រដ្ឋធានីវ៉ាស៊ីនតោន៖ ក្រុមអ្នកលួចចូលក្នុងប្រព័ន្ធកុំព្យូទ័រគេហទំព័រមួយក្រុម នៅអាទិត្យនេះ បានលួចចូលកាន់កាប់គេហទំព័រដែល VOA ឬសម្លេងសរអគ្រប់គ្រង ដោយបានបញ្ជូនចរាចរតាមប្រព័ន្ធអ៊ិនធឺណិត ទៅឲ្យគេហទំព័រ តាមប្រព័ន្ធអ៊ិនធឺណិតមួយទៀត ដែលគេបានអះអាងថា ត្រូវគ្រប់គ្រងដោយក្រុម Iranian Cyber Army ឬ កងទ័ពអ៊ិនធឺណិតអ៊ីរ៉ង់។ ការវាយប្រហារនេះធ្វើឡើងនៅពេលដែលរដ្ឋាភិបាលសរអ កំពុងតែជំរុញជាថ្មីម្ដងទៀតនូវការផ្លាស់ប្ដូរលើកស្ទួយសេរីភាពក្នុងប្រព័ន្ធអ៊ិនធឺណិត ហើយនិងនៅពេលដែលការតវ៉ារីករាលដាលនៅទូទាំងមជ្ឈិមបូព៌ា។ ការតវ៉ាខ្លះៗកើតមានឡើងដោយមានជំនួយពីប្រព័ន្ធអ៊ិនធឺណិត។ នៅក្នុងសេចក្ដីថ្លែងការណ៍មួយនៅថ្ងៃអង្គារ Voice of America ហៅកាត់ថា VOA ឲ្យដឹងថា ការវាយប្រហារនេះបានបង្វែរចរាចរបន្ដ ពីគេហទំព័រមួយចំនួន មានរួមទាំងគេហទំព័រសំខាន់មួយរបស់បណ្ដាញផ្សាយព័ត៌មានអន្ដរជាតិមួយនេះ គឺ៖ voanews.com។ ផ្ទុយពីការដែលអ្នកប្រើប្រព័ន្ធអ៊ិនធឺណិត គួរបានឃើញ ជាធម្មតាក្នុងគេហទំព័ររបស់សម្លេងសរអ ពួកគេបានឃើញទំព័រមួយមានផ្ទុកសារមួយប្រឆាំងសរអ ជូនចំពោះលោកស្រីរដ្ឋមន្ដ្រីក្រសួងការបរទេសសរអ Hillary Clinton ហើយនិងទង់ជាតិអ៊ីរ៉ង់មួយ ព្រមទាំងកាំភ្លើងស្វ័យប្រវត្ដិធុន AK-៤៧មួយទៅវិញ។
អក្សរធំៗក្រាស់ៗសរសេរថា៖ «យើងបានបង្ហាញឲ្យឃើញថា យើងមានសមត្ថភាពធ្វើបាន»។
មានសេចក្ដីរាយការណ៍មកថា ក្រុមមនុស្សដែលអះអាងទទួលខុសត្រូវក្នុងការវាយប្រហារនេះ គឺកងទ័ព្ធអ៊ិនធឺណិតអ៊ីរ៉ង់ ជាប់ពាក់ព័ន្ធទៅនឹងរដ្ឋាភិបាលអ៊ីរ៉ង់។ លោក Jeffrey Carr អ្នកជំនាញខាងសន្ដិសុខប្រព័ន្ធអ៊ិនធឺណិត និយាយថា គេត្រូវការចាំបាច់យកចិត្ដទុកដាក់យ៉ាងខ្លាំងជាទីបំផុតទៅលើ ក្រុមកងទ័ព្ធ អ៊ិនធឺណិត អ៊ីរ៉ង់នេះ។
«មានក្រុមមនុស្សមួយចំនួន ដែលលួចចូលប្រព័ន្ធកុំព្យូទ័រ ហើយដែលធ្វើប្រតិបត្ដិការចេញពីប្រទេសអ៊ីរ៉ង់ ហើយដែលមានសេចក្ដីស្មោះត្រង់ ឬការពាក់ព័ន្ធជាមួយរដ្ឋាភិបាលអ៊ីរ៉ង់។ កងទ័ព្ធអ៊ិនធឺណិតអ៊ីរ៉ង់ ជាក្រុមមនុស្ស ក្នុងចំណោមក្រុមអ្នក លួចចូលប្រព័ន្ធកុំព្យូទ័រនោះ។ ពួកនោះមានជំនាញការល្អក្នុងរឿងនេះ។ ពួកនេះមិនមែនជាក្រុម អ្នកលួចចូលប្រព័ន្ធកុំព្យូទ័រ ដែលគ្មានបទពិសោធន៍នោះទេ។
ទីភ្នាក់ងារព័ត៌មាន Fars News Agency ដែលមានការទាក់ទងគ្នាយ៉ាងជិតស្និទជាមួយរដ្ឋាភិបាលអ៊ីរ៉ង់ បានកោតសរសើរចំពោះការវាយប្រហារនោះ ហើយឲ្យដឹងថា ការវាយប្រហារនោះធ្វើឡើងដើម្បីសងសឹកចំពោះអ្វីដែលខ្លួនហៅថា ជាសេចក្ដីរាយការណ៍ខុសអំពីប្រទេសអ៊ីរ៉ង់។
កាលពីពេលថ្មីៗនេះ ក្រសួងការបរទេសសរអ បានបង្កើតគេហទំព័រដែលបញ្ចេញសារតាម Twitter ជាភាសា Farsi ។ ប្រទេសអ៊ីរ៉ង់បានរិះគន់ចំពោះការផ្ដើមគំណិតនេះ ហើយចោទសរអ ថាបានប្រើប្រព័ន្ធអ៊ិនធឺណិតដើម្បីរៀបចំកងកម្លាំងជំទាស់ខ្លួន។
គេមិនដឹងច្បាស់ទេថា តើការវាយប្រហារមកលើសម្លេងសរអ ប្រព្រិត្ដធ្វើទៅតាមរបៀបណាទេ។
នៅចុងទស្សវត្សរ៍ ២០០៩ ក្រុមកងទ័ព្ធអ៊ិនធឺណិតអ៊ីរ៉ង់ អះអាងទទួលខុសត្រូវចំពោះការវាយប្រហារទៅលើគេហទំព័របណ្ដាញទាក់ទងសង្គម Twitter ដែលក្រុមប្រឆាំងរដ្ឋាភិបាលអីរ៉ង់ បានប្រើជាទូទៅ នៅក្នុងការតវ៉ារបស់គេ ក្រោយការបោះឆ្នោតនៅឆ្នាំនោះ។ កាលពីឆ្នាំទៅ កងទ័ព្ធអ៊ិនធឺណិតអ៊ីរ៉ង់ ធ្វើការវាយប្រហារមួយទៅលើប្រព័ន្ធស្វែងរកព័ត៌មាន Baidu របស់ចិន។
ការវាយប្រហារទាំងពីរនេះ ជាការវាយប្រហារលើប្រព័ន្ធឈ្មោះអាស័យដ្ឋានអ៊ិនធឺណិត ឬ domain name system ហៅកាត់ថា DNS ដូចជាការវាយប្រហារមកលើ សម្លេងសរអ នៅពេលនេះដែរ ។ សម្លេងសរអ ឲ្យដឹងថាគ្មានការបាត់បង់ទិន្នន័យ ឬក៏ទិន្នន័យត្រូវបានខូចខាតទេ ហើយថាគេហទំព័រភាគច្រើនដែលត្រូវទទួលរងការវាយប្រហារកំពុងតែប្រតិបត្ដិការធម្មតាវិញហើយ៕
ប្រែសម្រួលដោយកងស៊ីវន
