ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​កំពូល​​នឹង​បើក​​សវនាការ​លើ​បណ្តឹង​លុប​ចោល​ច្បាប់​សុខភាព Obamacare


អគារ​តុលាការ​កំពូល​សហរដ្ឋអាមេរិក​ពេល​ថ្ងៃ​រៀបលិច​ ក្នុង​រដ្ឋធានី​វ៉ាស៊ីនតោន ថ្ងៃទី២ ខែវិច្ឆិកា ឆ្នាំ២០២០។

តុលាការ​កំពូល​សហរដ្ឋ​អាមេរិក​នឹង​ស្តាប់​អំណះអំណាង​ផ្ទាល់​មាត់​នៅ​ថ្ងៃ​អង្គារ ជុំវិញការ​ប្រឹង​ប្រែង​របស់​គណបក្ស​សាធារណរដ្ឋ​ ក្នុង​ការលុប​ចោល​ច្បាប់សុខភាព Affordable Care Act ​ហៅ​ក្រៅ​ថា Obamacare​ ​ ដែលត្រូវ​បាន​ដាក់​ឱ្យ​ប្រើ​ប្រាស់​ក្នុង​យុគសម័យ​អតីត​ប្រធានាធិបតី​លោក​ បារ៉ាក់ អូបាម៉ា (Barack Obama)។

សវនាការ​នេះ​កើតឡើងប៉ុន្មាន​សប្តាហ៍​ ក្រោយពីអ្នកស្រី​ Amy Coney Barrett ​បាន​ក្លាយ​ជា​ចៅក្រម​តុលាការ​កំពូលមួយ​រូប ហើយ​ដែល​នេះធ្វើ​ឱ្យ​សំឡេង​ចៅក្រម​ខាង​ក្រុម​អភិរក្សនិយម​មានសំឡេង​ភាគ​ច្រើន​៦ទល់​នឹង​៣​សំឡេង។

ចំណុច​សំខាន់​នៃ​បណ្តឹងប្រឆាំង​ច្បាប់​សុខភាព​ឆ្នាំ​២០១០​នេះ​ ​ គឺ​ការ​តម្រូវ​ឱ្យ​ពលរដ្ឋ​ភាគ​ច្រើន​បំផុត​ មាន​ការ​ធានា​រ៉ាប់រង​សុខភាពក្នុង​កម្រិត​អប្បបរមា​មួយ​ បើ​មិន​ដូច​នេះ​ទេ​ នឹង​ត្រូវ​ទទួល​រងនូវ​ការ​ផាក​ពិន័យ។​

នៅ​ក្នុងបណ្តឹង​ដែល​បាន​ធ្វើ​ឡើង​ក្នុង​ឆ្នាំ​២០១២​នោះ តុលាការ​កំពូល​ បាន​សម្រេច​ថា​ ការ​តម្រូវ​ឱ្យ​បង់ការ​ធានា​រ៉ាប់រង​សុខភាពនោះ​ត្រូវ​បាន​អនុញ្ញាតដោយគេ​ចាត់​ទុក​វា​ដូច​ជា​ពន្ធអាករ​មួយ​ ដែល​សភា​អាមេរិក​អាចយក​បាន។ ប៉ុន្តែ​ក្នុង​ឆ្នាំ​២០១៧​នៅ​ពេល​ដែលគណបក្ស​សាធារណរដ្ឋ​ បាន​គ្រប់គ្រង​សភា​អាមេរិក​ទាំង​មូល​ គេបាន​ប្តូរ​ការផាក​ពិន័យ​ជា​ប្រាក់នោះមក​ចំនួនសូន្យ​វិញ។

នៅ​ពេល​នេះ រដ្ឋ​មួយ​ក្រុមដែល​ដឹកនាំ​ដោយ​រដ្ឋ Texas ​ចង់​ឱ្យ​មាន​ការលុប​ចោលច្បាប់​ Obamacare នេះតែ​ម្តង។ ពួក​គេ​អះ​អាង​ថា ការ​តម្រូវឱ្យបុគ្គល​នីមួយៗ​ ទិញការ​ធានា​រ៉ាប់រង​ផ្នែក​សុខភាព ជា​រឿងមិន​ស្រប​តាម​រដ្ឋធម្មនុញ្ញ​ ហើយ​លើក​ឡើង​ថា ​ប្រសិន​បើ​គ្មាន​ចំណុច​នោះទេ​ ច្បាប់​ទាំង​មូល​គួរត្រូវ​លុប​ចោល​តែ​ម្តង​ទៅ។

លោក ចូ បៃដិន (Joe Biden)​ ដែល​ត្រូវបាន​ព្យាករណ៍​ថា ​ជាប់​ឆ្នោត​ជា​ប្រធានាធិបតី​អាមេរិក​ថ្មី​នោះ​ កំពុង​លើក​តម្កើង​ច្បាប់​ Obamacare ខណៈ​បណ្តឹង​ទាក់ទង​នឹង​ច្បាប់​នេះ ​កំពុងស្ថិត​ក្នុង​ដៃ​តុលាការ​កំពូល​នោះ។​

ទី​ភ្នាក់​ងារ​ព័ត៌​មាន​ AP រាយការណ៍​ថា​ លោក ​បៃដិន​ នឹង​ថ្លែង​សុន្ទរកថា​មួយ​ ជុំវិញ​ច្បាប់​សុខភាព​ដែល​មាន​ឈ្មោះ​ជា​ផ្លូវការ​ថា Affordable Care Actនេះ​ ​នៅ​ថ្ងៃ​អង្គារដែរ។

សុន្ទរកថា​របស់​លោកBiden ​នឹង​ឆ្លុះ​បញ្ចាំង​ពី​សារៈសំខាន់​ ដែល​លោក​ផ្តោត​ទៅ​លើ​វិស័យ​សុខភាព​ ក្នុង​ពេល​ដែល​លោក​កំពុង​ត្រៀម​ខ្លួន​ចូល​កាន់​តំណែង​ជា​ប្រធានាធិបតី ក្នុង​ខែ​មករាខាង​មុខ ​ខណៈ​មានជំងឺរាត​ត្បាតជា​សាកលដ៏​ធ្ងន់ធ្ងរ​បំផុតក្នុង​រយៈពេល​ជាងមួយសតវត្ស​កន្លង​មក​នេះ​។ កាល​ពី​ថ្ងៃ​ច័ន្ទ​ សហរដ្ឋ​អាមេរិក​មាន​អ្នក​ឆ្លង​កូវីដ១៩​កើន​លើស​១០​លាន​នាក់។

តុលាការ​កំពូល​ត្រូវ​បាន​គេ​រំពឹង​ថា ​នឹង​ចេញ​សេចក្តី​សម្រេច​ក្នុង​រឿង​ក្តី​នេះ​នៅ​ចុង​ខែ​មិថុនា ឬ​ដើម​ខែ​កក្កដា ឆ្នាំ​ក្រោយ។

ប្រសិន​បើ​តុលាការ​សម្រេច​លុប​ចោល​ច្បាប់​នេះ​មែន នោះ​មនុស្ស​រហូត​ដល់​ ២០ ​លាន​នាក់​អាច​បាត់បង់​ការ​ធានារ៉ាប់រង​សុខភាព​របស់​ពួក​គេ ហើយ​ក្រុមហ៊ុន​ធានារ៉ាប់រ៉ង​មាន​សិទ្ធិ​បដិសេធ​មិន​ទទួល​អ្នក​ជំងឺ​ដែល​មាន​រោគប្រចាំ​កាយ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG