កងទ័ពជើងទឹកសហរដ្ឋអាមេរិកនឹងបើកបេសកកម្មជំនួយមនុស្សធ៌មប្រចាំឆ្នាំទី៦របស់ខ្លួននៅមហាសមុទ្រ ប៉ាស៊ីហ្វ៊ិក (Pacific) នៅចុងខែនេះ ដើម្បីជួយប្រទេសនានាក្នុងតំបន់នេះឱ្យប្រុងប្រៀបសម្រាប់មហន្តរាយធម្មជាតិនៅពេលអនាគត។ នាវាចម្បាំងឈ្មោះ យ៊ូអេសអេស ឃ្លីវលិនដ៍ (USS Cleveland)បានត្រូវរចនាទ្បើងដើម្បីដឹកជញ្ជូនក្រុមទាហានម៉ារីន (Marines) ទៅកាន់តំបន់មានសង្គ្រាម។ ក៏ប៉ុន្តែសម្រាប់ពេលប្រាំខែចាប់ផ្តើមពីថ្ងៃទី២១ខែមីនាទៅ នាវាឃ្លីវលិនដ៍ នឹងដឹកនាំ បេសកម្ម«ភាពជាដៃគូប៉ាស៊ីហ្វ៊ិក» (Pacific Partnership) ដែលជាបេសកកម្មប្រចាំឆ្នាំខាងការហ្វឹកហ្វឺននិងខាងផ្តល់ជំនួយមនុស្សធម៌របស់កងទ័ពជើងទឹកសហរដ្ឋអាមេរិក។
កប៉ាល់ឃ្លីវលិនដ៍ ជាមួយនាវាឯទៀតៗមកពីកងទ័ពជើងទឹកនៃសហរដ្ឋអាមេរិក អូស្ត្រាលី ញូវ៉ែលហ្សេឡង់ និងជប៉ុននឹងទៅទស្សនាប្រទេសនានាក្នុងមហាសមុទ្រ Pacific ដើម្បីហ្វឹកហ្វឺនកងកម្លាំងក្នុងមូលដ្ឋានអំពីការជួយសង្គ្រោះក្នុងពេលមានមហន្តរាយ។ ក្រុមទាហានជើងទឹកមកពីប្រទេសទាំងនេះក៏នឹងធ្វើការជាមួយអង្គការជួយសង្គ្រោះក្នុងមូលដ្ឋាននិងអន្តរជាតិ ដើម្បីរៀបចំផែនការឆ្លើយតបពេលមានអាសន្ននិងផ្តល់ការថែទាំខាងវេជ្ជសាស្ត្រនិងជំនួយខាងការកសាងដល់សហគមន៍ក្នុងមូលដ្ឋាន។ ពួកអ្នកបើកឧទ្ធម្ភាគចក្រមួយក្រុមមកពីប្រទេសបារាំងនិងក្រុមមកពីប្រទេសកាណាដា ប្រទេសសិង្ហបូរី និងប្រទេសអេស៉្បាញក៏នឹងចូលរួមក្នុងបេសកកម្មនេះដែរ។
នៅឆ្នាំនេះ បេសកកម្មនេះនឹងទៅទស្សនាប្រទេសជាតិជាកោះភាគច្រើនគឺប្រទេសតុងហ្កា (Tonga) វ៉ានូអាទូ (Vanuatu) ទីម័រខាងកើត និងរដ្ឋសហព័ន្ធ ម៉ៃក្រូនីស៊ីយា (Micronesia)។ បេសកកម្មនេះក៏នឹងឈប់សំចតនៅក្នុងប្រទេសប៉ាពួរ ញូវ គីណេ (Papua-New Guinea) ផងដែរ។
មេបញ្ជាការនៃបេសកកម្មនេះគឺលោកវរនាវីឯក ចីស្ស៊ី វិលសិន (Jesse Wilson) ថ្លែងថា៖
«គ្មាននរណាម្នាក់អាចទស្សន៍ទាយអំពីពេលវេលានិងកន្លែងដែលមហន្តរាយធម្មជាតិអាចកើតមានបានក្នុងតំបន់នេះទេ។ ដូច្នេះទោះណាជាបេសកកម្មនេះស្ថិតក្នុងប្រទេសតុងហ្កា ឬ ក្នុងប្រទេសវ៉ានូអាទូក៏ដោយ ក៏យើងត្រូវការឲ្យមានអារម្មណ៍ល្អមួយនៅក្នុងប្រទេសពិសេសទាំងអស់នេះដែលយើងប្រហែលត្រូវឆ្លើយតបថា តើរចនាសម្ព័ន្ធខាងការប្រុងប្រៀបនៅពេលមានមហន្តរាយនិងអង្គការជួយសង្គ្រោះពេលមានមហន្តរាយមានសភាពបែបណានៅក្នុងប្រទេសនោះ»។
លោកវរនាវីឯកវីលសិន មានប្រសាសន៍ថានាវាទាំងនេះនិងក្រុមនាវិកព្រមទាំងអង្គការស៊ីវិលខាងជួយសង្គ្រោះដែលនឹងធ្វើការជាមួយពួកទាហានជើងទឹកទាំងនេះក៏នឹងជួយដល់គម្រោងការងារបច្ចុប្បន្នក្នុងប្រទេសជាអ្នកទទួលភ្ញៀវទាំងនេះដូចជាការកសាងឬការជួសជុលជាថ្មីមន្ទីរព្យាបាលគ្លីនិក សាលារៀន និង កន្លែងធ្វើទឹកស្អាតសម្រាប់បរិភោគ។ នាវាឃ្លីវលិនដ៍ មិនមែនជាកប៉ាល់ពេទ្យទេ ក៏ប៉ុន្តែវាមានគ្លីនិកទំនើបមួយ ហើយនឹងបញ្ជូនពួកវេជ្ជបណ្ឌិតនិងក្រុមគិលានុប្បដ្ឋាកឲ្យទៅព្យាបាលប្រជារាស្ត្រក្នុងមូលដ្ឋាន ពិនិត្យមើលធ្មេញនិងផ្តល់វ៉ែនតា។
លោកវរនាវីឯកវីលសិន មានប្រសាសន៍ថាទោះណាជាកងទ័ពជើងទឹកកំពុងគាំទ្រសង្គ្រាមនៅក្នុងប្រទេសអ៊ីរ៉ាក់និងប្រទេសអាហ្វហ្កានីស្ថាន ប្រយុទ្ធនឹងពួកចោរសមុទ្រក្នុងលំហសមុទ្រទល់មុខនឹងឆ្នេរសមុទ្រទ្វីបអាហ្វ្រិក និងបំពេញបេសកកម្មខាងសន្តិសុខរាប់សិបទៀតនៅទូទាំងពិភពលោកក៏ដោយ ក៏ពួកមេដឹកនាំកងទ័ពជើងទឹកសហរដ្ឋអាមេរិកមានជំនឿថាជាការមានសារៈសំខាន់ក្នុងការបំពេញបេសកកម្មដូចបេសកកម្មលើកនេះ។
«មានវិសាលគមមួយនៃការធ្វើសង្គ្រាម។ មានបេសកកម្មកម្រឹតខ្ពស់ដែលទាក់ទិននឹងសង្គ្រាមពីរដែលយើងកំពុងប្រយុទ្ធនៅពេលសព្វថ្ងៃនេះ ហើយបន្ទាប់មកមានជំនួយមនុស្សធម៌និងការជួយសង្គ្រោះគ្រាមានអាសន្ន។ យើងមិនឈប់ធ្វើបេសកកម្មណាមួយរបស់យើងទេ ហើយយើងមិនឈប់ធ្វើការប្រុងប្រៀបឬហ្វឹកហ្វឺនដើម្បីធ្វើបេសកកម្មណាមួយដែលយើងប្រហែលមានកាតព្វកិច្ចត្រូវធ្វើ។ ស្តីអំពីប្រភពធនធានវិញពួកមេដឹកនាំរបស់យើងសន្យាថានឹងផ្តល់ប្រាក់កាសសម្រាប់ការហ្វឹកហ្វឺនរបស់យើងនិងការប្រុងប្រៀបរបស់យើងសម្រាប់អ្វីដែលយើងចាត់ទុកថាជាផ្នែកសំខាន់ណាស់មួយនៃបេសកកម្មរបស់យើង»។
ភាពដៃគូនៃតំបន់មហាសមុទ្រប៉ាស៊ីហ្វ៊ិក ដោយផ្នែក បានទទួលការបំផុសគំនិតពីមហារលកសមុទ្រស៊ូណាមីក្នុងមហាសមុទ្រឥណ្ឌាកាលពីឆ្នាំ២០០៤ ដើម្បីធ្វើឲ្យប្រាកដប្រជាថា សហរដ្ឋអាមេរិកនិងប្រទេសផ្តល់ជំនួយឯទៀតៗធ្វើការសម្របសម្រួលឲ្យបានល្អប្រសើរជាងមុនជាមួយពួកប្រទេសក្នុងតំបន់ដើម្បីឆ្លើយតបនឹងមហន្តរាយក្នុងពេលអនាគត។ បេសកកម្មប្រាំលើកមុនបានបម្រើអ្នកជំងឺបីសែននាក់ក្នុងប្រទេស១៣ហើយបានចូលរួមក្នុងគម្រោងការវិស្វកម្ម១៣០។ លោកវរនាវីឯកវីលសិន បានមានប្រសាសន៍ថាកំពុងមានការរៀបចំផែនការសម្រាប់បេសកកម្មមួយលើកទៀតនៅឆ្នាំក្រោយ។
ប្រែសម្រួលដោយ ឈឹម សុមេធ
