វ៉ាស៊ីនតោន៖ រដ្ឋបាលលោកអូបាម៉ាបានគាំទ្រដោយចំហនូវសិទ្ធិរបស់ក្រុមបាតុករក្នុងការរំជើបរំជួលនយោបាយនៅមជ្ឈឹមបូព៌ាដែលកំពុងគំរាមទៅលើរដ្ឋាភិបាលប្រទេសអេហ្ស៊ីព និងរដ្ឋាភិបាលឯទៀតៗ ដែលធ្លាប់ជាសម្ព័ន្ធមិត្តយុទ្ធសាស្ត្រគន្លឹះរបស់ស.រ.អា.។ ក្រុមអ្នកវិភាគនិយាយថា យុទ្ធសាស្រ្តនេះជាការផ្សងព្រេងមួយថារដ្ឋាភិបាលថ្មីដែលនឹងងើបចេញមកពីចលាចលនេះ នឹងក្លាយទៅជារដ្ឋាភិបាលមួយ មិនជ្រុលនិយម ហើយគាំទ្រផលប្រយោជន៍ស.រ.អា.។
សូរសម្តីរបស់ស.រ.អា.ត្រូវបានបន្លឺដោយលោកប្រធានាធិបតីអូបាម៉ាផ្ទាល់កាលពីថ្ងៃព្រហស្បតិ៍ ពេលលោកចេញបង្ហាញខ្លួនក្នុងវីដេអូមួយរបស់ Website YouTube ដ៏មានប្រជាប្រីយ៍។
លោកប្រធានាធិបតីអូបាម៉ាថ្លែងថា ខណៈដែលលោកHosni Mubarak ប្រធានាធិបតី អេហ្ស៊ីព ដែលជាសម្ព័ន្ធមិត្តរបស់ស.រ.អា.ជាយូរមកហើយលើវិស័យសំខាន់ជាច្រើន ដែលមានទាំងដំណើរការសន្តិភាពរវាងប្រជាជនអ៊ិស្រាអែលជាមួយប្រជាជនប៉ាឡេស្ទីនផងនោះ សេចក្តីត្រូវការឲ្យមានការកែទម្រង់នយោបាយនៅអេហ្ស៊ីពក៏ជារឿងជាក់ច្បាស់និងជាការកត់សម្គាល់ដោយសហរដ្ឋអាមេរិកតាំងពីយូរមកហើយ។
«ខ្ញុំតែងបានជម្រាបលោកថា អេហ្ស៊ីពត្រូវធ្វើឲ្យប្រាកដថា មានការចម្រើនទៅមុខក្នុងការកែទម្រង់នយោបាយ និងការកែទម្រង់សេដ្ឋកិច្ច ជារឿងសំខាន់ ដាច់ខាតត្រូវតែធ្វើសម្រាប់សុខុមាលភាពយូរអង្វែងរបស់ប្រជាពលរដ្ឋអេហ្ស៊ីព ហើយលោកអ្នកអាចឃើញហើយនូវការតប់ប្រមល់ក្នុងការរង់ចាំឲ្យមានការកែទម្រង់នេះ ដែលគេបញ្ចេញជាបាតុកម្មនៅតាមផ្លូវ។ ក្តីសង្ឃឹមធំរបស់ខ្ញុំ ឥឡូវនេះគឺអំពើហិង្សាមិនមែនជាចម្លើយក្នុងការដោះស្រាយបញ្ហានៅអេហ្ស៊ីពទេ ដូច្នេះរដ្ឋាភិបាលត្រូវតែប្រយ័ត្ន ជៀសវាងការប្រើអំពើហិង្សា ហើយប្រជាពលរដ្ឋដែលធ្វើបាតុកម្មនៅតាមផ្លូវក៏ត្រូវតែប្រយ័ត្នផងដែរ កុំទៅស្រវាយកអំពើហិង្សា»។
ទំនាក់ទំនងអេហ្ស៊ីពជាមួយអ៊ិស្រាអែលក្នុងសន្ធិសញ្ញាសន្តិភាព ជាយូរមកហើយគឺជាគន្លឹះសំខាន់ក្នុងគោលនយោបាយស.រ.អា.នៅក្នុងតំបន់ ក៏ដូចជានយោបាយមិនជ្រុលនិយមរបស់រដ្ឋាភិបាលទុយនេហ្ស៊ីដែលថ្មីៗនេះទើបតែធ្លាក់ចេញពីតំណែង ហើយនិងថ្មីៗនេះទៀត កិច្ចសហប្រតិបត្តិការរបស់រដ្ឋាភិបាលយេម៉េនប្រឆាំងនឹងភេរវកម្ម ដែលឥឡូវរដ្ឋាភិបាលនេះក៏កំពុងប្រឈមនឹងបាតុកម្មតាមផ្លូវប្រឆាំងនឹងខ្លួនផងដែរ។
លោក Marc Ginsberg អតិតឯកអគ្គរដ្ឋទូតអាមេរិកនៅប្រទេស Marocដែលសព្វថ្ងៃជាអ្នកនិពន្ធខ្ទង់កាសែតសម្រាប់គេហទំព័រនយោបាយរបស់កាសែត Huffington Postថ្លែងថា យុទ្ធសាស្ត្ររបស់រដ្ឋបាលមានគ្រោះថ្នាក់ ដោយលោកកត់សម្គាល់ថា ការគាំទ្ររបស់ស.រ.អា.ដល់ការបោះឆ្នោតដោយសេរីក្នុងចំណោមជនជាតិប៉ាឡេស្ទីនកាលពីឆ្នាំ២០០៦ បានធ្វើឲ្យចលនានិយមជ្រុល Hamas មានអំណាច។
លោក Daniel Brumberg អ្នកប្រាជ្ញម្នាក់ខាងការកែទម្រង់នៅមជ្ឈឹមបូព៌ានៃវិទ្យាស្ថានសន្តិភាពក្នុងរដ្ឋធានី វ៉ាស៊ីនតោន ថ្លែងថា អាជីពរបស់លោក Hosni Mubarak ដែលជាសម្ព័ន្ធមិត្តរបស់សហរដ្ឋអាមេរិក ប្រហែលជាជិតឈានដល់ទីបញ្ចប់ហើយ។ ប៉ុន្តែលោកថ្លែងថា លទ្ធផលនយោបាយនៅក្នុងប្រទេសអេហ្ស៊ីពមិនច្បាស់ជាថា ជាការថយក្រោយមួយសម្រាប់សហរដ្ឋអាមេរិកទេ។
«សភាពការណ៍នៅប្រទេសអេហ្ស៊ីព បច្ចុប្បន្ននេះ ផ្តល់ឱកាសមួយសម្រាប់ក្រុមអ្នកកែទម្រង់នៅក្នុងគណបក្សប្រឆាំង និងប្រហែលជាសម្រាប់រដ្ឋាភិបាលផងដែរដោយលោកបង្ហាញថា មានបេក្ខជនថ្មី នៅក្នុងការបោះឆ្នោតជ្រើសរើសប្រធានាធិបតីនិងថា មានកិច្ចប្រឹងប្រែងពិតប្រាកដដើម្បីបើកឱកាសជូនគណបក្សប្រឆាំង។ នេះជាឱកាសមួយ។ ប៉ុន្តែក្នុងកាលៈទេសៈនេះ វាជាការពិបាកឲ្យលោក Hosni Mubarak ឈរឈ្មោះជាប្រធានាធិបតី ហើយឈ្នះឆ្នោតដោយស្របច្បាប់នោះ។ នេះជាលទ្ធផលមួយដែលគ្មានអ្នកណាជឿបានទេ នៅពេលនេះ»។
លោក William Zartman អ្នកប្រាជ្ញខាងអាហ្រ្វិកខាងជើងដែលជាសាស្ត្រាចារ្យចូលនិវត្តន៍ម្នាក់ នៅសាលាកិច្ចការអន្តរជាតិជាន់ខ្ពស់នៃសាកលវិទ្យាល័យ John Hopkins ក្នុងរដ្ឋធានីវ៉ាស៊ីនតោន ថ្លែងថា សហរដ្ឋអាមេរិកធ្វើត្រូវក្នុងការយល់ស្របជាមួយក្រុមបាតុករ និងអ្នកចង់បានលទ្ធិប្រជាធិបតេយ្យ នៅប្រទេសអេហ្ស៊ីព ទោះជាអាមេរិកផ្តល់តម្លៃដល់ការទាក់ទង៣០ឆ្នាំជាមួយលោកប្រធានាធិបតី Mubarak ក៏ដោយ។
«លោកMubarakមានសារៈសំខាន់យ៉ាងខ្លាំងចំពោះយើងក្នុងរឿងនយោបាយ នៅមជ្ឈឹមបូព៌ា និងបញ្ហាអ៊ិស្រាអែល និងក្រុមជនប៉ាឡេស្ទីន។ ដូច្នេះ យើងមានការប្រុងប្រយ័ត្នអំពីការប្រព្រឹត្តរបស់យើងទៅលើលោកMubarak។ ហើយយើងមានការប្រទាញប្រទង់រវាងជំនឿលទ្ធិប្រជាធិបតេយ្យរបស់យើងនិងសេចក្តីត្រូវការសម្ព័ន្ធមិត្តរបស់យើង។ នេះជារឿងដែលប្រទេសមួយដែលមានគោលជំហរដូចសហរដ្ឋអាមេរិក ត្រូវប្រឈមមុខ។ប៉ុន្តែខ្ញុំសង្ឃឹមថា យើងទទួលស្គាល់កាន់តែច្រើនឡើងថា ពួកបាតុករទាំងនេះជាមនុស្សរបស់យើង»។
លោក Zartman ថ្លែងថា ការបះបោរដែលបានផ្តួលរំលំរដ្ឋាភិបាលទុយនេហ្ស៊ី ជាការបះបោររបស់ពលរដ្ឋ មិនមែនរបស់សាសនាអ៊ិស្លាមទេ។ លោកថ្លែងថា ពិតមែនតែពួកអ៊ិស្លាម ដូចជាពួក Muslim Brotherhood ចេញមុខចេញមាត់ក្នុងចំណោមកងកម្លាំងប្រឆាំងនៅប្រទេសអេហ្ស៊ីពក៏ដោយ ក៏គេមិនអាចសន្មត់ថា រដ្ឋាភិបាលក្រោយជំនាន់លោកMubarak នៅប្រទេសអេហ្ស៊ីព នឹងមានភាពនិយមជ្រុល ហើយលុបចោលសន្តិភាពជាមួយអ៊ិស្រាអែលនោះទេ។
មួយថ្ងៃមុនការបះបោរទម្លាក់ប្រធានាធិបតី Zine el-Abidine Ben Aliនៃប្រទេសទុយនេហ្ស៊ីចេញពីតំណែង កាលពី២សប្តាហ៍មុននោះ លោកស្រីរដ្ឋមន្ត្រីការបរទេសសហរដ្ឋអាមេរិក Hillary Clinton បានថ្លែងប្រាប់វេទិកានយោបាយមួយនៅប្រទេស Qatarថា បណ្តាប្រទេសអារ៉ាប់ប្រឈមនឹងគ្រោះថ្នាក់លិចចូលដីខ្សាច់ លើកលែងតែពួកគេធ្វើឲ្យមានសេរីភាវូបនិយកម្មនៅក្នុងប្រព័ន្ធនយោបាយ និងសេដ្ឋកិច្ចរបស់ខ្លួន៕
ប្រែសម្រួលដោយអ្នកស្រី នៅ សារីម
