មន្ត្រីយោធាស.រ.អា.ជាន់ខ្ពស់ម្នាក់នៅក្នុងភូមិភាគមជ្ឈឹមបូព៌ាបាននិយាយថាល្បឿននៃការទម្លាក់គ្រាប់បែករបស់ស.រ.អា.លើទីដៅពួកជនសកម្មប្រយុទ្ធរដ្ឋ ឥស្លាមក្នុងប្រទេសស៊ីរី និងប្រទេសអ៊ីរ៉ាក់ទំនងជានឹងកើនខ្លាំងជាងមុនក្នុងពេលប៉ុន្មានសប្តាហ៍ខាងមុខនេះ ក្រោយពីមានភាពស្ងប់ស្ងៀមក្នុងខែកញ្ញា និងខែតុលាមកនោះ។
លោកឧត្តមសេនិយ៍ឯក Charles Brown នៃកងទ័ពអាកាសស.រ.អា.បានមានប្រសាសន៍កាលពីថ្ងៃសៅរ៍ថា ការបន្ថយការឆ្មក់ទម្លាក់គ្រាប់បែកដោយក្រុមចម្រុះបណ្តាលមកពីធាតុអាកាសមិនល្អ និងការគ្មានចលនារបស់កងកម្លាំងពួករដ្ឋឥស្លាមនៅលើដី។ លោកបាននិយាយថា ក្រុមមន្ត្រីចាប់ផ្តើមឃើញចលនានៅលើដីរបស់ពួកជនសកម្ម ប្រយុទ្ធរដ្ឋឥស្លាមច្រើនជាងមុន។
ថ្លែងទៅកាន់ក្រុមអ្នកកាសែតនៅខាងក្រៅសន្និសីទអន្តរជាតិនៃក្រុមមេបញ្ជាការកងទ័ពអាកាសនៅក្នុងក្រុង Dubai លោក Brown បានច្រានចោលការរិះគន់ដែលថាក្រុមចម្រុះដឹកនាំដោយស.រ.អា.បានធ្វើការវាយប្រហារតាមអាកាសតិចជាងមុនដោយសារមានការឆ្មក់វាយប្រហារតាមអាកាសដោយកងយន្តហោះចម្បាំងរុស្សីនៅក្នុងប្រទេសស៊ីរី។
លោក Brown បានថ្លែងថាកិច្ចព្រមព្រៀងមួយដែលត្រូវបានចុះហត្ថលេខាដោយស.រ.អា. និងប្រទេសរុស្សីកាលពីខែមុនដើម្បីកាត់បន្ថយការគ្រោះថ្នាក់នៅក្នុងអាកាសដោយកងយន្តហោះចម្បាំងនៃប្រទេសទាំងពីរមិនបានបង្អាក់កងកម្លាំងស.រ.អា.មិនឱ្យធ្វើការវាយប្រហារទេ នៅពេលណាមានតម្រូវការនោះ៕
