រដ្ឋមន្ត្រីការបរទេសថ្មីរបស់សហរដ្ឋអាមេរិកលោក Antony Blinken កាលពីថ្ងៃពុធ និយាយថាអាមេរិកច្រានចោលការទាមទារដែនសមុទ្ររបស់ចិននៅក្នុងសមុទ្រចិនខាងត្បូង ហួសពីអ្វីដែលត្រូវបានអនុញ្ញាតនៅក្រោមច្បាប់អន្តរជាតិ ហើយនិងរួបរួមជាមួយប្រទេសនានានៅតំបន់អាស៊ីអាគ្នេយ៍ ដើម្បីតតាំងនឹងការដាក់សម្ពាធរបស់ចិននេះ។ នេះបើតាមការរាយការណ៍របស់ទីភ្នាក់ងារព័ត៌មាន Reuters។
លោក Blinken បានកត់សម្គាល់ដូច្នេះនៅក្នុងការនិយាយទូរស័ព្ទជាមួយលោក Teodoro Locsin រដ្ឋមន្ត្រីការបរទេសហ្វីលីពីន។
លោក Blinken ក៏បានសង្កត់ធ្ងន់ពីសារៈសំខាន់នៃកិច្ចព្រមព្រៀងការពារគ្នាយូរអង្វែងរវាងសម្ព័ន្ធមិត្តទាំងពីរ ហើយនិងការអនុវត្តច្បាស់លាស់នូវកិច្ចព្រមព្រៀងនេះ ប្រសិនបើរដ្ឋាភិបាលក្រុងម៉ានីលត្រូវរងការវាយប្រហារនៅក្នុងសមុទ្រចិនខាងត្បូង។
សេចក្តីថ្លែងការណ៍ក្រសួងការបរទេសអាមេរិក បានបញ្ជាក់ថា៖ «លោករដ្ឋមន្ត្រីការបរទេស Blinken បានសន្យាសាមគ្គីជាមួយប្រទេសទាមទារនៅតំបន់អាស៊ីអាគ្នេយ៍ នៅក្នុងការប្រឈមនឹងការដាក់សម្ពាធរបស់សាធារណរដ្ឋប្រជាមានិតចិន»។
ការធានាអះអាងរបស់លោក Blinken កើតមានឡើង បន្ទាប់ពីលោក Locsin បាននិយាយកាលពីថ្ងៃពុធថា ហ្វីលីពីនបានធ្វើការតវ៉ាខាងការទូតអំពីការអនុម័តច្បាប់របស់រដ្ឋាភិបាលក្រុងប៉េកាំង ដែលអនុញ្ញាតឲ្យឆ្មាំការពារដែនសមុទ្ររបស់ខ្លួន បាញ់ប្រហារកប៉ាល់បរទេស ដោយហ្វីលីពីនពណ៌នាវិធានការនេះថា «ជាការគំរាមកំហែងធ្វើសង្គ្រាម»។
សហរដ្ឋអាមេរិកកន្លងមកបានចោទប្រកាន់ចិនពីការឆ្លៀតប្រយោជន៍ពីការរំខាននៃការរាតត្បាតជំងឺកូវីដ១៩ ដើម្បីពង្រីកវត្តមានរបស់ខ្លួននៅក្នុងសមុទ្រខាងត្បូង ហើយសហរដ្ឋអាមេរិកបានបញ្ជូនកងនាវាផ្ទុកយន្តហោះកាត់តាមផ្លូវទឹក ដើម្បីលើកតម្កើងនូវអ្វីដែលខ្លួនហៅថា «សេរីភាពនៃនាវាចរណ៍សមុទ្រ»៕
