ខណៈដែលមានការបារម្ភពីសមាជិកព្រឹទ្ធសភានៃគណបក្សទាំងពីររបស់សហរដ្ឋអាមេរិកចំពោះចំណាត់ការខ្លះរបស់ប្រធានថ្មីនៃទីភ្នាក់ងារសហរដ្ឋអាមេរិកសម្រាប់ប្រព័ន្ធផ្សព្វផ្សាយសាកល ហៅកាត់ថា USAGM លោក Michael Pack ប្រធានទីភ្នាក់ងារនេះបានថ្លែងនៅក្នុងលិខិតមួយរបស់លោកថា លោកមានការប្តេជ្ញាក្នុងការដោះស្រាយបញ្ហាការគ្រប់គ្រងនៅក្នុងទីភ្នាក់ងារនេះ ក្រោយពីលោកត្រូវបានប្រគល់តួនាទីឱ្យ «ធ្វើការផ្លាស់ប្តូរមោះមុត និងស៊ីជម្រៅ»។
លិខិតកាលពីថ្ងៃទី៨ ខែកក្កដា របស់លោក ដែលទីភ្នាក់ងារព័ត៌មាន AP និង ទូរទស្សន៍ CNBC បានទទួលជាការឆ្លើយតបទៅនឹងលិខិតរបស់ក្រុមសមាជិកព្រឹទ្ធសភាដែលថា លោក Michael Pack មិនបានពិភាក្សា ឬជូនដំណឹងដល់សភាជាតិ នៅពេលលោកបានសម្រេចបណ្តេញប្រធានវិទ្យុអាស៊ីសេរី វិទ្យុអឺរ៉ុបសេរី បណ្តាញផ្សព្វផ្សាយមជ្ឈឹមបូព៌ា និងមូលនិធិ Open Technology Fund» ដែលនេះនាំឱ្យមានសំណួរសំខាន់ជាច្រើនអំពីអនាគតនៃទីភ្នាក់ងារនេះដែលគ្រប់គងសំឡេងសហរដ្ឋអាមេរិក VOAផងដែរ។
លោក Michael Pack បាននិយាយនៅក្នុងលិខិតនោះថា៖ «លោកប្រធានាធិបតី ពលរដ្ឋអាមេរិកាំង និងព្រឹទ្ធសភាបានស្នើឱ្យខ្ញុំធ្វើការផ្លាស់ប្តូរមោះមុតនិងស៊ីជម្រៅ។ ជាការពិត ក្នុងដំណើរការសក្ខីកម្មសភាដើម្បីតែងតាំងខ្ញុំ និងជាច្រើនសប្តាហ៍តាំងពីខ្ញុំចូលកាន់តំណែងមក ខ្ញុំបានបញ្ជាក់យ៉ាងច្បាស់ពីការប្តេជ្ញារបស់ខ្ញុំក្នុងការដោះស្រាយបញ្ហាខាងការគ្រប់គ្រងដែលគេបានដឹងយ៉ាងទូលំទូលាយ និងដែលបានរឹតត្បិតស្ថាប័នទីភ្នាក់ងារ USAGM»។
លោក Michael Pack ក៏បានបញ្ជាក់ថាលោកគោរព និងការពារឯករាជ្យភាពនៃការងាររបស់អ្នកសារព័ត៌មាន USAGM និង VOA។
កន្លងមកសមាជិករដ្ឋសភា១១រូបពីគណបក្សប្រជាធិបតេយ្យក៏បានសម្តែងការបារម្ភស្រដៀងគ្នានឹងក្រុមសមាជិកព្រឹទ្ធសភាដែរ៕
