អ្នកសម្របសម្រួលសហរដ្ឋអាមេរិកកំពុងធ្វើការស្តីពីសំណើមួយ ដើម្បីបញ្ឈប់អរិភាពរវាងអ៊ីស្រាអែលនិងក្រុមប្រដាប់អាវុធហេសបូឡារបស់លីបង់ ដែលចាប់ផ្តើមដោយមានការឈប់បាញ់គ្នារយៈពេល ៦០ថ្ងៃ។ នេះតាមប្រភព២កាលពីថ្ងៃពុធ ក៏ប៉ុន្តែ អ៊ីស្រាអែលបានបង្កើនការវាយប្រហារនិងការទម្លាក់គ្រាប់បែកលើទីក្រុងប្រវត្តិសាស្ត្រ Baalbek របស់លីបង់ បន្ទាប់ពីការចេញការប្រកាសឲ្យជម្លៀសមនុស្សដ៏ច្រើន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ប្រភពទាំងពីរគឺមនុស្សម្នាក់ដែលបានទទួលព័ត៌មានអំពីការចរចានោះ និងមន្ត្រីការទូតជាន់ខ្ពស់ម្នាក់ដែលធ្វើការស្តីពីប្រទេសលីបង់។ ពូគគេបានប្រាប់ទីភ្នាក់ងារសារព័ត៌មាន Reutersថា នឹងត្រូវប្រើរយៈពេល២ខែដើម្បីធ្វើសម្រេចនូវការអនុវត្តឱ្យបានពេញលេញនូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ ១៧០១ ដែលបានអនុម័តនៅឆ្នាំ ២០០៦ ដើម្បីរក្សាតំបន់ភាគខាងត្បូងប្រទេសលីបង់ ឲ្យគ្មានអាវុធនៅលើកលែងក្រោមការសមត្ថកិច្ចរបស់រដ្ឋ។
មន្ត្រីម្នាក់របស់សហរដ្ឋអាមេរិកបាននិយាយថា ពួកមន្ត្រីសេតវិមានមាន លោក Brett McGurk និងលោក Amos Hochstein នឹងទៅបំពេញទស្សនកិច្ចនៅប្រទេសអ៊ីស្រាអែល ដើម្បីចរចាបញ្ហានានា«រួមទាំងតំបន់ហ្កាហ្សា ប្រទេសលីបង់ ចំណាប់ខ្មាំង អ៊ីរ៉ង់និងបញ្ហាធំៗទៀតរបស់តំបន់»។
មេដឹកនាំរបស់ក្រុមហេសបូឡា លោក Naim Qassemបាននិយាយថា ក្រុមដែលគាំទ្រដោយអ៊ីរ៉ង់នឹងយល់ព្រមចំពោះការឈប់បាញ់គ្នានៅក្នុងរង្វង់សមត្ថកិច្ច ប្រសិនបើ អ៊ីស្រាអែលចង់បញ្ឈប់សង្គ្រាម ក៏ប៉ុន្តែ បាននិយាយថា អ៊ីស្រាអែលរហូតមកទល់ពេលនេះមិនបានយល់ព្រមដល់សំណើណាមួយដែលអាចត្រូវពិភាក្សាគ្នាទេ។
នេះជាសុន្ទរកថាលើកទី១ របស់លោក Qassem ជាអគ្គលេខា មួយថ្ងៃបន្ទាប់ពីក្រុមហេសបូឡា បានប្រកាសនូវការបោះឆ្នោតរបស់លោកចំពោះតំណែងនេះបន្ទាប់ពីអ៊ីស្រាអែលបានធ្វើឃាតលោក Hassan Nasrallah មេដឹកនាំយូរអង្វែងរបស់ក្រុមនោះ។
កិច្ចខំប្រឹងប្រែងឈប់បាញ់គ្នានៅពេលថ្មីៗបំផុតនេះ កើតមានឡើងនៅពេលដែលកិច្ចប្រតិបត្តិការរបស់អ៊ីស្រាអែលប្រឆាំងនឹងក្រុមហេសបូឡានៅក្នុងប្រទេសលីបង់ បានបន្តរីកកាន់តែធំឡើង។
កងទ័ពរបស់អ៊ីស្រាអែលបានចាប់ផ្តើមការវាយប្រហារតាមអាកាសរបស់ខ្លួនកាលពីថ្ងៃពុធ លើទីក្រុង Baalbek ភាគខាងកើតលីបង់ ដែលមានព្រះវិហានរ៉ូម៉ាំងដ៏ល្បីល្បាញមួយ ហើយនិងភូមិនានានៅក្បែរនោះ។ នេះបើតាមប្រភពសន្តិសុខដែលបានប្រាប់ទីភ្នាក់ងារសារព័ត៌មាន Reuters បន្ទាប់ពីការប្រការឲ្យជម្លៀសរបស់អ៊ីស្រាអែល។ ជនជាតិលីបង់កាន់សាសនាអ៊ីស្លាមនិកាយស៊ីអ៊ីដរាប់ពាន់នាក់ រួមមានអ្នកជាច្រើនពីតំបន់ទាំងនោះដែលបានស្វែងរកការជ្រកពួនក្នុងទីក្រុង បានរត់គេចខ្លួនបន្ទាប់ពីការព្រមានត្រូវបានចេញ៕
វេទិកាបញ្ចេញមតិ