ុននាំផលិតផលចំណីអាហាររបស់កម្ពុជាចូលសហរដ្ឋអាមេរិកចំនួន ២០ ត្រូវបានអាជ្ញាធរចំណីអាហារ និងថ្នាំពេទ្យសហរដ្ឋអាមេរិក (U.S.FDA) លុបឈ្មោះចេញពីប្រព័ន្ធគ្រប់គ្រងទិន្នន័យរបស់ខ្លួនសម្រាប់ឆ្នាំ ២០១៩។ នេះបើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា។
ក្រសួងពាណិជ្ជកម្មបានបញ្ជាក់នៅក្នុងសេចក្តីជូនដំណឹងនៅថ្ងៃចន្ទថា ការណ៍នេះដោយសារតែក្រុមហ៊ុនទាំងនោះមិនបានជូនដំណឹងពីការចុះបញ្ជីឡើងវិញឱ្យបានត្រឹមត្រូវ នៅត្រឹមដំណាច់ឆ្នាំ ២០១៨។
ក្រុមហ៊ុនពីប្រទេសកម្ពុជាបានធ្លាក់ចុះពីចំនួន ៥៦ មកនៅត្រឹម ៣៦ ក្រុមហ៊ុននៅដើមឆ្នាំ ២០១៩ នេះ។ នេះបើតាមសេចក្តីជូនដំណឹងរបស់ក្រសួងពាណិជ្ជកម្ម ប៉ុន្តែមិនបានបញ្ជាក់ឈ្មោះក្រុមហ៊ុនទាំងនោះនៅឡើយទេ។
ក្រសួងពាណិជ្ជកម្មកម្ពុជាបានបន្តស្នើឱ្យក្រុមហ៊ុននានាទាក់ទងនឹងតំណាងនៅសហរដ្ឋអាមេរិក គឺក្រុមហ៊ុន Registrar Corp ដើម្បីជួយសម្រួលក្នុងការចុះបញ្ជីជាថ្មី។
ក្រសួងពាណិជ្ជកម្មបានបន្តថា៖
«ដើម្បីជៀសវាងនូវការឃាត់ឃាំង ឬសកម្មភាពនិយ័តកម្មផ្សេងៗ ក្រុមហ៊ុន Registrar Corp សហរដ្ឋអាមេរិកនឹងសម្របសម្រួលផ្តល់សេវាផ្ទៀងផ្ទាត់ដោយឥតគិតថ្លៃចំពោះការចុះបញ្ជីទីតាំងផលិតចំណីអាហារឡើងវិញសម្រាប់សុពលភាពឆ្នាំ ២០១៩ ជាមួយU.S FDA ទើបអាចអនុញ្ញាតឱ្យធ្វើការនាំចូលនិងចែកចាយនៅសហរដ្ឋអាមេរិកបាន»។
សហរដ្ឋអាមេរិកទទួលទិញទំនិញពីប្រទេសកម្ពុជាចំនួន ៣,៨ ពាន់លានដុល្លារក្នុងឆ្នាំ ២០១៨ ក្នុងនោះផលិតផលកសិកម្មមានចំនួន ២៤ លានដុល្លារ។ ផលិតផលកសិកម្មរបស់កម្ពុជាមានស្រូវ កៅស៊ូ អាហារសម្រន់ បន្លែនិងគ្រឿងទេស។ នេះបើតាមការបញ្ជាក់របស់គេហទំព័រនៃការិយាល័យតំណាងពាណិជ្ជកម្មសហរដ្ឋអាមេរិក។
ការលុបឈ្មោះក្រុមហ៊ុនបរទេសចេញពីបញ្ជីរបស់អាជ្ញាធរចំណីអាហារ និងថ្នាំពេទ្យរបស់សហរដ្ឋអាមេរិកគឺមិនមែនតែលើប្រទេសកម្ពុជាមួយទេ។ មានក្រុមហ៊ុនចំនួន៤៧.៦៣៥ ត្រូវបានលុបចេញដែលត្រូវជា ២០ ភាគរយនៃក្រុមហ៊ុនទាំងអស់ ដែលបានចុះបញ្ជីក្នុងឆ្នាំ ២០១៩។ នេះបើតាមការបញ្ជាក់នៅលើគេហទំព័ររបស់ការិយាល័យក្រុមហ៊ុន Registrar Corp ។
បុគ្គលិកម្នាក់នៃក្រុមហ៊ុន Registrar Corp ដែលសុំមិនឱ្យបញ្ចេញឈ្មោះ ដោយសារតែលោកស្រីគ្មានសិទ្ធិនិយាយជាមួយនឹងអ្នកសារព័ត៌មានបានបញ្ជាក់ប្រាប់វីអូអេថា ក្រុមហ៊ុននានាត្រូវចុះបញ្ជីឡើងវិញ នៅចន្លោះថ្ងៃទី១ ខែតុលា ដល់ថ្ងៃទី៣១ ខែធ្នូជារៀងរាល់ឆ្នាំគូ។
លោកស្រីបានបន្ថែមថា មិនដឹងមូលហេតុអ្វីដែលក្រុមហ៊ុនទាំងនោះមិនបានចុះបញ្ជីឡើងវិញទេ។ ប៉ុន្តែលោកស្រីបញ្ជាក់ថា ការលុបឈ្មោះនេះគឺមិនពាក់ព័ន្ធនឹងសេចក្តីស្នើច្បាប់ពាណិជ្ជកម្មដែលសមាជិកសភានិងព្រឹទ្ធសភារបស់សហរដ្ឋអាមេរិកបានស្នើឡើងឱ្យដាក់ទណ្ឌកម្មលើផលិតផលរបស់កម្ពុជាទេ ដែលក្នុងនោះគឺការដកឋានៈអនុគ្រោះពន្ធលើផលិតផល ដែលកម្ពុជានាំចូលសហរដ្ឋអាមេរិកក្នុងតម្លៃជាង ៤០០ លានដុល្លារក្នុងមួយឆ្នាំ។
លោកស្រីបន្ថែមថា ក្រុមហ៊ុន Registrar Corp ដែលមានមូលដ្ឋាននៅរដ្ឋ Virginia នឹងធ្វើជាតំណាងនៅសហរដ្ឋអាមេរិកសម្រាប់ក្រុមហ៊ុនទាំងនោះ។
អាជ្ញាធរចំណីអាហារនិងថ្នាំពេទ្យរបស់សហរដ្ឋអាមេរិកនៅមិនទាន់បានឆ្លើយតបនឹងសំណើសុំអត្ថាធិប្បាយរបស់វីអូអេនៅឡើយទេនៅថ្ងៃចន្ទនេះ៕
