និយតករនៃរដ្ឋ Nebraska ក្នុងសហរដ្ឋអាមេរិកបានបោះឆ្នោតជាឯកច្ឆន្ទអនុម័តទៅលើការអនុញ្ញាតឲ្យជីកបំពង់ប្រេងទំហំធំ Keystone របស់ក្រុមហ៊ុន TransCanada Corp។ ការអនុម័តនេះគឺជាដំណាក់កាលចុងក្រោយហើយក្នុងការសម្រេចជីកបំពង់ប្រេងដែលលោកប្រធានាធិបតីអាមេរិក ដូណាល់ ត្រាំ បានគាំទ្រ។
ស្ថាប័ននិយតកម្មដែលយោងតាមច្បាប់ក្នុងរដ្ឋនេះមិនអាចពិចារណាទៅលើហានិភ័យនៃការធ្លាយប្រេងឬផលប៉ះពាល់ទៅលើបរិស្ថានមួយនេះ បានអនុម័តទៅគម្រោងនេះ ក្នុងរយៈពេលប៉ុន្មានថ្ងៃបន្ទាប់ពីមានធ្លាយប្រេងនៅតាមបំពង់ប្រេងដែលគេស្គាល់ថា "Keystone" ដែលបានធ្លាយប្រេងអស់ ៥ពាន់ធុងនៅក្នុងរដ្ឋ South Dakota ដែលនៅជិតខាងនោះ។
សេចក្តីសម្រេចដែលត្រូវបានសម្រេចដោយគណៈកម្មការសេវាសាធារណៈ Nebraskaនេះទំនងជានឹងត្រូវប្រឈមនឹងការប្តឹងផ្តល់នៅតុលាការដោយក្រុមសកម្មជនបរិស្ថាន ដែលបានតស៊ូមតិអស់រយៈពេលជិត១ទសវត្សរ៍មកហើយ ទៅលើគម្រោងរបស់ក្រុមហ៊ុន TransCanada ពាក់ព័ន្ធនឹងប្រេងខ្សាច់នៅខេត្ត Alberta ប្រទេសកាណាដា ដែលចង់យកទៅចម្រាញ់នៅក្នុងសហរដ្ឋអាមេរិក។
ការបោះឆ្នោតរបស់គណៈកម្មការនេះមិនបានអនុម័តទៅលើបណ្តាញបំពង់ប្រេងដែលស្នើឡើងដោយក្រុមហ៊ុន TransCanada នោះទេ ប៉ុន្តែគម្រោងដែលកែប្រែខុសពីនេះអាចអស់ថវិកាច្រើនជាងនេះនិងពិបាកក្នុងការសាងសង់។ នៅមិនទាន់ច្បាស់លាស់ភ្លាមៗនៅឡើយទេថាសហគ្រាសនេះនឹងធ្វើទៅតាមគម្រោងដែលខ្លួនពិចារណាថាអាចផ្តល់ផលចំណេញឬយ៉ាងណា។
កាលពីឆ្នាំ២០១៥ រដ្ឋបាលលោក អូបាម៉ា បានបដិសេធមិនឲ្យសាងសង់បំពង់ប្រេងនេះនោះទេ ដោយនិយាយថា គម្រោងនេះនឹងធ្វើឲ្យអន់ថយដល់ភាពជាអ្នកដឹកនាំសកលលោករបស់អាមេរិកទៅលើបញ្ហានានាដែលពាក់ព័ន្ធនឹងការប្រែប្រួលអាកាសធាតុ៕
