សេតវិមាននឹងឈានទៅធ្វើការកែទម្រង់មួយចំនួនក្នុងគោលបំណងបង្កើនសន្តិសុខតាមអ៊ីនធឺណិតនៅតាមកំពង់ផែរបស់សហរដ្ឋអាមេរិក ដែលកំពង់ផែមួយចំនួនប្រហែលជាស្ថិតក្នុងគ្រោះថ្នាក់រួចទៅហើយនៃការធ្លាក់ចូលទៅក្រោមឥទ្ធិពលរបស់ក្រុមចោរបច្ចេកវិទ្យាដែលមានទំនាក់ទំនងជាមួយនឹងប្រទេសចិន។
ប្រធានាធិបតីសហរដ្ឋអាមេរិកលោក Joe Biden នៅថ្ងៃពុធនេះគ្រោងនឹងចេញបទបញ្ជាមួយប្រគល់សិទ្ធិទទួលខុសត្រូវផ្នែកសន្តិសុខតាមអ៊ីនធឺណិតនៅតាមកំពង់ផែទៅឱ្យឆ្មាំសមុទ្រអាមេរិក ក្នុងគោលបំណងធ្វើឱ្យច្បាស់ថាលក្ខខណ្ឌសន្តិសុខអប្បបរមាត្រូវបានបង្កើតឡើងឱ្យបានឆាប់តាមដែលអាចធ្វើបាន។
បទបញ្ជានេះក៏នឹងអនុញ្ញាតឱ្យឆ្មាំសមុទ្រអាមេរិកធ្វើការត្រួតពិនិត្យសុវត្ថិភាពដែនអ៊ីនធឺណិតរបស់កំពង់ផែនិងកប៉ាល់នានា ក៏ដូចជាដាក់កំហិតលើចរាចរណ៍របស់កប៉ាល់ណាដែលគេសង្ស័យថាអាចបង្កជាការគំរាមកំហែងតាមអ៊ីនធឺណិតចំពោះកំពង់ផែរបស់សហរដ្ឋអាមេរិកផងដែរ។
ជាងនេះទៀត ការកែប្រែនេះស្នើឱ្យមានការរាយការណ៍ដែលតម្រូវឱ្យធ្វើអំពីការវាយប្រហារតាមអ៊ីនធឺណិតលើកំពង់ផែនានា។
កំពង់ផែនៅក្នុងសហរដ្ឋអាមេរិកមានចំនួនជាង ៣០០ និងមានពលរដ្ឋអាមេរិកាំងដែលធ្វើការនៅទីនោះប្រហែល ៣១ លាននាក់។ មន្ត្រីសហរដ្ឋអាមេរិកបាននិយាយថា កំពង់ផែទាំងនោះរួមចំណែកប្រហែល ៥,៤ លានលានដុល្លារដល់សេដ្ឋកិច្ចរបស់សហរដ្ឋអាមេរិក និងដើរតួជាកំពង់ផែចម្បងសម្រាប់ទំនិញមកពីជុំវិញពិភពលោក។
នៅក្នុងការវិវត្តមួយទៀត ប្រតិបត្តិការអន្តរជាតិមួយដែលដឹកនាំដោយអាជ្ញាធរមានសមត្ថកិច្ចរបស់ចក្រភពអង់គ្លេសនិងសហរដ្ឋអាមេរិកបានបង្អាក់ធ្ងន់ធ្ងរដល់ក្រុម LockBit ដែលជា «ក្រុមឧក្រិដ្ឋកម្មតាមអ៊ីនធឺណិតដ៏មហន្តរាយបំផុតនៅលើពិភពលោក» ជំនាញខាងជំរិតទារប្រាក់តាមអ៊ីនធឺណិតដែលមានទំនាក់ទំនងជាមួយនឹងរុស្ស៊ី។ នេះបើយោងតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
ក្រុម LockBit នេះនឹងក្រុមពាក់ព័ន្ធផ្សេងទៀតរបស់ក្រុមនេះបានដៅគោលដៅវាយប្រហារលើរដ្ឋាភិបាល ក្រុមហ៊ុនធំៗ សាលារៀន និងមន្ទីរពេទ្យ ដោយបង្កការខូចខាតអស់រាប់ពាន់លានដុល្លារនិងជំរិតទារប្រាក់បានរាប់សិបលានដុល្លារពីជនរងគ្រោះ។
ទីភ្នាក់ងារឧក្រិដ្ឋកម្មជាតិ (NCA) របស់ចក្រភពអង់គ្លេស ដែលធ្វើការជាមួយនឹងការិយាល័យសហព័ន្ធស៊ើបអង្កេត (FBI) របស់សហរដ្ឋអាមេរិក ទីភ្នាក់ងារកិច្ចសហប្រតិបត្តិការអនុវត្តច្បាប់របស់សហភាពអឺរ៉ុប (Europol) និងទីភ្នាក់ងារផ្សេងៗមកពីប្រទេស ៩ ទៀតនៅក្នុងក្រុមប្រតិបត្តិការអនុវត្តច្បាប់សាកល Operation Cronos បានបញ្ជាក់ថា ខ្លួនបានជ្រៀតចូលបណ្ដាញរបស់ក្រុម LockBit និងត្រួតត្រាលើសេវារបស់បណ្ដាញនេះ។
វេបសាយរបស់ក្រុម LockBit ដែលលក់សេវាអនុញ្ញាតឱ្យមនុស្សអាចរៀបចំការវាយប្រហារតាមអ៊ីនធឺណិតនិងផ្អឹបទុកទិន្នន័យរហូតទាល់តែមានការបង់ប្រាក់ឱ្យ ត្រូវបានក្រុមប្រតិបត្តិការ Operation Cronos ជ្រៀតចូលត្រួតត្រាកាលពីល្ងាចថ្ងៃចន្ទ៕
វេទិកាបញ្ចេញមតិ