សហរដ្ឋអាមេរិកនៅថ្ងៃពុធនេះ បានដាក់ទណ្ឌកម្មលើស្ថាប័នចំនួន ៣ ដែលខ្លួនចោទប្រកាន់ថាមានជាប់ពាក់ព័ន្ធនឹងការជួញដូរអាវុធរវាងប្រទេសកូរ៉េខាងជើងនិងរុស្ស៊ី ស្របពេលដែលរដ្ឋាភិបាលក្រុងវ៉ាស៊ីនតោន កំពុងបង្ក្រាបទៅលើអ្នកដែលព្យាយាមជួយគាំទ្រដល់សង្គ្រាមរុស្ស៊ីនៅក្នុងប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ក្រសួងហិរញ្ញវត្ថុសហរដ្ឋអាមេរិក បាននិយាយនៅក្នុងសេចក្តីថ្លែងការណ៍មួយថា រុស្ស៊ីកំពុងបង្ខំចិត្តកាន់តែខ្លាំងឡើង ក្នុងការងាកទៅរកប្រទេសកូរ៉េខាងជើង និងសម្ព័ន្ធមិត្តផ្សេងៗទៀត ដើម្បីរក្សាការធ្វើសង្គ្រាមរបស់ខ្លួននៅក្នុងប្រទេសអ៊ុយក្រែន ខណៈខ្លួនត្រូវចំណាយគ្រាប់រំសេវនិងបាត់បង់ឧបករណ៍យោធាធន់ធ្ងន់ជាច្រើន នៅក្នុងសមរភូមិសង្គ្រាមនេះ។
ការដាក់ទណ្ឌកម្មនេះ ជាសកម្មភាពចុងក្រោយថ្មីៗបំផុតរបស់រដ្ឋាភិបាលក្រុងវ៉ាស៊ីនតោន ដែលកន្លងទៅបានដាក់ទណ្ឌកម្មជាច្រើនរួចមកហើយ ទៅលើរដ្ឋាភិបាលក្រុងមូស្គូនិងប្រធានាធិបតីរុស្ស៊ី លោក Vladimir Putin ចាប់តាំងពីសង្គ្រាមក្នុងប្រទេសអ៊ុយក្រែនចាប់ផ្តើមមក។ សង្រ្គាមនេះបានសម្លាប់មនុស្សអស់រាប់ម៉ឺននាក់ និងបំផ្លិចបំផ្លាញទីក្រុងជាច្រើននៅក្នុងប្រទេសអ៊ុយក្រែន។
អនុរដ្ឋមន្ត្រីក្រសួងហិរញ្ញវត្ថុអាមេរិកទទួលបន្ទុកភេរវកម្មនិងការស៊ើបការណ៍ហិរញ្ញវត្ថុ លោក Brian Nelson បាននិយាយនៅក្នុងសេចក្តីថ្លែងការណ៍មួយថា៖ «សហរដ្ឋអាមេរិក នឹងបន្តជីកឫសគល់បណ្តាញហិរញ្ញវត្ថុខុសច្បាប់នានា ដែលមានបំណងបញ្ជូនការគាំទ្រពីកូរ៉េខាងជើង ដល់ការធ្វើសង្គ្រាមរបស់រុស្ស៊ី[ក្នុងប្រទេសអ៊ុយក្រែន]»។
ស្ថាប័នដែលទាំង ៣ ដែលរងការដាក់ទណ្ឌកម្មពីក្រសួងហិរញ្ញវត្ថុអាមេរិកនៅថ្ងៃពុធនេះរួមមាន ក្រុមហ៊ុន Limited Liability Company Verus ក្រុមហ៊ុន Defense Engineering Limited Liability Partnership និងក្រុមហ៊ុនVersor S.R.O៕
