យោធាសហរដ្ឋអាមេរិកបានបញ្ជាក់ថា ខ្លួនបានវាយប្រហារ «ការពារខ្លួន» កាលពីយប់ថ្ងៃអាទិត្យលើមីស៊ីលស្វ័យនាំផ្លូវនៅក្នុងតំបន់មួយនៃប្រទេសយេម៉ែនដែលគ្រប់គ្រងដោយក្រុមសកម្មប្រយុទ្ធហ៊ូធី (Houthi)។
បញ្ជាការដ្ឋានសហរដ្ឋអាមេរិកទទួលបន្ទុកកិច្ចការតំបន់មជ្ឈិមបូព៌ានិងអាស៊ីកណ្ដាល (CENTCOM) បានបញ្ជាក់ថា ការវាយប្រហារនេះគឺចំមីស៊ីលបាញ់នាវា ៤ គ្រាប់ដែលកំពុងត្រៀមបាញ់ដាក់នាវានានានៅសមុទ្រក្រហម។
បញ្ជាការដ្ឋានសហរដ្ឋអាមេរិកនេះបានលើកឡើងនៅក្នុងសេចក្ដីថ្លែងការណ៍មួយថា មីស៊ីលទាំងនោះ «គឺជាការគំរាមកំហែងដែលជិតកើតឡើងចំពោះនាវារបស់ទាហានជើងទឹកសហរដ្ឋអាមេរិកនិងនាវាពណិជ្ជកម្មផ្សេងៗនៅក្នុងតំបន់»។
ការវាយប្រហារនេះគឺជាវិធានការថ្មីចុងក្រោយបង្អស់របស់យោធាសហរដ្ឋអាមេរិកប្រឆាំងនឹងក្រុមសកម្មប្រយុទ្ធដែលគាំទ្រដោយអ៊ីរ៉ង់នេះដើម្បីទប់ទល់នឹងការវាយប្រហារជាបន្តបន្ទាប់របស់ក្រុមនេះលើនាវានានានៅក្នុងផ្លូវដឹកជញ្ជូនទំនិញដ៏សំខាន់នៅសមុទ្រក្រហម។
កាលពីព្រឹកថ្ងៃអាទិត្យ ទីប្រឹក្សាសន្តិសុខជាតិសេតវិមានលោក Jake Sullivan បាននិយាយនៅក្នុងកម្មវិធី «State of the Union» របស់ទូរទស្សន៍ CNN ថា ប្រធានាធិបតីសហរដ្ឋអាមេរិកលោក Joe Biden «នឹងធ្វើអ្វីដែលលោកគិតថាចាំបាច់ត្រូវធ្វើ» ប្រសិនបើមានការវាយប្រហារបន្ថែមទៀតលើទាហានអាមេរិកាំងដែលឈរជើងនៅតំបន់មជ្ឈិមបូព៌ាឬលើនាវាទាហានជើងទឹកអាមេរិកនិងនាវាពាណិជ្ជកម្មនៅសមុទ្រក្រហម។
ទោះបីជាដូច្នេះក៏ដោយ លោក Sullivan បានលើកឡើងថា សហរដ្ឋអាមេរិកនឹង «ព្យាយាមធ្វើយ៉ាងណាកុំឱ្យសង្គ្រាមនេះរីកសាយភាយបន្ថែមទៀត» នៅតំបន់មជ្ឈិមបូព៌ា បើទោះបីជាទាហានអាមេរិកនិងទាហានចក្រភពអង់គ្លេសបានចូលរួមវាយប្រហារលើក្រុមសកម្មប្រយុទ្រនានាដែលគាំទ្រដោយអ៊ីរ៉ង់ក៏ដោយ។
សហរដ្ឋអាមេរិកនិងចក្រភពអង់គ្លេសបានវាយប្រហារលើគោលដៅក្រុមហ៊ូធីយ៉ាងតិច ៣៦ កន្លែងនៅក្នុងប្រទេសយេម៉ែនកាលពីថ្ងៃសៅរ៍៕
ប្រធានការិយាល័យ VOA ប្រចាំសេតវិមានអ្នកស្រី Patsy Widakuswara រួមចំណែកនៅក្នុងសេចក្ដីរាយការណ៍នេះពីមូលដ្ឋានទ័ពអាកាស Dover នៅក្នុងរដ្ឋ Delaware។ អ្នកឆ្លើយឆ្លងព័ត៌មានរបស់ VOA ផ្នែកសន្តិសុខជាតិលោក Jeff Seldin ក៏បានរួមចំណែកនៅក្នុងសេចក្ដីរាយការណ៍នេះផងដែរ។
