ប្រមុខការទូតអាមេរិក បានថ្លែងថា សហរដ្ឋអាមេរិកប្តេជ្ញាចិត្ត ថាខ្លួននឹងព្យាយាមជួយកម្ពុជា នៅក្នុងសកម្មភាពកម្ចាត់មីននិងបោសសម្អាតគ្រាប់មិនទាន់ផ្ទុះ ដែលនៅតែបន្តឆក់យកអាយុជីវិតពលរដ្ឋនៅក្នុងប្រទេសនេះ ទោះបីសង្គ្រាមបានបញ្ចប់ទៅហើយនោះក្តី ។
លោក ចន ឃែរី (John Kerry) រដ្ឋមន្ត្រីការបរទេសអាមេរិក ដែលទើបនឹងបញ្ចប់ដំណើរទស្សនកិច្ចរយៈពេលពីរថ្ងៃរបស់លោកនៅក្នុងប្រទេសកម្ពុជានោះ បានមានប្រសាសន៍ថា សហរដ្ឋអាមេរិក បានធ្វើការងារដើម្បីដោះគ្រាប់មិនទាន់ផ្ទុះ ដែលគំរាមកំហែងនិងបន្តសម្លាប់ហើយនឹងធ្វើឲ្យរបួសពលរដ្ឋកម្ពុជាជាច្រើននៅឡើយនោះ។ នេះបើយោងតាមសេចក្តីប្រកាសព័ត៌មានមួយរបស់ក្រសួងការបរទេសអាមេរិក ដែលបានដកស្រង់ប្រសាសន៍របស់លោក ឃែរី នៅពេលដែលលោកថ្លែងទៅកាន់បុគ្គលិកនៃស្ថានទូតអាមេរិកនៅក្នុងរាជធានីភ្នំពេញ កាលពីថ្ងៃអង្គារ។
លោក ឃែរី បានថ្លែងថា ទោះបីជាចំនួនអ្នកស្លាប់និងរបួសដោយសារគ្រាប់មិនទាន់ផ្ទុះបានថយចុះក៏ដោយ ក៏ចំនួននេះ នៅតែមានច្រើនក្នុងមួយឆ្នាំៗ។
«យើងយល់ពីការតាំងចិត្ត [ដោះស្រាយបញ្ហានេះ] ហើយយើងប្តេជ្ញាថា នឹងព្យាយាមធ្វើឲ្យបានតាមការទទួលខុសត្រូវរបស់យើង»។
នៅពេលធ្វើសង្គ្រាមជាមួយប្រទេសវៀតណាម ក្នុងអំឡុងចុងទសវត្ស១៩៦០ និងដើមទសវត្ស១៩៧០ សហរដ្ឋអាមេរិក បានទម្លាក់គ្រាប់បែកយ៉ាងច្រើនមហិមាលើប្រទេសកម្ពុជា ដែលនៅជាប់ខាងប្រទេសវៀតណាមនោះ គឺច្រើនជាងចំនួនគ្រាប់បែកដែលសហរដ្ឋអាមេរិក បានទម្លាក់លើប្រទេសជប៉ុនក្នុងសង្គ្រាមលោកលើកទី២ទៅទៀត ។
រហូតមកដល់ពេលនេះ គ្រាប់បែកខ្លះដែលទម្លាក់ពីយន្តហោះចម្បាំងក្នុងសម័យសង្គ្រាមនោះ នៅមិនទាន់ផ្ទុះនៅឡើយ ហើយនៅរាយប៉ាយនៅលើផ្ទៃដីកម្ពុជានៅឡើយទេ។
យោងតាមតួលេខនៃប្រព័ន្ធព័ត៌មានជនរងគ្រោះដោយសារគ្រាប់មីននិងគ្រាប់មិនទាន់ផ្ទុះនៅកម្ពុជា ចំនួនអ្នកស្លាប់និងរបួសដោយសារគ្រាប់មីននិងគ្រាប់មិនទាន់ផ្ទុះពីឆ្នាំ១៩៧៩ ដល់២០១៣ គឺមានជាង៦ម៉ឺន៤ពាន់នាក់។ ហើយជនពិការដៃជើង ដោយសារសំណល់នៃសង្គ្រាមដែលអូសបន្លាយជាង៣ទសវត្សនៅក្នុងប្រទេសនោះ មានជាង៤ម៉ឺននាក់ ដែលធ្វើឲ្យប្រទេសនេះ មានអត្រាជនពិការនេះ ខ្ពស់ជាងគេមួយក្នុងពិភពលោក។
មជ្ឈមណ្ឌលសកម្មភាពកម្ចាត់មីនកម្ពុជា ឬ CMAC បានប៉ាន់ប្រមាណថា នៅមានគ្រាប់មីន និងគ្រាន់មិនទាន់ផ្ទុះផ្សេងៗទៀត ពី៤ទៅ៦លានគ្រាប់ទៀត ដែលនៅបង្កប់ក្នុងដីនៃប្រទេសកម្ពុជានៅឡើយ៕
