រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយកាលពីថ្ងៃពុធថា ក្រុមហាម៉ាស់បានស្នើឲ្យមាន «ការផ្លាស់ប្តូរជាច្រើន» ដល់កិច្ចព្រមព្រៀងឈប់បាញ់គ្នាដែលបានស្នើឡើងហើយលោកបន្ថែមថាចំណុចខ្លះអាចដំណើរការបាន ហើយខ្លះទៀតមិនអាចទៅរួចទេ។
លោក Blinken បានថ្លែងនៅក្នុងសន្និសីទសារព័ត៌មាននៅទីក្រុង Doha ថា«អ៊ីស្រាអែលបានទទួលយកសំណើនេះតាមទម្រង់ដែលបានស្នើឡើងស្រាប់។ នៅថ្ងៃខាងមុខ យើងនឹងបន្តជំរុញជាបន្ទាន់ជាមួយដៃគូរបស់យើង ជាមួយកាតា ជាមួយអេហ្ស៊ីប ដើម្បីព្យាយាមសម្រេចកិច្ចព្រមព្រៀងនេះ»។
បណ្តាប្រទេសនៅឈូងសមុទ្រនៃប្រទេសកាតា រួមជាមួយនឹងអេហ្ស៊ីប បាននិងកំពុងសម្រុះសម្រួលគ្នារវាងអ៊ីស្រាអែល និងក្រុមហាម៉ាស ជុំវិញបទឈប់បាញ់ពហុដំណាក់កាលដែលបានស្នើឡើងសម្រាប់តំបន់ហ្កាហ្សា។
នាយករដ្ឋមន្ត្រីកាតា លោកSheikh Mohammed bin Abdulrahman Al Thani បានប្រាប់អ្នកយកព័ត៌មានថា ប្រទេសកាតា សហរដ្ឋអាមេរិក និងដៃគូរបស់ពួកគេ «បានប្តេជ្ញាចិត្តក្នុងការបិទគម្លាតនេះ ដើម្បីស្វែងរកមធ្យោបាយដើម្បីបញ្ចប់សង្រ្គាមឱ្យបានឆាប់តាមដែលអាចធ្វើទៅបាន» ។
នាយករដ្ឋមន្ត្រីកាតាក៏បានសង្កត់ធ្ងន់លើតម្រូវការសម្រាប់ដំណោះស្រាយអចិន្ត្រៃយ៍និងនិរន្តរភាពដែលនឹងអនុញ្ញាតឱ្យរដ្ឋប៉ាឡេស្ទីននិងអ៊ីស្រាអែលរស់នៅជាមួយគ្នា។
រដ្ឋមន្ត្រីការបរទេសសហរដ្ឋអាមេរិកលោក Antony Blinken កាលពីថ្ងៃពុធ បានជួបជាមួយនាយករដ្ឋមន្ត្រីនៃប្រទេសកាតា លោក Sheikh Mohammed bin Abdulrahman Al Thani ខណៈដែលក្រុមមន្ត្រីសហរដ្ឋអាមេរិក កាតា និងប្រទេសអេហ្សីប កំពុងវាយតម្លៃពីការឆ្លើយតបរបស់ក្រុមហាម៉ាស់ ទៅលើសំណើសុំឱ្យមានបទឈប់បាញ់គ្នានេះ។
ទីប្រឹក្សាទំនាក់ទំនងសន្តិសុខជាតិសេតវិមាន លោកJohn Kirby បានប្រាប់ក្រុមអ្នកសារព័ត៌មានថា ក្រុមហាម៉ាស់បានបញ្ចូនការឆ្លើយតបរបស់ខ្លួនទៅឱ្យប្រទេសកាតានិងអេហ្សីបកាលពីថ្ងៃអង្គារ ហើយថា សហរដ្ឋអាមេរិកសន្និដ្ឋានថា ការឆ្លើយតបនោះ មានការយល់ព្រមពីមេដឹកនាំជាន់ខ្ពស់របស់ក្រុមហាម៉ាស់ក្នុងតំបន់ហ្កាហ្សា លោក Yahya Sinwar ផងដែរ។
បើយោងទៅលើក្រុមហាម៉ាស់និងក្រុមតូចមួយគឺក្រុមសកម្មប្រយុទ្ធអ៊ីស្លាមជីហាដ បានឱ្យដឹងថា ពួកគេបានត្រៀមខ្លួនដើម្បីអនុវត្តដោយវិជ្ជមាននៃកិច្ចព្រមព្រៀងមួយ ដែលផ្តល់អាទិភាពលើការបញ្ចប់សង្គ្រាមទាំងស្រុង។
មន្ត្រីហាម៉ាស់មួយរូបនិយាយថា៖ «ការឆ្លើយតបរបស់ក្រុមហាម៉ាស់ ជាការបញ្ជាក់នូវជំហររបស់ក្រុមនេះថា កិច្ចព្រមព្រៀងណាមួយត្រូវតែបញ្ចប់នូវការឈ្លានពានរបស់ពួកជ្វីហ្វលើប្រជាជនរបស់យើង ដកកងទ័ពអ៊ីស្រាអែលចេញ ស្ថាបនាតំបន់ហ្កាហ្សាឡើងវិញ និងសម្រេចនូវកិច្ចព្រមព្រៀងផ្លាស់ប្តូរអ្នកទោសដ៏ពិតប្រាកដមួយ»។
ប្រធានាធិបតីសហរដ្ឋអាមេរិកលោក Joe Biden បានផ្សព្វផ្សាយជាសាធារណៈនូវសំណើឱ្យមានបទឈប់បាញ់មួយ ខណៈដែលលោកនិងមន្ត្រីអាមេរិកដទៃផ្សេងទៀត បានបញ្ជាក់ជាច្រើនលើកច្រើនសារថា នេះជាសំណើរបស់អ៊ីស្រាអែល។ លោកBlinkenបាននិយាយកាលពីថ្ងៃអង្គារថា នាយករដ្ឋមន្ត្រីអ៊ីស្រាអែលលោក Benjamin Netanyahu បានបញ្ជាក់ពីការតាំងចិត្តរបស់លោកទៅលើសំណើនៃកិច្ចព្រមព្រៀងនេះ។
បើទោះជាយ៉ាងនេះក្តី គេនៅតែឃើញមានចំណុចសំខាន់មួយចំនួននៃការមិនយល់ស្របគ្នានៅឡើយ ដែលក្នុងនោះរួមមានដូចជាការទាមទាររបស់ក្រុមហាម៉ាស់ដែលថា អ៊ីស្រាអែលត្រូវដកកងទ័ពចេញពីតំបន់ហ្កាហ្សា និងការដែលអ៊ីស្រាអែលនៅតែតាំងចិត្តដើម្បីសម្រេចបាននូវគោលបំណងរបស់ខ្លួនក្នុងការវាយកម្ទេចក្រុមហាម៉ាស់ ដើម្បីធានាថា ក្រុមនេះនឹងមិនអាចវាយប្រហារលើប្រទេសអ៊ីស្រាអែលក្នុងពេលអនាគតទៀតនោះឡើយ»៕
