ភ្ជាប់​ទៅ​គេហទំព័រ​ទាក់ទង

សភា​​តំណាង​រាស្រ្ត​​​អាមេរិក​​ជជែក​​ដេញដោល​​គ្នា​អំពី​​ការ​​កាត់​​បន្ថយ​​មុខ​​ចំណាយ​របស់​​រដ្ឋាភិបាល​


លោក​ស្រី​ Nancy Pelosi​ តំណាង​​រដ្ឋ​​ California​ មេដឹកនាំ​​សម្លេង​ភាគ​តិចនៃសភា​តំណាង​រាស្ដ្រ​​ អម​​ដោយ​លោក​ Steny Hoyer​ តំណាង​រដ្ឋ​ Maryland មេដឹកនាំ​​សម្លេង​ភាគ​តិច​ នៃសភា​តំណាង​រាស្ដ្រ​​ ហើយ​នឹង​លោក​​ James Clyburn មេដឹកនាំ​ជំនួយ​​​​សម្លេង​ភាគ​តិច​ នៃ

វិមាន​កាពីតូល៖ សភា​តំណាង​រាស្រ្ត​សហរដ្ឋ​អាមេរិក​ កំពុង​ជជែក​ដេញដោល​គ្នា​យ៉ាង​ខ្លាំង​នៅថ្ងៃ​ទី​៤​អំពី​សេចក្តី​ព្រៀង​ច្បាប់​ដែល​នឹង​កាត់បន្ថយ​ការចំណាយ​ជាង​៦០​ពាន់​លាន​ដុល្លា​របស់​រដ្ឋា​ភិបាល​សម្រាប់ឆ្នាំ​សាពើ​ពន្ធ​នេះ​ ។ មាន​ការប្រយុទ្ធ​គ្នា​ដ៏​ស្វិតស្វាញ​រវាង​គណៈបក្ស​ប្រជាធិបតេយ្យនិង​គណៈបក្ស​សាធារណៈ​រដ្ឋ​និយម​អំពី​អាទិភាព​នៃ​ការចំណាយ​ផ្សេងៗ​របស់ប្រ​ទេស​។

ក្រុម​សភា​តំណាងរាស្រ្ត​បាន​ចំណាយ​ពេលវេលា​ភាគច្រើន​នៃ​រយៈពេល​៣​ថ្ងៃ​៣​យប់​កន្លង​មក​នេះ​ដើម្បី​ជជែក​ដេញដោល​និង​បោះឆ្នោត​លើ​វិសោធនកម្ម​ចំនួន​៥៨៣​ដល់​សេចក្តី​ព្រៀងច្បាប់​មួយ​ដើម្បី​កាត់​បន្ថយ​ការចំណាយ​របស់​រដ្ឋាភិបាល​។ សមាជិក​សភា​តំណាង​រាស្រ្ត​ខ្លះ​ បាន​ចាប់ផ្តើម​បង្ហាញ​នូវ​ភាពតាន​តឹងក្នុង​ចិត្ត​និង​ការនឿយ​ហត់​ ក៏ប៉ុន្តែ​សមាជិក​សភា​តំណាង​រាស្រ្ត​ខ្លះ​ ដូចជា​លោក ​Mike Pence ​សភា​តំណាងរាស្រ្ត​ខាង​គណៈបក្ស​សាធារណៈ​រដ្ឋនិយម​មកពីរដ្ឋ​Indiana​មាន​ចិត្ត​រំជើប​រំជួល​ចង់​បន្ថយ​យ៉ាងខ្លាំង​ថែម​ទៀត​ដល់​ការចំណាយ​របស់​រដ្ឋា​ភិបាល​។

«​ យើង​បាន​និយាយ​ទៅកាន់​ប្រជាពលរដ្ឋ​អាមេរិកាំង​ថា​យើង​ នឹង​កាត់​បន្ថយការចំណាយ​យ៉ាងហោច​ណាស់​ក៏​១រយ​ពាន់​លាន​ដុល្លា​ដែរ​ យើង​បាន​កាត់​បន្ថែម​ប្រាក់​រាប់​រយ​លាន​ដុល្លា​ទៀត​ យើង​កាត់​បន្ថយ​ច្រើន​ថែម​ទៀត​ យើង​កាត់​បន្ថយ​២២​ពាន់​លាន​ដុល្លា​ទៀត យើង​សន្យា​តិច​តែ​យើង​ត្រូវ​ធ្វើ​បាន​ច្រើន​ហើយ​យើង ​ធ្វើ​ឲ្យ​ប្រទេស​ជាតិ​របស់​យើង​ត្រឡប់​ទៅកាន់​ផ្លូវ​មួយ​ឆ្ពោះ​ទៅ​កាន់​ការទទួល​ខុសត្រូវ​សារពើពន្ធ​និង​ការធ្វើកំណែ​ទម្រង់​មួយ​»។

ពួក​គណៈបក្ស​សាធារណៈរដ្ឋ​និយម​បាន​ឈ្នះ​ការ​បោះ​ឆ្នោត​ពាក់​កណ្តាល​អាណត្តិ​នៅ​ទូទាំង​ប្រទេស​កាល​ពីខែ​វិច្ឆិការ​ឆ្នាំ​ទៅ ​ដោយ​បាន​ទទួល​ការ​ត្រួតត្រា​សភា​តំណាងរាស្រ្ត​ភាគច្រើន​ ហើយនឹង​ទទួល​បានអាសនៈ​បន្ថែម​ទៀត​នៅក្នុង​ព្រឹទ្ធសភា​ដែល​នៅក្រោមការ​ត្រួតត្រា​ដោយ​គណៈបក្ស​ប្រជាធិប​តេយ្យ​នៅ​ឡើយ​។ បេក្ខជន​ជាច្រើន​ខាង​គណៈបក្ស​សាធារណៈរដ្ឋ​និយម​បាន​សន្យានឹង​កាត់​បន្ថយ​យ៉ាង​ខ្លាំង​ដល់​ការចំណាយ​ក្នុង​ប្រទេស​។

ក្នុងអម្លុង​ពេល​នៃ​ការ​ជជែក​ដេញដោល​រយៈពេល​យូរ​នៅ​សប្តាហ៍នេះ​ ពួក​គណៈបក្ស​ប្រជាធិបតេយ្យ​បាន​ប្រយុទ្ធ​ដើម្បី​កាត់បន្ថយ​កម្មវិធី​សង្គម​ ថវិកា​ថែទាំ​សុខភាព​និង​ការផ្តល់​ថវិការ​សម្រាប់​ទីភ្នាក់​ងារ​ការពារ​បរិដ្ឋាន​ហើយ​នឹង​ទីភ្នាក់ងារ​អនុវត្តន៍​បទ​បញ្ជា​ផ្សេងៗ​ទៀត​។ លោក ​Keith Ellison ​តំណាងរាស្រ្ត​ខាង​គណៈបក្ស​ប្រជាធិបតេយ្យ​នៃ​រដ្ឋ​ Minnesota​ និយាយ​ថា​ប្រជាពលរដ្ឋ​អាមេរិកាំង​ជាច្រើន​ប្រហែល​កំពុង​ឆ្ងល់​ថា​តើការ​ជជែកដេញ​ដោល​នោះបាន​ធ្វើ​អំពី​អ្វី​។

«​លោក​ប្រធាន​ អ្វី​ដែល​យើង​កំពុង​វែកញែក​គឺ​មាគ៌ា​ណា​ដែល​សហរដ្ឋ​អាមេរិកត្រូវ​ដើរ​ ?​។​តើ​យើង​នឹង​កាត់បន្ថយ​កម្មវិធី​ដ៏​សំខាន់​ដែល​ជួយ​ធ្វើ​ឲ្យ​ជីវភាព​ប្រជា​ពលរដ្ឋ​អាមេ​រិកាំង​កាន់តែ​ប្រសើរ​ឡើងហើយនឹង​ធ្វើឲ្យ​ពួកគេ​ក្លាយ​ជា​អ្នកមាន​វណ្ណៈ​ថ្នាក់​កណ្តាល​ឬ​ ?។តើ​យើង​នឹង​កាត់បន្ថយ​បទបញ្ញត្តិ​ដ៍សំខាន់​ដែល​ជួយ​ការពារ​យើង​ ធ្វើ​ឲ្យ​យើង​មាន​ខ្យល់​ស្អាត​និង​ទឹក​ស្អាត ​ហើយ​នឹង​សិទ្ធិ​ដ៍​សំខាន់​ផ្សេងៗ​ទៀត​ឬ​ ?​។​ លោក​ប្រធាន​ តើ​យើង​នឹង​មាន​ប្រទេស​អាមេរិក​ដែល​យើង​មាន​សិទ្ធិ​ខាង​ការងារ​ ដែល​យើង​អាច​រៀបចំ​ចាត់ចែង​បទ​បញ្ញតិ​ដ៍​ត្រឹមត្រូវ​មួយដែល​ផ្តល់​ឲ្យ​យើង​នូវ​ឱកាស​ទៅតាម​ស្តង់ដារ​ដ៍​ត្រឹមត្រូវ​នៅ​ក្នុង​ប្រទេ​សអាមេរិក​»។

លោក​ស្រី Anna Palmer ​នៃ​ទស្សនាវដ្តី​ Congressional ​Quarterly​ និយាយ​ថា​សភា​មានការ​លំបាក​ដើម្បី​ធ្វើ​ការ​កាត់​បន្ថយ​ថវិកា​ ពីព្រោះ​សភា​ធ្លាប់តែ​ចាយវាយ​ច្រើន​។

«ជា​លើក​ទីមួយ​ក្នុង​រយៈពេល​យ៉ាង​យូរ​ ដែល​សភា​តំណាងរាស្រ្ត​កំពុង​ពិនិត្យ​ការ​កាត់​បន្ថយ​មូលនិធិ​ជា​ជាង​ការបន្ថែម​ការចំណាយ​ ខាងពី​ជំនួយ​បរទេស​ ការសិក្សា​អប់រំ​ ហើយ​នឹង​ធ្វើ​ឲ្យ​ការកាត់​បន្ថយ​ការចំណាយ​យ៉ាង​ខ្លាំង​»។

វិធានការណ៍​ចំណាយ​បណ្តោះ​អាស័ន្ន​នៅពេល​បច្ចុប្បន្ន​នេះ​ ដែលនឹង​ចូល​ជា​ធរមាន​ នឹង​ផុតកំណត់​នៅថ្ងៃ​ទី​៤ ​ខែ​មិនា​ ។ សភា​តំណាងរាស្រ្ត​និង​ព្រឹទ្ធសភា​ ត្រូវតែ​អនុម័ត​លើ​សេចក្តីព្រៀងច្បាប់​លើ​ការចំណាយ​ដើម្បី​រារាំង​ការបិទ​រដ្ឋា​ភិ​បាល​នៅ​ថ្ងៃ​ទី៥​ ខែ​មិនា​។ រដ្ឋាភិបាល​សហរដ្ឋ​អាមេរិក​ បាន​បិទ​នៅ​ចុង​ឆ្នាំ​១៩៩៤​ បន្ទាប់​ពី​បាន​តទល់​គ្នា​ជាមួយ​លោក​ Bill Clinton​ ប្រធានាធិបតី​និង​សភា​តំណាងរាស្រ្ត​ដែល​ត្រួតត្រា​ដោយ​គណៈបក្ស​សាធារណៈ​រដ្ឋ​និយម​។​ លោកស្រី​ Anna Palmer ​និយាយ​ថា​មេដឹកនាំ​ខាងគណៈ​បក្សសាធារណៈរដ្ឋ​និយម​ មាន​ការ​ប្រុង​ប្រយ័ត្ន​ ​ពីការបិទ​ម្តង​ទៀត​។

ក៏ប៉ុន្តែ ​អ្នកស្រី​ Palmer ​និង​អ្នកវិភាគ​ផ្សេង​ៗ​ទៀត​និយាយ​ថា​ ការ​ជជែកដេញ​ដោល​យ៉ាងខ្លាំង ​លើ​អាទិភាព​ថវិកា​ ក៏ជា​គ្រោះថ្នាក់​មួយ​ដែរ​ដល់​គណៈបក្ស​ប្រជាធិបតេយ្យ​របស់​លោក​ប្រធានាធិបតី​ Barack Obama​ ។ ពួក​មេដឹកនាំ​ខាង​គណៈបក្ស​ប្រជាធិបតេយ្យ​នៅ​ក្នុង​ព្រឹទ្ធសភា​បាន​និយាយ​ថា​ពួកគេ​ នឹង​មិនសុខចិត្ត​ទទួល​យក​ការ​កាត់បន្ថយ​យ៉ាងខ្លាំង​បែបនេះ​ដល់​សេចក្តីព្រាង​ច្បាប់​ចំណាយ​ទេ​ ហើយ​លោក​ប្រធានាធិបតី​ Obama ​បាន​មាន​ប្រសាសន៍​ថា ​លោក​នឹង​បោះ​ឆ្នោត​វ៉េតូ​ ប្រឆាំង​នឹង​សេចក្តី​ព្រាងច្បាប់​នោះ​នៅពេល​វា​មក​ដល់​តុ​របស់​លោក​។

ប្រែ​សម្រួល​ដោយជឹង​ ប៉ូជីន

XS
SM
MD
LG