កាលពីថ្ងៃសុក្រ ស.រ.អា.បានចាត់វិធានការដើម្បីបង្កើនសន្តិសុខនៅឯចំណតយន្តហោះក្នុងភូមិភាគមជ្ឈឹមបូព៌ាដែលនៅទីនោះយន្តហោះដឹកអ្នកដំណើរ និងទំនិញហោះមកកាន់ស.រ.អា. ទោះណាជាក្រុមអ្នកស៊ើបអង្កេតបន្តការស៊ើបអង្កេតរបស់ពួកគេអំពីថាតើគ្រាប់បែកជាមូលហេតុនៃការផ្ទុះយន្តហោះដឹកអ្នកដំណើរមួយគ្រឿងដែលបានធ្លាក់នៅក្នុងឧបទ្វីប Sinai កាលពីសប្តាហ៍មុននេះឬយ៉ាងណា។
លោក Jeh Johnson រដ្ឋមន្ត្រីក្រសួងសន្តិសុខមាតុភូមិបានមានប្រសាសន៍ថាលោកចាត់វិធានការប្រុងប្រយ័ត្ន «ដោយមានការប្រុងប្រយ័ត្នបន្ថែម» ទៅលើការតម្រូវខាងសន្តិសុខអាកាសចរណ៍ដែលមានស្រាប់នៅឯអាកាសយានដ្ឋានដែលមានជើងហោះយន្តហោះដោយផ្ទាល់មកកាន់ស.រ.អា.។ លោកមិនបានបញ្ជាក់អំពីឈ្មោះចំណតយន្តហោះដែលស.រ.អា.នឹងបង្កើនកិច្ចការពារសន្តិសុខទេ។
លោក Johnson បានមានប្រសាសន៍ថានឹងមាន «ការឆែកឆេរថែមទៀត» នូវឥវ៉ាន់ដាក់ក្នុងយន្តហោះ ការវាយតម្លៃសន្តិសុខនៅឯព្រលានយន្តហោះដែលនឹងត្រូវធ្វើជាមួយក្រុមមន្ត្រីបរទេស និងការស្នើផ្តល់ជំនួយរបស់ស.រ.អា.ដើម្បីពង្រឹងសន្តិសុខ។
លោកបាននិយាយថា ទីភ្នាក់ងាររបស់លោកនឹងបន្តវាយតម្លៃលើបញ្ហាសន្តិសុខនៅឯចំណតយន្តហោះបរទេសនិង «ពិចារណាអំពីថាតើត្រូវមានការកែប្រែបន្ថែមទៀតដែរឬទេ»៕