ជនជាតិចិនម្នាក់ដែលកំពុងសិក្សានៅទីក្រុង Boston រដ្ឋ Massachusetts សហរដ្ឋអាមេរិក ត្រូវបានចោទប្រកាន់ជាផ្លូវការដោយមហាគណៈវិនិច្ឆ័យសហព័ន្ធសហរដ្ឋអាមេរិកមួយ ពីបទលួចតាមដាននិងគំរាមពលរដ្ឋចិនម្នាក់ទៀតដោយសារតែការបិតខិត្តប័ណ្ណគាំទ្រលទ្ធិប្រជាធិបតេយ្យនៅក្នុងប្រទេសចិន។
ក្រសួងយុត្តិធម៌អាមេរិក បានឲ្យដឹងកាលពីថ្ងៃអង្គារថា លោក Xiaolei Wu អាយុ២៥ឆ្នាំ ដែលជានិស្សិតនៅមហាវិទ្យាល័យតូរ្យតន្ត្រី Berklee ក្នុងទីក្រុង Boston ត្រូវបានចោទប្រកាន់ជាផ្លូវការចំនួន២បទចោទ គឺទី១ពីបទលួចតាមដានតាមបណ្ដាញអ៊ីនធឺណិត និងទី២ពីបទបញ្ជូនសារគំរាមកំហែងឆ្លងរដ្ឋ។ និស្សិតរូបនេះ ត្រូវបានចាប់ខ្លួនកាលពីខែធ្នូ ពីបទចោទបទលួចតាមដានតែមួយប៉ុណ្ណោះ។
ក្រសួងដដែលនិយាយថា បុគ្គលម្នាក់បានបិតខិត្តប័ណ្ណនៅក្នុង ឬនៅជិតបរិវេណសាលាកាលពីពាក់កណ្ដាលខែតុលា ដោយខិត្តប័ណ្ណនោះមានសរសេរពាក្យស្លោកគាំទ្រលទ្ធិប្រជាធិបតេយ្យថា «យើងចង់បានសេរីភាព» និង«យើងចង់បានប្រជាធិបតេយ្យ»។
តាមការចោទប្រកាន់ លោក Wu បានបំពានបុគ្គលរូបនោះតាមរយៈប្រព័ន្ធផ្សព្វផ្សាយសង្គម ហើយថែមទាំងគំរាមកាត់ដៃបុគ្គលនោះចោល បើខិត្តប័ណ្ណច្រើនថែមទៀតត្រូវបានបិត។ លោកWu ក៏ត្រូវបានចោទប្រកាន់ថាបានប្រាប់បុគ្គលនោះថាលោកបានផ្ដល់ព័ត៌មានដល់អាជ្ញាធរសន្តិសុខនៅក្នុងប្រទេសចិនអំពីខិត្តប័ណ្ណទាំងនេះហើយថាភ្នាក់ងារសន្តិសុខនឹងទៅសួរសុខទុក្ខគ្រួសាររបស់បុគ្គលនោះ។ តំណាងអយ្យការក៏បាននិយាយថាលោក Wu បានរកឃើញអាសយដ្ឋានអ៊ីមែលរបស់ជនរងគ្រោះ ហើយបានបង្ហោះអាសយដ្ឋាននោះតាមអ៊ីនធឺណិត ដើម្បីបំពានជនរងគ្រោះបន្ថែមទៀត។
លោក Wu ប្រឈមនឹងការជាប់ពន្ធនាគារ៥ឆ្នាំ ចំពោះបទចោទនីមួយៗ អំពីការលួចតាមដានតាមអ៊ីនធឺណិត និងពីបទបញ្ជូនសារគំរាមកំហែងឆ្លងរដ្ឋ រួមទាំងប្រាក់ពិន័យរហូតដល់២សែន៥ម៉ឺនដុល្លារក្នុងមួយបទចោទ។ ក្រុមផ្សាយវីអូអេជាភាសាចិនកុកងឺ រាយការណ៍ថា មហាវិទ្យាល័យតូរ្យតន្ត្រី Berklee បានលុបឈ្មោះនិស្សិត Wu ជាបណ្ដោះអាសន្ន៕
