ប្រទេសរុស្ស៊ីនិងអ៊ីរ៉ង់កំពុងបង្កើនការវាយប្រហារលើប្រព័ន្ធអ៊ីនធឺណិតនិងកុំព្យូទ័ររដ្ឋាភិបាលសហរដ្ឋអាមេរិក ហើយថែមទាំងកំពុងបង្កើនយុទ្ធនាការផ្សព្វផ្សាយព័ត៌មានក្លែងក្លាយ ដោយសង្ឃឹមថា នឹងធ្វើឲ្យប៉ះពាល់ដល់ទំនុកចិត្តរបស់អ្នកបោះឆ្នោតអាមេរិកាំងមិនដល់២សប្តាហ៍មុនការបោះឆ្នោតប្រធានាធិបតីនៅថ្ងៃទី៣ ខែវិច្ឆិកា។
ការព្រមានកាលពីថ្ងៃព្រហស្បតិ៍មកពីមន្ត្រីស៊ើបការណ៍សម្ងាត់និងមន្ត្រីសន្តិសុខបោះឆ្នោតសហរដ្ឋអាមេរិក បានកើតមានឡើងមិនដល់២៤ម៉ោងផងបន្ទាប់ពីនាយកស៊ើបការណ៍សម្ងាត់ជាតិ បានស្តីបន្ទោសប្រទេសអ៊ីរ៉ង់ចំពោះការចាប់ផ្តើមវាយប្រហារលើកទី១លើការបោះឆ្នោតនៅពេលខាងមុខ ដោយបានចោទប្រកាន់ថារដ្ឋាភិបាលក្រុងតេហេរ៉ង់ស្ថិតនៅខាងក្រោយនៃការបោកបញ្ឆោតតាមអ៊ីមែលដែលមានគោលបំណងបំភិតបំភ័យពួកអ្នកបោះឆ្នោត។
ការណែនាំកាលពីថ្ងៃព្រហស្បតិ៍ពីសំណាក់ការិយាល័យស៊ើបអង្កេតសហព័ន្ធ FBI និងទីភ្នាក់ងារសន្តិសុខប្រព័ន្ធកំព្យូទ័រនិងហេដ្ឋារចនាសម្ព័ន្ធបានបញ្ជាក់ថា អ៊ីមែលបំភិតបំភ័យអ្នកបោះឆ្នោតនិងសមត្ថភាពរបស់រុស្ស៊ីនិងអ៊ីរ៉ង់ដើម្បីចូលក្នុងប្រព័ន្ធចុះឈ្មោះបោះឆ្នោតគឺជាការចាប់ផ្តើមនៃយុទ្ធនាការកាន់តែធំឡើងដើម្បីធ្វើឲ្យអន្តរាយដល់ការបោះឆ្នោតសហរដ្ឋអាមេរិក៕
