ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិ លោកស្រី Nikki Haley បានបញ្ចេញវោហារសាស្ត្រប្រឆាំងនឹងប្រទេសរុស្ស៊ីកាលពីថ្ងៃព្រហស្បតិ៍ ដោយនិយាយថា ការបន្ថែមសម្ពាធទៅលើរដ្ឋាភិបាលក្រុងមូស្គូគឺចាំបាច់ ដើម្បីបញ្ឈប់សង្គ្រាមនៅក្នុងប្រទេសស៊ីរី។
លោកស្រី Haley បានថ្លែងទៅកាន់ដៃគូរបស់លោកស្រីនៅក្នុងក្រុមប្រឹក្សាសន្តិសុខដែលមានសមាជិក១៥ប្រទេសថា «អ្នកនិយាយថា យើងត្រូវដាក់សម្ពាធទៅលើរបបស៊ីរី ប៉ុន្តែនេះមិនត្រឹមត្រូវនោះទេ យើងចាំបាច់ត្រូវដាក់សម្ពាធទៅលើប្រទេសរុស្ស៊ី»។
ក្រុមប្រឹក្សានេះបានបើកកិច្ចប្រជុំប្រចាំខែស្តីពីស្ថានភាពសិទ្ធិមនុស្សនៅក្នុងប្រទេសស៊ីរី ដែលលោកStephen O'Brien ប្រធានខាងជំនួយមនុស្សធម៌របស់អង្គការសហប្រជាជាតិបានថ្លែងប្រាប់ពួកគេថា មន្ទីរពេទ្យយ៉ាងហោចណាស់ចំនួន៦និងសាលារៀនចំនួន៣ត្រូវបានគេទម្លាក់គ្រាប់បែកដាក់នៅក្នុងខែនេះ ហើយអន្ទាក់ត្រូវបានគេដាក់នៅជុំវិញតំបន់ Ghouta ដែលស្ថិតនៅភាគខាងកើតនៃប្រទេសស៊ីរី ដែលមនុស្សប្រមាណ៤សែននាក់ត្រូវបានកាត់ផ្តាច់ពីជំនួយរបស់អង្គការសហប្រជាជាតិចាប់តាំងពីឆ្នាំ២០១៦មក៕
