ភ្ជាប់​ទៅ​គេហទំព័រ​ទាក់ទង

អាមេរិក​ថា កា​របាញ់​គ្រាប់​មីស៊ីល​របស់​អ៊ីរ៉ង់​គឺ​ជា​រឿង​មួយ​ដែល​មិន​អាច​ទទួល​យក​បាន​ជា​ដាច់​ខាត


លោកស្រី Nikki Haley ឯក​អគ្គ​រដ្ឋ​ទូត​អាមេរិក​ប្រចាំ​នៅ​អង្គការ​សហប្រជាជាតិ​ធ្វើ​សេចក្តី​ថ្លែងការណ៍​នៅ​ពេល​លោកស្រី​ទៅ​ដល់​ទីស្នាក់ការ​អ.ស.ប​ ក្នុង​បុរី​ញូវយ៉ក កាលពី​ថ្ងៃទី២៧​ ខែមករា ឆ្នាំ២០១៧។

លោកស្រី Nikki Haley ឯក​អគ្គ​រដ្ឋ​ទូត​អាមេរិក​ប្រចាំ​នៅ​អង្គការ​សហប្រជាជាតិ​បាន​មាន​ប្រសាសន៍​កាល​ពី​ថ្ងៃ​អង្គារ​ថា ការ​បាញ់​គ្រាប់​មីស៊ីល​ឆ្លង​ទ្វីប​របស់​អ៊ីរ៉ង់​ក្នុង​ពេល​ថ្មីៗ​នេះ គឺ​ជា​រឿង​ដែល​មិន​អាច​ទទួល​យក​បាន​ជា​ដាច់​ខាត ហើយ​រដ្ឋបាល​របស់​លោក ត្រាំ ​នឹង​មិន​បិទ​ភ្នែក​ចំពោះ​វិធានការ​របៀប​នេះ​នោះ​ទេ។

លោកស្រី Haley បាន​ថ្លែង​ដោយ​សង្ខេប​ទៅ​កាន់​អ្នក​កាសែត បន្ទាប់​ពី​លោកស្រី​ចូលរួម​កិច្ចប្រជុំ​ដំបូង​បង្អស់​របស់​លោកស្រី​នៅ​ក្នុង​ក្រុមប្រឹក្សា​សន្តិសុខ​អង្គការ​សហប្រជាជាតិ ដែល​កិច្ចប្រជុំ​នេះ​ស្នើ​ឡើង​ដោយ​រដ្ឋាភិបាល​ក្រុង​វ៉ាស៊ីនតោន។
ប្រទេស​អ៊ីរ៉ង់​បាន​បញ្ជាក់​កាល​ពី​ថ្ងៃ​ពុធ​ថា ខ្លួន​ពិត​ជា​បាន​បាញ់​គ្រាប់​មីស៊ីល​ប្រាកដ​មែន ប៉ុន្តែ​វា​មិន​បាន​បំពាន​ដល់​កិច្ចព្រមព្រៀង​នុយក្លេអ៊ែរ​ជាមួយ​នឹង​មេដឹកនាំ​ពិភពលោក​កាល​ពី​ឆ្នាំ​២០១៥​នោះ​ទេ។

យោង​តាម​សេចក្តីសម្រេច​លេខ​២២៣១​របស់​អង្គការ​សហប្រជាជាតិ ដែល​ត្រូវ​បាន​អនុម័ត​ក្រោយ​ពី​កិច្ចព្រមព្រៀង​នុយក្លេអ៊ែរ​អ៊ីរ៉ង់ត្រូវ​បាន​អនុម័ត​រវាង​ប្រទេស​មហាអំណាច​ពិភពលោក​ទាំង​៦​ជាមួយ​នឹង​រដ្ឋាភិបាល​ក្រុង​តេហេរ៉ង់ កាល​ពី​ឆ្នាំ​២០១៥ អ៊ីរ៉ង់​ត្រូវ​បាន​អំពាវនាវ​មិន​ឲ្យ​ធ្វើ​សកម្មភាព​អ្វី​ពាក់ព័ន្ធ​នឹង​គ្រាប់​មីស៊ីល​បាញ់​ឆ្លង​ទ្វីប​នោះ​ទេ។ ប៉ុន្តែ​សេចក្តីសម្រេច​នោះ​មិន​បាន​ហាមឃាត់​ឲ្យ​ជាក់លាក់​នោះ​ទេ។ ​
លោក​ប្រធានាធិបតី​អាមេរិក ដូណាល់ ត្រាំ បាន​ហៅ​កិច្ចព្រមព្រៀង​នុយក្លេអ៊ែរ​អ៊ីរ៉ង់​នោះ​ថា «អន់​ខ្លាំង​ណាស់» ​ហើយ​កាល​ពី​ធ្វើ​យុទ្ធនាការ​បោះឆ្នោត លោក​ក៏​បាន​គំរាម​ឲ្យ​លុប​ចោល​កិច្ចព្រមព្រៀង​នោះ​ចេញ​ដែរ៕

XS
SM
MD
LG