សហរដ្ឋអាមេរិកបានដាក់ទណ្ឌកម្មកាលពីថ្ងៃព្រហស្បតិ៍លើអ៊ីរ៉ង់និងអង្គភាពពាក់ព័ន្ធនឹងពួក Houthi។ នេះបើយោងតាមគេហទំព័រក្រសួងហិរញ្ញវត្ថុដែលបានរាយឈ្មោះបុគ្គល ក្រុមហ៊ុននិងនាវានានាដែលត្រូវបានចាត់ជាទីដៅ។
ការដាក់ទណ្ឌកម្មនេះសំដៅលើនាវា៣គ្រឿងដែលជាប់ពាក់ព័ន្ធនឹងពាណិជ្ជកម្មប្រេងអ៊ីរ៉ង់និងប្រេងគីមី ដែលរកប្រាក់បានរាប់ពាន់លានដុល្លារដល់ក្រុមមេដឹកនាំអ៊ីរ៉ង់ គាំទ្រដល់កម្មវិធីអាវុធនុយក្លេអ៊ែររបស់រដ្ឋាភិបាលក្រុងតេហេរ៉ង់ ការផលិតមីស៊ីលផ្លោងនិងផ្តល់ថវិការដល់ក្រុមឧទ្ទាមនានាដូចជាក្រុម Hezbollah ក្រុម Hamas និង ក្រុម Houthi។ នេះបើយោងតាមក្រសួងហិរញ្ញវត្ថុសហរដ្ឋអាមេរិក។
លោក Bradley Smith អនុរដ្ឋមន្ត្រីស្តីទីសម្រាប់ការិយាល័យភេរវកម្មនិងចារកម្មហិរញ្ញវត្ថុបានថ្លែងក្នុងសេចក្តីថ្លែងការណ៍មួយថា«សហរដ្ឋអាមេរិកប្តេជ្ញាចាត់វិធានការលើប្រភពចំណូលសំខាន់ៗរបស់អ៊ីរ៉ង់ដែលផ្តល់ថវិការលើសកម្មភាពបង្កអស្ថិរភាពនានា»។ លោកSmith បានថ្លែងថា អ៊ីរ៉ង់ពឹងផ្អែកលើ«បណ្តាញប្រភពងងឹត»នៃនាវា ក្រុមហ៊ុន និងអ្នកសម្របសម្រួលនានាលើសកម្មភាពទាំងនោះ៕
