បន្ទាប់ពីមានការរារាំងពីបណ្តាប្រទេសមួយចំនួនមិនឲ្យមេដឹកនាំគណបក្សសង្គ្រោះជាតិ ធ្វើដំណើរឆ្លងកាត់ប្រទេសពួកគេដើម្បីឆ្ពោះមកកាន់កម្ពុជាវិញ សមាជិកព្រឹទ្ធសភាអាមេរិកពីរនាក់ រួមមានលោក Ed Markey និងលោក Dick Durbin បានស្នើឲ្យមានសេចក្តីសម្រេចទ្វេបក្សនៅសភាអាមេរិក ដោយអំពាវនាវឲ្យរដ្ឋាភិបាលកម្ពុជាអនុញ្ញាតឲ្យមេដឹកនាំនិងសកម្មជនគណបក្សសង្គ្រោះជាតិ អាចវិលត្រឡប់ចូលប្រទេសកម្ពុជាវិញដោយ «សន្តិវិធី»។
នេះបើយោងតាមបណ្តាញ Twitter របស់លោក Ed Markey សមាជិកព្រឹទ្ធសភានៃគណបក្សប្រជាធិបតេយ្យប្រចាំរដ្ឋម៉ាសាឈូសេត ដែលវីអូអេទទួលបាននាព្រឹកថ្ងៃសុក្រនេះ។
សមាជិកព្រឹទ្ធសភាជើងចាស់រូបនេះ បានសរសេរនៅលើគណនី Twitter របស់លោកថា៖ «លោក ហ៊ុន សែន បានធ្វើឲ្យខូចខាតដល់លទ្ធិប្រជាធិបតេយ្យ និងសិទ្ធិមនុស្សនៅកម្ពុជា។ ហើយឥឡូវនេះ លោកកំពុងតែរារាំងមិនឲ្យមេដឹកនាំគណបក្សសង្គ្រោះជាតិវិលត្រឡប់ចូលកម្ពុជាវិញនៅថ្ងៃសៅរ៍នេះ។ ពួកគេ [មេដឹកនាំបក្សប្រឆាំង] ត្រូវតែបានអនុញ្ញាតឲ្យចូលប្រទេសវិញដោយសន្តិវិធី។ ខ្ញុំទើបតែស្នើសុំឲ្យមានសេចក្តីសម្រេចទ្វេបក្សមួយ ដើម្បីឲ្យលោក [ហ៊ុន សែន] បានដឹងថា យើងកំពុងឃ្លាំមើល»។
ខ្លឹមសារនៃសេចក្តីស្នើសុំ ដែលផ្សព្វផ្សាយតាមបណ្តាញ Twitter របស់លោក Ed Markey បានរៀបរាប់ថា៖ «ព្រឹទ្ធសភាអាមេរិក សូមជំរុញឲ្យរដ្ឋាភិបាលកម្ពុជាដោះលែង និងទម្លាក់បទចោទប្រកាន់ដែលមានចរិតនយោបាយលើអ្នកទោសនយោបាយ និងលើសកម្មជនគណបក្សសង្គ្រោះជាតិ និងសកម្មជននៃអង្គការសង្គមស៊ីវិលនានា» ស្របពេលដែលប្រជាពលរដ្ឋអាមេរិកចង់បានទំនាក់ទំនងល្អជាមួយប្រជាពលរដ្ឋកម្ពុជា និងធានាថាប្រជាពលរដ្ឋកម្ពុជាអាចទទួលបានការបោះឆ្នោតដោយសេរីនិងយុត្តិធម៌ នីតិរដ្ឋ សេរីភាពជាមូលដ្ឋានក្នុងការបញ្ចេញមតិ និងប្រមូលផ្តុំគ្នា។
ការស្នើឲ្យមានសេចក្តីសម្រេចនេះ ធ្វើឡើងតែក្រោយពីលោក សម រង្ស៊ី ប្រធានស្ដីទីគណបក្សសង្គ្រោះជាតិ ដែលត្រូវបានតុលាការកំពូលកម្ពុជារំលាយ បានប្រកាសពន្យារពេលផែនការនៃការវិលត្រឡប់របស់លោកចូលទៅក្នុងប្រទេសកម្ពុជាវិញ តាមច្រកប៉ោយប៉ែតជាប់ព្រំប្រទេសកម្ពុជា-ថៃ ដោយសារលោកអះអាងថា បុគ្គលិកក្រុមហ៊ុនអាកាសចរណ៍ថៃ (Thai Airways) មិនអនុញ្ញាតឱ្យលោកឡើងជិះយន្តហោះ ដែលលោកគ្រោងនឹងជិះពីទីក្រុងប៉ារីសប្រទេសបារាំង ឆ្ពោះទៅទីក្រុងបាងកក ប្រទេសថៃ នៅថ្ងៃទី៧ ខែវិច្ឆិកានេះ។
នៅក្នុងសេចក្តីស្នើសុំរបស់សមាជិកព្រឹទ្ធសភាអាមេរិកទាំងពីរនាក់នេះ ដែលចុះថ្ងៃព្រហស្បតិ៍ ទី៧ ខែវិច្ឆិកានេះ លោកទាំងពីរបាន«អំពាវនាវឲ្យលោកនាយករដ្ឋមន្ត្រី ហ៊ុន សែន ទទួលខុសត្រូវលើសុវត្ថិភាព សុខភាព និងសុខមាលភាពនៃសមាជិកដឹកនាំគណបក្សសង្គ្រោះជាតិ ដែលបាននិរទេសខ្លួនក្រៅប្រទេស និងអ្នកគាំទ្រគណបក្សប្រឆាំងមួយនេះ ឲ្យបានធ្វើដំណើរវិលត្រឡប់មកកាន់ប្រទេសកម្ពុជា»។
លោក Ed Markey និងលោក Dick Durbin សមាជិកព្រឹទ្ធសភាអាមេរិកនៃគណបក្សប្រជាធិបតេយ្យ ក៏បាន «ស្នើឲ្យរដ្ឋាភិបាលនៅក្នុងតំបន់អាស៊ីប៉ាស៊ីហ្វិក ចូលរួមជំរុញឲ្យរដ្ឋាភិបាលកម្ពុជាអនុញ្ញាតឲ្យមេដឹកនាំ និងអ្នកគាំទ្រគណបក្សសង្គ្រោះជាតិ វិលត្រឡប់ចូលប្រទេសកម្ពុជាវិញដោយសន្តិវិធី និងកុំឲ្យរដ្ឋាភិបាលកម្ពុជារឹតត្បិតសិទ្ធិសេរីភាពរបស់សមាជិកគណបក្សសង្គ្រោះជាតិ ក្នុងការធ្វើដំណើរឆ្លងកាត់ប្រទេសនានា ខណៈដែលពួកគេគ្រោងវិលត្រឡប់មកកាន់កម្ពុជាវិញ»។
អ្នកទាំងពីរក៏បានកត់សម្គាល់ផងដែរថា ក្នុងករណីអវត្តមាននៃការកែទម្រង់លទ្ធិប្រជាធិបតេយ្យជាប្រព័ន្ធនៅកម្ពុជា «ព្រឹទ្ធសភាអាមេរិកទទួលស្គាល់ពីតម្រូវការចាំបាច់របស់រដ្ឋាភិបាលអាមេរិក ដែលត្រូវចាត់វិធានការបន្ថែម រួមមានវិធានការតាមផ្លូវច្បាប់ និងតាមនីតិប្រតិបត្តិ»។
ថ្នាក់ដឹកនាំអតីតគណបក្សសង្គ្រោះជាតិ បានគ្រោងធ្វើដំណើរឆ្ពោះទៅកាន់ទីក្រុងបាងកក ប្រទេសថៃ ដើម្បីជួបជុំគ្នានិងកៀរគរអ្នកគាំទ្ររបស់ខ្លួននៅទីនោះ មុននឹងឆ្លងចូលប្រទេសកម្ពុជា នៅថ្ងៃទី៩ ខែវិច្ឆិកា ដែលត្រូវចំថ្ងៃបុណ្យឯករាជ្យរបស់កម្ពុជា ដើម្បីអ្វីមួយដែលគណបក្សប្រឆាំងហៅថា ជាការទាមទារលទ្ធិប្រជាធិបតេយ្យមកឱ្យពលរដ្ឋកម្ពុជាវិញ។
ប៉ុន្តែ រដ្ឋាភិបាលកម្ពុជា ចាត់ទុកការវិលត្រឡប់របស់លោក សម រង្ស៊ី និងមន្ត្រីជាន់ខ្ពស់នៃបក្សប្រឆាំងថា ជាការប៉ុនប៉ងធ្វើរដ្ឋប្រហារទម្លាក់រដ្ឋាភិបាលលោកនាយករដ្ឋមន្ត្រី ហ៊ុន សែន៕
