ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

ក្រុម​អ្នក​ចរចា​អាមេរិក​ធ្វើ​ដំណើរ​ដល់​ប្រទេស​ចិន​ដើម្បី​ពិភាក្សា​រឿង​ពាណិជ្ជកម្ម


រដ្ឋមន្ត្រី​ក្រសួង​ហិរញ្ញវត្ថុ​អាមេរិក​លោក Steven Mnuchin និង​ក្រុម​ប្រតិភូ​ចាកចេញ​ពី​សណ្ឋាគារ​មួយ​នៅ​ក្នុង​ក្រុង​ប៉េកាំង កាលពី​ថ្ងៃទី២៩ ខែមីនា ឆ្នាំ២០១៩។

ក្រុម​អ្នក​ចរចា​កំពូលៗ​របស់​សហរដ្ឋ​អាមេរិក​បាន​ធ្វើ​ដំណើរ​ទៅ​ដល់​ទីក្រុង​ប៉េកាំង ប្រទេស​ចិន នៅ​ថ្ងៃ​អង្គារ​នេះ ក្នុង​ក្ដី​សង្ឃឹម​ថា​នឹង​មាន​ការ​វិវឌ្ឍ​ទៅ​មុខ​នៅ​ក្នុង​ការ​ពិភាក្សា​ជុំ​ថ្មី​លើក​នេះ​ជាមួយ​នឹង​ក្រុម​អ្នក​ចរចា​ចិន ដើម្បី​សម្រេច​ឲ្យ​បាន​នូវ​កិច្ច​ព្រមព្រៀង​មួយ​ដើម្បី​បញ្ចប់​សង្គ្រាម​ពាណិជ្ជកម្ម​រវាង​ប្រទេស​ទាំង​ពីរ។

រដ្ឋមន្ត្រី​ក្រសួង​ហិរញ្ញវត្ថុ​អាមេរិក​លោក Steven Mnuchin និង​អ្នក​តំណាង​ពាណិជ្ជកម្ម​អាមេរិក​លោក Robert Lighthizer ជា​អ្នក​ដឹកនាំ​ក្រុម​ចរចា​ខាង​សហរដ្ឋ​អាមេរិក​ដើម្បី​ចូលរួម​នៅ​ក្នុង​ការ​ចរចា​ពាណិជ្ជកម្ម​កម្រិត​ខ្ពស់​ជុំ​ទី ១០ នៅ​សប្ដាហ៍​នេះ ដោយ​ខាង​ភាគី​ចិន​មាន​លោក​ឧបនាយករដ្ឋមន្ត្រី Liu He ជា​អ្នក​តំណាង​រដ្ឋាភិបាល​ក្រុង​ប៉េកាំង។

បន្ទាប់ពី​ការ​ចរចា​នេះ លោក Liu He ត្រូវ​គេ​រំពឹង​ថា​នឹង​ធ្វើ​ដំណើរ​មក​កាន់​រដ្ឋធានី​វ៉ាស៊ីនតោន សហរដ្ឋ​អាមេរិក​នៅ​ថ្ងៃ​ទី ៨ ខែ​ឧសភា​ខាង​មុខ​នេះ ដើម្បី​បន្ត​ការ​ចរចា។

លោក Mnuchin បាន​ប្រាប់​អ្នក​កាសែត​នៅ​សណ្ឋាគារ​របស់​លោក​នៅ​ក្នុង​ទីក្រុង​ប៉េកាំង​នៅ​មុន​ការ​ចរចា​នេះ​ចាប់ផ្ដើម​យ៉ាង​ដូច្នេះ​ថា៖ «យើង​សង្ឃឹម​ថា នឹង​សម្រេច​បាន​នូវ​ការ​វិវឌ្ឍ​ដ៏​សំខាន់​នៅ​ក្នុង​ការ​ពិភាក្សា​ទាំង​ពីរ​នេះ‍»។

លោក Mnuchin បាន​បដិសេធ​មិន​បញ្ជាក់​អំពី​បញ្ហា​ដែល​នឹង​ពិភាក្សា​នៅ​ក្នុង​ការ​ចរចា​នេះ ប៉ុន្តែ​លោក​បាន​ប្រាប់​កាសែត The New York Times ថា ការ​ពិភាក្សា​នេះ​នឹង​បន្ត​ផ្ដោត​លើ​ការ​អនុវត្ត​របស់​ចិន​លើ​ផ្នែក​ឧស្សាហកម្ម​ដែល​ចិន​រួម​ចំណែក​ឧបត្ថម្ភ​មួយ​ចំនួន។

កាល​ពី​សប្ដាហ៍​មុន ប្រធានាធិបតី​ចិន​លោក Xi Jinping បាន​សន្យា​លុប​ចោល​នូវ​ការ​រួម​ចំណែក​ឧបត្ថម្ភ​មិន​ត្រឹមត្រូវ​របស់​រដ្ឋាភិបាល​ចិន​ចំពោះ​ក្រុមហ៊ុន​ចិន ដោយ​លើក​ឡើង​ផ្ទាល់​នូវ​ការ​ទាមទារ​ចម្បងៗ​របស់​សហរដ្ឋ​អាមេរិក៕

XS
SM
MD
LG