ទីភ្នាក់ងារសន្តិសុខជាតិអាមេរិក (NSA) បានប្រើប្រាស់អង្គភាពស៊ើបការណ៍សម្ងាត់បរទេសរបស់ប្រទេសដាណឺម៉ាកដែលជាដៃគូដើម្បីស៊ើបការណ៍ទៅលើមន្ត្រីជាន់ខ្ពស់មួយចំនួននៅក្នុងប្រទេសក្បែរខាងដាណឺម៉ាក ដែលក្នុងនោះក៏មានអធិការបតីអាល្លឺម៉ង់ អ្នកស្រី Angela Merkel ផងដែរ។ នេះបើតាមការផ្សាយរបស់វិទ្យុរដ្ឋ DR របស់ដាណឺម៉ាក។
ការរកឃើញនេះ ជាលទ្ធផលនៃការស៊ើបអង្កេតផ្ទៃក្នុងមួយកាលពីឆ្នាំ២០១៥ របស់ទីភ្នាក់ងារស៊ើបការណ៍ការពារប្រទេសដាណឺម៉ាក ទៅលើតួនាទីក្នុងភាពជាដៃគូជាមួយទីភ្នាក់ងារសន្តិសុខជាតិអាមេរិក។ វិទ្យុនេះ បានស្រង់ប្រភពមិនបានបញ្ចេញឈ្មោះចំនួន៩ ដែលបានដឹងពីការស៊ើបអង្កេតនោះ។
យោងទៅលើការស៊ើបអង្កេត ដែលផ្តោតទៅលើរយៈពេលពីឆ្នាំ២០១២ដល់ឆ្នាំ២០១៤ ទីភ្នាក់ងារសន្តិសុខជាតិអាមេរិក បានប្រើប្រាស់ប្រព័ន្ធព័ត៌មានរបស់ដាណឺម៉ាក ក្នុងការស៊ើបការណ៍ទៅលើមន្ត្រីជាន់ខ្ពស់មួយចំនួន នៅក្នុងប្រទេសស៊ុយអែត ន័រវេស បារាំង និងប្រទេសអាល្លឺម៉ង់។
ពេលស្នើសុំបញ្ជាក់ពីការផ្សព្វផ្សាយរបស់វិទ្យុដាណឺម៉ាកនោះ អ្នកនាំពាក្យរដ្ឋាភិបាលអាល្លឺម៉ង់ និយាយថា ខ្លួនទើបតែបានដឹងអំពីរឿងនេះពេលអ្នកសារព័ត៌មានសាកសួរ ហើយបានបដិសេធមិននិយាយបន្ថែមទៀតនោះទេ។
ក្នុងរដ្ឋធានីវ៉ាស៊ីងតោនវិញ ទីភ្នាក់ងារសន្តិសុខជាតិ និងការិយាល័យនាយកចារកម្មជាតិ បានបដិសេធមិនធ្វើអត្ថាធិប្បាយជុំវិញរឿងនេះ ហើយអ្នកនាំពាក្យនៃមន្ទីរស៊ើបការណ៍សម្ងាត់ការពារប្រទេសដាណឺម៉ាក ក៏បានបដិសេធមិនបកស្រាយដែរ។
ដោយឡែកនៅក្នុងទីក្រុងប៉ារីសឯណោះវិញ រដ្ឋមន្ត្រីបារាំងសម្រាប់កិច្ចការអឺរ៉ុបលោក Clement Beaune បានប្រាប់វិទ្យុព័ត៌មានបារាំងថា ការផ្សព្វផ្សាយរបស់វិទ្យុដាណឺម៉ាកនោះ ចាំបាច់ត្រូវមានការផ្ទៀងផ្ទាត់ឡើងវិញហើយថា ប្រសិនបើការផ្សព្វផ្សាយនោះពិតជាត្រឹមត្រូវមែននោះ នេះជា«បញ្ហាដ៏ធំមួយ»៕
