កងទ័ពអ៊ីរ៉ាក់បានបើកកិច្ចប្រតិបត្តិការដើម្បីដណ្តើមយកទីក្រុង Tikrit មកវិញកាលពីថ្ងៃព្រហស្បតិ៍ ប៉ុន្មានម៉ោងបន្ទាប់ពីយន្តហោះចំបាំងមកពីកងទ័ពចម្រុះដែលដឹកនាំដោយសហរដ្ឋអាមេរិកបានចាប់ផ្តើមវាយប្រហារលើទីតាំងរបស់ក្រុមរដ្ឋអ៊ីស្លាមនៅក្នុងទីក្រុងនោះ។
មន្រ្តីយោធាអ៊ីរ៉ាក់បានប្រាប់ទីភ្នាក់ងារព័ត៌មាន AP ថា ការប្រយុទ្ធគ្នាបានរីករាលដាលកាន់តែខ្លាំងឡើងនៅពេលដែលកងទ័ពអ៊ីរ៉ាក់និងកងទ័ពពិសេសបានរុលទៅកាន់កណ្តាលក្រុង Tikrit ដែលជាទីក្រុងកំណើតរបស់សាដាម ហ៊ូសេន។
យន្តហោះចម្បាំងអ៊ីរ៉ាក់ក៏បានវាយប្រហារលើទីតាំងរបស់ក្រុមរដ្ឋអ៊ីស្លាមក្នុងទីក្រុង Tikrit ដែរ។
ការវាយប្រហារកាលពីថ្ងៃពុធដោយក្រុមចម្រុះបានចាប់ផ្តើមបន្ទាប់ពីនាយករដ្ឋមន្រ្តីអ៊ីរ៉ាក់ Haider al-Abadi បានស្នើសុំការគាំទ្រការវាយប្រហារអស់រយៈពេលមួយខែដើម្បីដណ្តើមយកតំបន់យុទ្ធសាស្រ្តនេះមកវិញ។
លោក James Terry មេបញ្ជាការសហរដ្ឋអាមេរិកដែលបញ្ជាកងទ័ពចម្រុះនិយាយថា ការវាយប្រហារតាមអាកាសនេះនឹងធ្វើឲ្យកងទ័ពអ៊ីរ៉ាក់បណ្តេញជនសកម្មប្រយុទ្ធចេញពីទីក្រុងនោះ៕
