នាយករដ្ឋមន្ត្រីជប៉ុនលោក Shinzo Abe នឹងជួបពិភាក្សាគ្នាជាមួយប្រធានាធិបតីជាប់ឆ្នោតសហរដ្ឋអាមេរិកលោក Donald Trump នៅថ្ងៃព្រហស្បតិ៍នេះ នៅក្នុងទីក្រុង New York សហរដ្ឋអាមេរិក។ នៅក្នុងជំនួបនេះ លោក Shizo Abe គ្រោងនឹងលើកឡើងពីសារៈសំខាន់នៃសម្ព័ន្ធមិត្តផ្នែកសន្តិសុខរវាងប្រទេសជប៉ុន និងសហរដ្ឋអាមេរិក។
ចាប់តាំងពីឈ្នះការបោះឆ្នោតប្រធានាធិបតីសហរដ្ឋអាមេរិកកាលពីសប្ដាហ៍មុនមក លោក Donald Trump បាននិយាយតាមទូរស័ព្ទជាមួយនឹងមេដឹកនាំពិភពលោកជាច្រើននាក់ ដែលក្នុងនោះមានដូចជាប្រធានាធិបតីប្រទេសអេហ្ស៊ីបលោក Abdel Fattah el-Sissi អធិការបតីអាល្លឺម៉ង់លោកស្រី Angela Merkel ប្រធានាធិបតីចិនលោក Xi Jinping និងប្រធានាធិបតីរុស្ស៊ីលោក Vladimir Putin ជាដើម។ ប៉ុន្តែ ជំនួបជាមួយលោក Shinzo Abe លើកនេះ នឹងក្លាយជាជំនួបដោយផ្ទាល់រវាងលោក Trump និងមេដឹកនាំបរទេស ស្របពេលដែលលោក Trump ត្រៀមចូលកាន់តំណែងជាប្រធានាធិបតីសហរដ្ឋអាមេរិកនៅថ្ងៃទី ២០ ខែមករា ឆ្នាំ ២០១៧ ខាងមុខនេះ។
មុនពេលចាកចេញពីប្រទេសជប៉ុន លោក Abe បានបញ្ជាក់ថា លោកចង់ប្រើប្រាស់កិច្ចប្រជុំនេះ ដើម្បីពិភាក្សាអំពីទស្សនវិស័យរបស់លោកនៅថ្ងៃអនាគតជាមួយនឹងលោក Trump។
លោកបានបញ្ជាក់ក្នុងសម្ដីដើមយ៉ាងដូច្នេះថា៖ «ការសហការគ្នាអាចដំណើរការទៅមុខបាន គឺផ្អែកលើការជឿទុកចិត្តគ្នាតែប៉ុណ្ណោះ។ ដូច្នេះ ខ្ញុំចង់កសាងជំនឿទុកចិត្តនេះជាមួយនឹងលោក Trump ហើយផ្អែកលើជំនឿទុកចិត្តនេះ ខ្ញុំចង់ធ្វើការជាមួយលោក Trump ដើម្បីសន្តិភាព និងភាពរីកចម្រើននៅក្នុងពិភពលោក»។
ក្នុងអំឡុងពេលយុទ្ធនាការរកសំឡេងឆ្នោតកន្លងមក លោក Trump បានចោទជាសំណួរអំពីគោលការណ៍ជាមូលដ្ឋាននៃទំនាក់ទំនងរវាងសហរដ្ឋអាមេរិក និងប្រទេសជប៉ុន ដោយបាននិយាយថា សហរដ្ឋអាមេរិកបានធ្វើកិច្ចការច្រើនណាស់ដើម្បីផ្ដល់ការការពារដល់ប្រទេសជប៉ុន៕
